བྱམས་བརྩེ་ལྡན་པའི་འཇིག་རྟེན་ཞིག་བཟོ་རྒྱུར་མི་རེ་ངོ་རེས་བྱམས་བརྩེ་ཉམས་ལེན་བྱ་དགོས།

མདུན་ངོས། / བྱམས་བརྩེ་ལྡན་པའི་འཇིག་རྟེན་ཞིག་བཟོ་རྒྱུར་མི་རེ་ངོ་རེས་བྱམས་བརྩེ་ཉམས་ལེན་བྱ་དགོས།

བྱམས་བརྩེ་ཡོད་ན་འཕྲོད་བསྟེན་གྱི་ཐོག་ནས་གཟུགས་པོའི་འབྱུང་བ་རྣམས་སྙོམས་པོ་ཡོང་ཞིང་། སེམས་འཁྲུགས་པ་ཡིན་ན་གཟུགས་པོའི་འབྱུང་བ་མ་སྙོམས་པའི་ཐོག་ནས་དཀའ་ངལ་དང་རྙོག་དྲ་ཡོང་གི་ཡོད། འདི་དག་ཆོས་ནས་བཤད་པའི་འགྲེལ་བཤད་མིན་པར་དེང་དུས་ཀྱི་སྨན་པས་རྗོད་ཀྱི་ཡོད་པ་རེད། བྱམས་བརྩེ་ཡོད་ན་བདེ་སྐྱིད་ཡོང་བ་དང༌།   ཁོང་ཁྲོ་དང༌ཞེ་སྡང༌། ང་རྒྱལ་སོགས་ཀྱི་གཞན་དབང་དུ་ཕྱིན་ན་རྙོག་དྲ་ཡོང་གི་ཡོད་པ་དེ་ཤེས་པར་བྱ་དགོས།  


མིའི་སྤྱི་ཚོགས་དེ་བྱམས་བརྩེ་དང་ལྡན་པ་ཞིག་བྱུང་ཚེ།   མི་ཙམ་མ་དུ་ཟད་སྲོག་ཆགས་དུད་འགྲོ་དང་ཕྱི་སྣོད་ཀྱི་ཁོར་ཡུག་ལ་ཡང་ཕན་པ་ཞིག་ཡོང་ངེས། དེ་འདྲའི་སྤྱི་ཚོགས་དེ་ཡང་ཁྱིམ་ཚང་དང་མི་སྒེར་པ་སོགས་མཉམ་དུ་འདུས་པའི་ཚོགས་པ་ཞིག་ཡིན་པ་ལས། དེ་ལས་ཟུར་དུ་སྤྱི་ཚོགས་ཞེས་པ་ཞིག་མེད། བྱམས་བརྩེ་ལྡན་པའི་སྤྱི་ཚོགས་ཤིག་ཇི་ལྟར་བཟོ་དགོས་ཟེར་ན།  མི་རེ་ངོ་རེའི་ངོས་ནས་བྱམས་བརྩེ་ལྡན་པ་ཞིག་བྱས་ཏེ་སྤྱི་ཚོགས་དེ་ཉིད་བྱམས་བརྩེ་ལྡན་པ་ཞིག་ཏུ་བསྒྱུར་དགོས་པ་རེད།  ཁྱེད་ཚོ་གཞོན་སྐྱེས་རྣམས་ཆེ་ས་ནས་བཤད་ན་འཛམ་བུ་གླིང་གི་མི་རབས་གསར་པའི་གྲས་ཡིན་ཞིང་། སྒོས་སུ་བཤད་ན་ང་ཚོ་བོད་པའི་སྤྱི་ཚོགས་ཀྱི་མི་རབས་གསར་པ་དེ་ཡིན། དེས་ན་བོད་པའི་སྤྱི་ཚོགས་འདི་རྟག་ཏུ་མི་ལ་མགོ་སྐོར་ཐུབ་ཚོད་གཏོང་བ་དང་རྒྱག་རེས་བརྒྱབ་སྟེ་སྡོད་མཁན་གྱི་སྤྱི་ཚོགས་ཤིག་ཏུ་བསྒྱུར་རྒྱུའམ། ཡང་ན། མི་ཚང་མ་གྲོགས་པོའི་འདུ་ཤེས་ཡོད་པའི་ཐོག་ནས་གནས་སའི་ཞི་བདེ་བག་ཕེབས་ཀྱི་སྤྱི་ཚོགས་ཤིག་ཏུ་བསྒྱུར་མིན་དེ་ཁྱེད་ཚོའི་ལག་པར་ཡོད།   དེ་ལ་ད་ལྟ་ནས་བསམ་བློ་གཏང་དགོས་པ་ཡིན། ད་ལྟ་ཁྱེད་ཚོ་འཛིན་གྲྭ་དང་པོ་དང་གཉིས་པ་སོགས་ཐེམ་པ་རིམ་འཛེགས་ཀྱིས་སློབ་སྦྱོང་བྱས་ནས་འགྲོ་བཞིན་ཡོད་ཅིང་། མ་འོངས་པར་ཁྱེད་ཚོ་ཤེས་ཡོན་ཅན་ཞིག་ཏུ་འགྱུར་ན་སྙམ་ནས་སློབ་སྦྱོང་སྤྲོད་ཀྱི་ཡོད་པ་རེད།


 ཕྱི་ལོ་ ༢༠༠༦ ཟླ་ ༤ ཚེས་ ༤ ཉིན་རྡ་སྟེང་བོད་ཁྱིམ་དུ་ཞི་བདེའི་ལྷན་ཚོགས་ཐོག་སྩལ་པའི་བཀའ་སློབ་ལས་བཏུས།