སཱི་ཤེས་ཡོན་སློབ་གསོའི་རྒྱུན་སྤྱོད་ལག་དེབ་དབུ་འབྱེད་མཛད་པ།

མདུན་ངོས། / སཱི་ཤེས་ཡོན་སློབ་གསོའི་རྒྱུན་སྤྱོད་ལག་དེབ་དབུ་འབྱེད་མཛད་པ།

༄༅། །ཕྱི་ལོ་ ༢༠༡༩ ཟླ་ ༤ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Andaz Hotel གསོལ་མགྲོན་ཁང་དུ་ཏཱ་ལ་འི་བླ་མའི་དགེ་རྩ་དང་། ཨེ་མོ་རི་མཐོ་སློབ། ཝ་ན་ཐེབས་རྩ་བཅས་ཐུན་མོང་གི་གོ་སྒྲིག་ཞུས་པ་ལྟར་སྤྱི་ཚོགས་དང་། སེམས་མྱོང་། བཟང་སྤྱོད་བཅས་སྤེལ་བའི་ཤེས་ཡོན་སློབ་གསོའམ་སཱི་ཤེས་ཡོན་སློབ་གསོའི་རྒྱུན་སྤྱོད་ལག་དེབ་ཅེས་པ་སྐད་རིགས་ ༡༢ ནང་ཡོད་པ་དབུ་འབྱེད་མཛད་ཡོད་པ་རེད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ལྡི་ལི་མངའ་སྡེའི་སྤྱི་ཁྱབ་བློན་ཆེན་གཞོན་པ་དང་ཤེས་རིག་བློན་ཆེན་གཅིག་ལྕོགས་སྐུ་ཞབས་ (Manish Sisodia) མཆོག་དང་།   བྱིས་པའི་ཐོབ་ཐང་འཐབ་རྩོད་པ་ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་རྒྱ་གར་བ་སྐུ་ཞབས་ཀེ་ལ་ཤི་ས་ཏི་ཡར་ཐི་མཆོག(Kailash Satyarthi)  ཨེ་མོ་རི་གཙུག་ལག་སློབ་གྲྭའི་སློབ་དཔོན་ཆེན་མོ་བློ་བཟང་བསྟན་འཛིན་ནེ་གི་ལགས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག  ཤེས་རིག་བཀའ་བློན་པདྨ་དབྱངས་ཅན་མཆོག ཤེས་ཡོན་སློབ་སྟོན་པ། དཔལ་ས་སྐྱའི་སྐྱབས་མགོན་གོང་མ་ཕུན་ཚོགས་ཕོ་བྲང་གི་གདུང་སྲས་སྐྱབས་རྗེ་ཨ་བི་ཀྲྀ་ཏ་བཛྲ་རིན་པོ་ཆེ་མཆོག་སོགས་རྒྱ་གར་གྱིས་གཙོས་འཛམ་གླིང་རྒྱལ་ཁབ་ཁག་ ༣༧ ནས་སློབ་གྲྭ་ཁག་གི་སྐུ་ཚབ་དང་། སྤྱི་ཚོགས་ཞབས་ཞུ་བ། ཤེས་ཡོན་དང་འབྲེལ་བའི་ཚོགས་པ་ཁག་གི་སྐུ་ཚབ། སློབ་ཕྲུག་སོགས་ཁྱོན་མི་གྲངས་ ༡༣༠༠ ལྷག་ལྷན་འཛོམས་གནང་ཡོད་པ་དང་།

མཛད་སྒོའི་ཐོག་མར་བཀའ་ཟུར་བསྟན་པ་ཚེ་རིང་མཆོག་གིས། དེང་རབས་ཚན་རིག་དང་འཕྲུལ་རིག་ཡར་རྒྱས་ཕྱིན་པ་དང་མཉམ་དུ་མཐུན་རྐྱེན་དེ་དག་གིས་ཕྱི་དངོས་པོ་ལས་ཐོབ་པའི་བདེ་བ་ཕྲན་ཙམ་ཡོད་ནའང་ཕྲག་དོག་དང་འགྲན་སེམས། འཛམ་གླིང་འདིར་རྙོག་དྲ་དང་དྲག་སྤྱོད་སྤེལ་བ་སོགས་ཀྱང་བྱུང་གི་ཡོད་པས། ༧རྒྱལ་བ་རིན་པོ་ཆེ་མཆོག་གི་དགོངས་པ་བཞིན་ཕྱི་དངོས་པོའི་ཡར་རྒྱས་ཁོ་ནས་མི་འགྲིག་པར་མིའི་གཞི་རྩའི་རང་བཞིན་བྱམས་བརྩེ་དང་ལྡན་པ་དེ་ཡར་རྒྱས་གཏོང་ཐབས་ལ་ཚང་མའི་རྒྱབ་སྐྱོར་གནང་དགོས་པ་ཞིག་ཆགས་ཡོད་སྐོར་གསུང་བཤད་གནང་བ་དང་། 

