བྱམས་བརྩེ་ཡུན་རིང་དུ་གོམས་ན་གཞན་རྣམས་ཀྱང་རང་གི་ཆ་ཤས་ལྟ་བུ་ཞིག་ཏུ་འགྱུར་ཐུབ།

མདུན་ངོས། / བྱམས་བརྩེ་ཡུན་རིང་དུ་གོམས་ན་གཞན་རྣམས་ཀྱང་རང་གི་ཆ་ཤས་ལྟ་བུ་ཞིག་ཏུ་འགྱུར་ཐུབ།

མི་ཚང་མར་རྒྱག་རེས་རྒྱག་པ་དང་གདོང་མདོག་ནག་པོ་བསྟན་ཏེ་བསྡད་ན་གྲོགས་པོ་ཡོང་ཐུབ་ཐབས་མེད། ཕྲུ་གུ་དེས་རྟག་ཏུ་རླུང་སྟོན་གྱི་ཡོད་ཅེས་མི་རྣམས་གཡོལ་ནས་འགྲོ་བ་ལས་ཚུར་འཆམ་པོ་བྱེད་པར་ཡོང་ཐབས་མེད། བྱམས་བརྩེ་དང༌གུས་ཞབས་བྱེད་པ། གྲོགས་པོའི་འབྲེལ་བ་བཟུང་བ་ཡིན་ན་མི་རྣམས་རང་ཤུགས་ཀྱིས་ཚུར་འདུས་ཡོང་ངེས་ཡིན། བསམ་བློའི་ནང་དུ་བྱམས་བརྩེ་ཡོད་ན་སྙིང་སྟོབས་ཀྱང་བསླེབ་ངེས་རེད། དེ་ཡང་ངོས་གཅིག་ནས་བལྟས་ན་སྙིང་སྟོབས་དང་ངོས་གཅིག་ནས་བལྟས་ན་བྱམས་བརྩེ་རེད། དཔེར་ན། བར་ལམ་ངོས་ལ་གུང་ཁྲན་ཏང་གི་རྒྱ་མི་ཞིག་ཐུག་བྱུང༌། ཁོས། རྒྱ་མི་གུང་ཁྲན་གྱིས་མི་ལ་སྡུག་པོ་མང་པོ་བཏང་བ་ཡིན་སྟབས།  ད་ཆ་མི་རྣམས་ཀྱིས་ཚུར་སྡུག་པོ་གཏོང་ངེས་རེད་བསམས་ཏེ་ཞེད་སྣང་འོག་བསྡད་ཡོད་པ་རེད་ཅེས་བཤད་བྱུང་། མི་ལ་སྡུག་པོ་གཏོང་བ་དང་མཐོང་ཆུང་བྱེད་པ། བློས་འགེལ་མི་བྱེད་པ་སོགས་བྱས་ཚེ་རང་བཞིན་གྱིས་སོ་སོར་མིས་ཚུར་སྡུག་པོ་གཏོང་ངེས་རེད་བསམ་པའི་འཇིགས་སྣང་ཡོང་ངེས་རེད།  ཅིའི་ཕྱིར་དེ་ལྟ་བུའི་འཇིགས་སྣང་ཡོང་གི་ཡོད་དམ་ཞེ་ན། མི་གཞན་གྱི་བདེ་སྡུག་ལ་བསམ་བློ་གཏན་ནས་མི་གཏོང་བར་རང་ཉིད་གཅིག་པུའི་ཁེ་ཕན་ལ་བསམ་བློ་བཏང་བའི་འབྲས་བུར་རང་ཉིད་གྲོགས་མེད་གཅིག་པུར་གྱུར་པ་དེ་ཡོང་གི་ཡོད།  


གཞན་ལ་བྱམས་བརྩེའི་བསམ་བློ་བཅངས་པ་ཡིན་ན་གཞན་རྣམས་སོ་སོའི་ཆ་ཤས་ལྟ་བུ་ཞིག་ཏུ་འགྱུར་ཐུབ་ཅིང་དེའི་ཐོག་ནས་ང་ཚོ་ཞེས་པའི་ཚོར་བ་དེ་ཡོང་ཐུབ། དེ་འདྲ་ཞིག་བྱུང་ཚེ་གཞན་གྱིས་གནོད་པ་བྱ་ངེས་སྙམ་པའི་ཞེད་སྣང་ཡོང་དོན་མེད། ང་ཚོ་དང་ཁོང་ཚོ་ཞེས་པའི་དབྱེ་འབྱེད་ཀྱི་བསམ་བློ་ཤུགས་ཆེན་པོ་བཏང་སྟེ་ང་ཚོ་ཞེས་པ་དེ་གལ་ཆེན་པོ་དང་རྒྱ་ཆེན་པོ་ཞིག་ཏུ་བལྟས་ཚེ་ཁོང་ཚོས་ང་ལ་གནོད་པ་བྱ་མི་ཡོང་ངམ་བསམ་པའི་ཞེད་སྣང་ཤུགས་ཆེན་པོ་སླེབས་ངེས་རེད། བསམ་བློའི་ནང་རང་བཞིན་གྱིས་བློ་བདེ་པོ་དང་བག་ཕེབས་པོ། གཡས་གཡོན་གང་ལ་བལྟས་ཀྱང་སོ་སོའི་གྲོགས་པོ་ཡིན་བསམ་པའི་བསམ་བློ་བཅངས་ཚེ་སེམས་ནང་ཞེད་སྣང་ཡོང་དོན་མེད།  གཡས་གཡོན་དང་རྒྱབ་མདུན་ཀུན་ལ་དོགས་པ་བྱས་ཚེ་སེམས་སུ་ཞེད་སྣང་བསླེབ་ངེས་ཡིན།  བྱམས་བརྩེར་བརྟེན་ནས་བསམ་བློའི་ནང་ཁྱད་པར་ཆེན་པོ་ཡོང་བཞིན་ཡོད། 

ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།