མིའི་རྣམ་དཔྱོད་ཀྱིས་སྐབས་རེར་སྤྱི་ཚོགས་དང༌ཁྱིམ་ཚང་ནང་རྙོག་དྲ་འཕར་མ་བཟོ་བ་ཡོང་གི་ཡོད།

མདུན་ངོས། / མིའི་རྣམ་དཔྱོད་ཀྱིས་སྐབས་རེར་སྤྱི་ཚོགས་དང༌ཁྱིམ་ཚང་ནང་རྙོག་དྲ་འཕར་མ་བཟོ་བ་ཡོང་གི་ཡོད།

མིའི་རྣམ་དཔྱོད་ཀྱིས་སྐབས་རེར་སྤྱི་ཚོགས་དང༌ཁྱིམ་ཚང་ནང་རྙོག་དྲ་འཕར་མ་བཟོ་བ་ཡོང་གི་ཡོད། འོན་ཀྱང་བྱམས་བརྩེའི་བསམ་བློ་ཤུགས་ཆེན་པོ་ཞིག་ཡོད་ན་རྐྱེན་ངན་པ་ཞིག་དང་འཕྲད་ཀྱང་བསམ་བློའི་ནང་ནས་འདི་ལྟར་བྱས་ན་མི་འགྲིག འདི་ལྟར་བྱས་ཚེ་གཞན་ལ་སྡུག་བསྔལ་འབྱུང་ངེས་རེད་སྙམ་པའི་འདུ་ཤེས་ཤིག་རང་ཤུགས་ཀྱིས་ཡོང་གི་ཡོད་སྟབས་དེས་རྙོག་དྲ་དང་དཀའ་ངལ་ཆུང་དུ་གཏོང་བར་ཕན་ཐོགས་ཆེན་པོ་ཡོད། གང་དུ་བཟང་པོའི་ཡོན་ཏན་ཇི་ཙམ་སྐྱོ་བ་ཡོད་སའི་སྤྱི་ཚོགས་དང་ཁྱིམ་ཚང་དེར་དཀའ་ངལ་དང་རྙོག་དྲ་ཡང་དེའི་ཚོད་ཀྱིས་མང་བ་ཡོང་གི་ཡོད། དམིགས་བསལ་ཉམས་ཞིབ་བྱེད་མཁན་བྱུང་མེད་ཀྱང་། བོད་དུ་རྒྱའི་བཙན་གནོན་འོག་དངངས་སྐྲག་དང་ཞེད་སྣང་གི་ཁོར་ཡུག་ནང་འཚར་ལོངས་བྱུང་བའི་ཕྲུ་གུ་དང༌། ཆུང་དུས་ནས་རྒྱ་གར་དུ་འཚར་ལོངས་བྱུང་བའི་ཕྲུ་གུ་གཉིས་བསྡུར་བ་ཡིན་ན་རྒྱ་གར་དུ་འཚར་ལོངས་བྱུང་བའི་ཕྲུ་གུ་དེ་དག་ཕྲན་བུའི་ཞི་འཇམ་པ་ལྟ་བུ་ཞིག་མཐོང་སྣང་ལ་ཡོང་གི་འདུག  དངངས་སྐྲག་དང༌ཞེད་སྣང་གི་འོག་ཏུ་འཚར་ལོངས་བྱུང་བའི་ཕྲུ་གུ་དེ་དག་རྐྱེན་ཕྲན་བུ་ཞིག་བྱུང་མ་ཐག་འཕྲལ་དུ་འཁྲུག་པ་རྒྱག་པ་ལྟ་བུ་གཟེ་རེ་པོའི་གཤིས་ཀ་ཤུགས་ཆེ་བ་ཡོད་པ་ལྟ་བུ་ཞིག་འཆར་སྣང་ལ་ཡོང་གི་འདུག   ལོ་རྒྱུས་ལ་མཚོན་ན། བོད་པའི་སྤྱི་ཚོགས་ནང་རྒན་གཞོན་གུས་བརྩི་བྱེད་པ་ལྟ་བུའི་ཡ་རབས་ཀྱི་ལམ་སྲོལ་བཟང་པོ་དེ་དག་གནའ་རབས་ཀྱི་གོམས་གཤིས་སམ་བསླབ་བྱའི་ནང་ཡོད་ཀྱང་། བར་སྐབས་སུ་འགྱུར་བ་ཆེན་པོ་ཞིག་ཕྱིན་ནས་མིའི་སེམས་ནང་འཁོན་འཛིན་ཤུགས་ཆེར་གཏོང་བའི་གྲལ་རིམ་འཐབ་རྩོད་བྱེད་པ་དང་། རྡུང་རྡེག་ཚ་ནན་གཏོང་བ་ཟེར་བ་སོགས་ཆེད་དུ་སློབ་སྦྱོང་སྤྲད་དེ་བྱམས་པ་དང་བརྩེ་བ་རྩ་བ་ནས་མེད་པའི་ལས་འགུལ་མང་པོ་སྤེལ་ཡོད།  བསམ་བློའི་འཁྱེར་སོ་ཚ་ནན་ཆེན་པོ་དང་སྡུག་སྦྱོང་གཏོང་བའི་སྤྱི་ཚོགས་ནང་ཏན་ཏན་དཀའ་ངལ་ཆེན་པོ་ཡོད།   རྒྱ་གར་ལ་མཚོན་ན་རྡུང་རྡེག་ཚ་ནན་གཏོང་དགོས་ཟེར་བ་ཞིག་མེད། 

ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།