རིགས་པ་དང་འགལ་བའམ་མངོན་སུམ་ལ་བསྙོན་ན་སྨྲ་བ་པོ་ཚད་མའི་སྐྱེས་བུར་ཡོང་སྟངས་མེད། 


མདུན་ངོས། / རིགས་པ་དང་འགལ་བའམ་མངོན་སུམ་ལ་བསྙོན་ན་སྨྲ་བ་པོ་ཚད་མའི་སྐྱེས་བུར་ཡོང་སྟངས་མེད། 


མངོན་པ་མཛོད་དང་གསང་འདུས་སོགས་ནས་གསུངས་པའི་རི་རབ་ཀྱི་རྣམ་གཞག་དེ་དག་རང་ཅག་གི་གཞུང་ནས་གསུངས་པ་ལ་ཨུ་ཚུགས་ཀྱིས་འདི་ཁོ་ན་བདེན་གྱི་དེང་གི་ཚན་རིག་པ་དག་གིས་བཤད་པ་ནི་བདེན་པ་མ་རེད་ཅེས་གླེན་པས་ཨུ་ཚུགས་གཏན་ནས་བྱེད་མི་རུང་།  ཚན་རིག་པ་དེ་དག་གིས་ཚད་དང་རྩིས་བརྒྱབ། ཆེ་ཤེལ་གྱིས་ཞིབ་འཇུག་བྱས་ཏེ་དངོས་སུ་མཐོང་བ་མྱོང་གྲུབ་དང་།  དེ་ཡང་མི་རེ་གཉིས་ཙམ་མ་ཡིན་པར་འཛམ་གླིང་འདིར་མི་དུང་ཕྱུར་ལྔ་བཅུ་ལྷག་གིས་མཐུན་སྣང་དུ་གྲུབ་པ་ཞིག་ང་ཚོས་མ་རེད་ཅེས་བཤད་དགོས་བྱུང་ན་རང་ཉིད་བཞད་གད་ཀྱི་ཡུལ་ཙམ་ལས་མ་མཐོང་།  དངོས་ཡོད་གནས་ཚུལ་གང་མཐོང་བ་དེ་ཁས་ལེན་དགོས་པ་ནི་ནང་པ་སྤྱིའི་འགྲོ་སྟངས་ཏེ།  དྲང་ངེས་ལེགས་བཤད་སྙིང་པོ་ལས།  རིགས་པ་དང་འགལ་བའི་གྲུབ་མཐའ་ཁས་ལེན་ན་སྨྲ་བ་པོ་ཚད་མའི་སྐྱེས་བུར་མི་རུང་བའི་ཕྱིར།  གསུངས་པ་ལྟར།  རིགས་པ་དང་འགལ་བའམ་མངོན་སུམ་ལ་བསྙོན་དགོས་པའི་རྣམ་གཞག་ཅིག་ཁས་ལེན་ན་སྨྲ་བ་པོ་ཚད་མའི་སྐྱེས་བུར་ཡོང་སྟངས་མེད། 


ཕྱི་ལོ་༡༩༩༧ ཟླ་༡༢ ཚེས་༢༨ ནས་༡༩༩༨ ཟླ་༡ ཚེས་༤ བར་སེར་བྱེས་གྲྭ་ཚང་དུ་སྟོང་ཐུན་བཤད་ལུང་གནང་སྐབས་སྩལ་བའོ། །