འདུ་བྱེད་ཀྱི་སྡུག་བསྔལ་སྡུག་བསྔལ་དུ་མཐོང་སྟེ་སྙིང་རྗེ་དགོས་པ་ཡིན།

མདུན་ངོས། / འདུ་བྱེད་ཀྱི་སྡུག་བསྔལ་སྡུག་བསྔལ་དུ་མཐོང་སྟེ་སྙིང་རྗེ་དགོས་པ་ཡིན།

སངས་རྒྱས་པའི་ཆོས་ཀྱིས་སྙིང་རྗེས་གང་འབྲལ་བར་འདོད་པའི་སྡུག་བསྔལ་ལ་རྣམ་གྲངས་གསུམ་གསུངས་པ་ཧ་ཅང་ཁྱབ་ཆེན་པོ་ཡིན།  སྤྱིར་སྙིང་རྗེའི་བསམ་པ་ཕལ་མོ་ཆེ་ཚོར་བ་སྡུག་བསྔལ་གྱི་རིགས་རྣམས་སྡུག་བསྔལ་དུ་མཐོང་སྟེ་དེ་ལས་འབྲལ་འདོད་ཀྱི་རྣམ་པ་ཅན་ཡིན་མོད་ཀྱང་། སངས་རྒྱས་ཀྱིས་གསུངས་པའི་སྙིང་རྗེ་དེ་འདུ་བྱེད་ཀྱི་སྡུག་བསྔལ་སྡུག་བསྔལ་དུ་མཐོང་སྟེ་དེ་ལས་ཐར་འདོད་ཀྱི་རྣམ་པ་ཅན་ཞིག་ལ་གོ་བས་ཤིན་ཏུ་ཟབ་པ་ཡིན།  འདུ་བྱེད་ཀྱི་སྡུག་བསྔལ་སྤངས་པའི་བྲལ་བའི་ཡོན་ཏན་མཐོང་བའི་ཚེ་དེ་ལྟ་བུའི་བྲལ་བའི་ཡོན་ཏན་མངོན་དུ་བྱ་རྒྱུ་ཡོད་བཞིན་དུ་དེ་ལྟར་བྱ་མི་ནུས་པར་སྡུག་བསྔལ་གྱི་གཞན་དབང་དུ་སོང་བ་འདི་ཅི་རང་དྲག་སྙམ་དུ་མི་བཟོད་པའི་བརྩེ་བ་རང་གི་ངང་གིས་སྐྱེ་འོང་བ་ཡིན།