རྣམ་དཔྱོད་ཅེས་པ་ཕན་གནོད་གཉིས་ཀའི་ངོ་བོར་འགྱུར་རུང་བ་ཞིག་ཡིན།

མདུན་ངོས། / རྣམ་དཔྱོད་ཅེས་པ་ཕན་གནོད་གཉིས་ཀའི་ངོ་བོར་འགྱུར་རུང་བ་ཞིག་ཡིན།

དཀའ་ངལ་ཞིག་དང་འཕྲད་དེ་འཚེ་བའི་ཐོག་ནས་ཡ་ལན་སློག་པའི་གོ་སྐབས་ཡོད་བཞིན་དུ་ནང་བསམ་བློའི་རྣམ་དཔྱོད་ལ་བརྟེན་ནས་འཚེ་བའི་ལམ་ལ་མི་འགྲོ་བ་ཞིག་བྱུང་ཚེ་དེ་ལ་ཞི་བདེ་ཞེས་བརྗོད་པ་ཡིན།  ཞི་བདེ་ཞེས་པ་དེ་ཡང་རྩ་བ་ཐུག་ས་དེ་བསམ་བློར་ཐུག་ཡོད། བསམ་བློའི་ནང་དུ་འཚེ་མེད་ཞི་བདེ་ཞེས་པའི་ངོས་འཛིན་གསལ་པོ་ཡོང་བ་ཞིག་བྱ་དགོས།  མི་སུ་འདྲ་ཞིག་ཡིན་ཀྱང་སྡུག་བསྔལ་མི་འདོད་པ་དང་བདེ་བ་འདོད་མཁན་ཤ་སྟག་རེད། འཚེ་བ་ལ་བརྟེན་ནས་སྡུག་བསྔལ་ཡོང་གི་ཡོད་སྟབས་འཚེ་བ་མེད་པ་ཞིག་བྱུང་ན་རང་ལ་ཕན་པ་ཙམ་དུ་མ་ཟད༌སྤྱི་ཚོགས་ནང་ཞི་བདེ་ཡོང་བ་ལའང་ཕན་པ། ཐ་ན་གཡས་གཡོན་གྱི་བྱ་རི་དྭགས་སོགས་ལའང་ཕན་ངེས་རེད།  འཚེ་བ་དང༌འཚེ་བ་མེད་པ་ཞེས་པ་དེ་མིའི་རྣམ་དཔྱོད་ཁོ་ན་དང་འབྲེལ་ནས་ཡོང་གི་ཡོད།  མིའི་རྣམ་དཔྱོད་དེ་སྤྱི་ཚོགས་གཏོར་བཤིག་གཏོང་བའི་རྒྱུ་རྐྱེན་དུ་ཡང་འགྱུར་སྲིད་ལ། སྤྱི་ཚོགས་ལ་ཕན་བདེ་སྒྲུབ་པའི་ཕྱོགས་སུ་ཡང་འགྱུར་ཐུབ། རྣམ་དཔྱོད་ཅེས་པ་ཕན་གནོད་གཉིས་ཀའི་ངོ་བོར་འགྱུར་རུང་བ་ཞིག་ཡིན། ཁོང་ཁྲོ་དང་ང་རྒྱལ། འགྲན་སེམས་ལ་སོགས་ལ་བརྟེན་ནས་འཚེ་བ་ཡོང་གི་ཡོད་ཅིང་། བྱམས་པ་དང༌བརྩེ་བ། བཟོད་པ་དང་ཆོག་ཤེས་སོགས་ལ་བརྟེན་ནས་འཚེ་མེད་ཞི་བདེ་ཡོང་གི་ཡོད།  འཚེ་བ་ཞེས་པ་དེ་སྤྱོད་པ་ཞིག་ཡིན་པ་དང༌སྤྱོད་པ་དེ་ཡང་ཀུན་སློང་ལ་བརྟེན་ནས་ཡོང་གི་ཡོད། 

 ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།