སྤྱི་ཡོངས་ཀྱི་འགྱུར་བ་དང་མཐུན་པ་ཞིག་ལ་འགྲོ་དགོས་པ་ལས་ལོགས་སུ་གནས་ཐབས་མེད།

མདུན་ངོས། / སྤྱི་ཡོངས་ཀྱི་འགྱུར་བ་དང་མཐུན་པ་ཞིག་ལ་འགྲོ་དགོས་པ་ལས་ལོགས་སུ་གནས་ཐབས་མེད།

ད་ཆ་བོད་མི་རིགས་རིག་གཞུང་དང་བཅས་པ་ཆགས་འཇིག་གི་ཉེན་ཁའི་མཚམས་སུ་སླེབས་ཡོད་པས། རང་རེ་ཕྱི་རྒྱལ་རང་དབང་ལུང་པར་སྡོད་མཁན་རྣམས་ཀྱིས་བོད་ནང་གི་ཛ་དྲག་དང་དཀའ་སྡུག་གི་གནས་སྟངས་ཐད་ཤེས་རྟོགས་གསལ་པོ་ཡོད་པ་བྱ་དགོས་ལ། གང་ཤེས་པ་རྣམས་མ་བརྗེད་པའི་ཐོག་ནས་རྟག་ཏུ་སོ་སོའི་ཕྲག་སྟེང་དུ་ལས་འགན་ལྗིད་པོ་ཞིག་ཡོད་པ་དྲན་དགོས། དེང་སྐབས་བོད་ནང་གི་ས་གནས་ས་ཐོག་གི་གནས་སྟངས་ལ་བལྟས་ཚེ་ཕལ་ཆེར་རེ་བ་བྲལ་བ་ལྟ་བུ་ཞིག་ཡོད། འོན་ཀྱང་འཛམ་གླིང་སྤྱི་ཡོངས་ལ་འགྱུར་བ་ཆེན་པོ་འགྲོ་བཞིན་ཡོད་ཅིང་། ལྷག་པར་རྒྱ་ནག་རང་ལ་མཚོན་ན་འདོད་པ་ཡོད་མེད་ལ་མི་ལྟོས་པར་ལོ་ངོ་ལྔ་དྲུག་གི་ནང་ཚུད་དམ། ཡང་ན་ལོ་ངོ་བཅུ་ཙམ་གྱི་ནང་ཚུད་དུ་མང་གཙོ་དང་རང་དབང་གི་ཕྱོགས་སུ་འགྱུར་བ་འགྲོ་རྒྱུ་ཐག་ཆོད་པ་ཡིན། རྒྱ་ནག་གཞུང་གིས་མཁྲེགས་འཛིན་ཇི་ལྟར་བྱས་ཀྱང་རྒྱ་ནག་རང་ཉིད་འཛམ་གླིང་གི་ཆ་ཤས་ཤིག་ཡིན་པ་དང༌། དེང་སྐབས་འཛམ་གླིང་སྤྱི་ཡོངས་འགྲོ་བ་མིའི་ཐོབ་ཐང༌དང་ཚོང་འབྲེལ་སོགས་རང་དབང་མང་གཙོའི་ཕྱོགས་སུ་འགྱུར་བ་ཆེན་པོ་འགྲོ་བཞིན་ཡོད་པར་བརྟེན། སྤྱི་ཡོངས་ཀྱི་འགྱུར་བ་དང་མཐུན་པ་ཞིག་ལ་འགྲོ་དགོས་པ་ལས་ལོགས་སུ་གནས་ཐབས་མེད། དེང་སྐབས་རྒྱ་གཞུང་གིས་བོད་ཀྱི་གནད་དོན་ཐོག་འགྲོ་སོང་ཕངས་མེད་དུ་བཏང་ནས་འཁྱོག་བཤད་ཤུགས་ཆེ་བྱེད་ཀྱི་ཡོད། འོན་ཀྱང་ང་ཚོར་བདེན་པ་ཡོད་པར་བརྟེན། འཛམ་གླིང་གི་ཡུལ་གྲུ་ཕལ་ཆེ་བས་རྒྱ་མིའི་འཁྱོག་བཤད་རྫུན་གཏམ་ལ་དོ་སྣང་དེ་ཙམ་བྱེད་ཀྱི་མེད་ལ། བོད་དོན་ལ་ཤ་ཚའི་རྒྱབ་སྐྱོར་ལོ་རེ་བཞིན་ཤུགས་ཆེ་རུ་འགྲོ་བཞིན་ཡོད། ལྷག་པར་རྒྱ་མི་ཤེས་ཡོན་ཅན་དང༌རང་དབང་འཐབ་རྩོད་པ། གཟུ་བོར་གནས་པ་མང་པོས་རང་རེར་སེམས་ཁུར་དང་རྒྱབ་སྐྱོར་བྱེད་ཀྱི་ཡོད། དེ་ནི་ང་ཚོའི་བཟང་ཕྱོགས་ཀྱི་འགྱུར་བ་ཞིག་ཡིན། དེ་ལྟར་ཕྱོགས་ཡོངས་ནས་བལྟས་ན་བོད་དོན་བདེན་མཐའ་མི་རིང་བའི་དུས་ཚོད་ནང་གསལ་ཐུབ་རྒྱུ་ངེས་པ་ཡིན། 

(ཕྱི་ལོ་ ༢༠༠༢ ཟླ་༡༢ ཚེས་༡༨ ཉིན་གྷོ་ཝ་ཁུལ་སྡོད་རང་རིགས་མི་མང་གྲངས་༢༢༣ དང་།  ཕྱི་རྒྱལ་བ་མི་གྲངས་ ༥༣ བཅས་ལ་སྩལ་པ་ལས་བཏུས།)