དེ་ནས་རྒྱ་གར་གྱི་ཝ་ན་ཐེབས་རྩ་(Vana Foundation)གསར་འཛུགས་གནང་མཁན་སྐུ་ཞབས་ཝིར་སིང་ (Veer Singh) ལགས་ཀྱིསསཱི་ཤེས་ཡོན་སློབ་གསོའི་རྒྱུན་སྤྱོད་ལག་དེབ་བམ་ཀློག་བྱས་པ་ལས་བསླབ་གཞི་དེ་སྤུས་ཚད་ལྡན་པ་ཞིག་དང་། སློབ་གསོའི་ཁྱད་ནུས་ཡོད་པ། ལག་ལེན་དང་། རྒྱལ་སྤྱིའི་སྤྱོད་སྒོ་ཅན་དུ་བསྒྲིགས་ཡོད་པར་མཐོང་བ་དང་། དེ་ནི་༧གོང་ས་མཆོག་གི་བྱམས་སྙིང་རྗེ་དང་སེམས་འཁུར་སོགས་ཀྱི་དགོངས་པའི་ཉིང་བཅུད་གཅིག་ཏུ་བསྡུས་པ་ཞིག་ཡིན་སྐོར། སཱི་ཤེས་ཡོན་སློབ་གསོའི་རྒྱུན་སྤྱོད་ལག་དེབ་དེ་རྒྱ་གར་དུ་དབུ་འབྱེད་བྱས་པ་དེ་ནི་དགའ་སྤོབས་སྐྱེས་འོས་པ་ཞིག་ཡིན་པ་དང་། རང་ཉིད་རྒྱ་གར་བ་ཞིག་ཡིན་པའི་ཆ་ནས་༧གོང་ས་མཆོག་གིས་དུས་རྒྱུན་དུ་ང་ཚོའི་ཁྱད་དུ་འཕགས་པའི་གནའ་བོའི་ལམ་སྲོལ་དེ་ཉིད་རྒྱུན་སྐྱོང་བྱེད་རྒྱུའི་དྲན་སྐུལ་གནང་གི་ཡོད་པར་བཀའ་དྲིན་ཆེ་ཞུ་རྒྱུ་དང་། ཁོང་གིས་སྐུ་ཚེགས་ལ་མ་འཛེམ་པར་སྟོན་པ་ཤཱཀྱ་ཐུབ་པ་བཞིན་བཟང་ལེན་ངན་དོར་གྱི་ཕྱོགས་སུ་བསྐྱོད་རྒྱུའི་ཡར་སྐུལ་གནང་བར་བཀའ་དྲིན་ཆེ་ཞུ། ད་ལྟ་སཱི་ཤེས་ཡོན་སློབ་གསོ་ལག་བསྟར་བྱེད་རྒྱུ་དང་། ང་ཚོའི་མི་རབས་གཞོན་པ་རྣམས་ཀྱི་རྒྱུད་ལ་བཟང་སྤྱོད་ཀྱི་རིན་ཐང་འཇོག་རྒྱུའི་དུས་སྐབས་ལེགས་ཤོས་དེ་ཡིན་སྟབས། ཚང་མས་སཱི་ཤེས་ཡོན་སློབ་གསོ་འདི་རྒྱ་གར་དང་འཛམ་གླིང་ཧྲིལ་པོའི་ནང་ཁྱབ་སྤེལ་གཏོང་རྒྱུའི་འབོད་སྐུལ་ཞུ་རྒྱུ་ཡིན་པ་སོགས་གསུང་བཤད་གནང་།

དེ་རྗེས་ཨེ་མོ་རེ་གཙུག་ལག་སློབ་གཉེར་ཁང་གི་སློབ་དཔོན་རོ་བྷར་ཊི་ཕོལ་(Robert Paul) ལགས་ཀྱིས། འཛམ་གླིང་འདི་དཀའ་རྙོག་མང་པོའི་ནང་ཚུད་ཡོད་པ་དང་། དེ་དག་སེལ་ཐབས་ཀྱང་སྣ་མང་ཡོད་ཀྱང་། ཞི་བདེ་དང་ཡར་རྒྱས་ལ་ནུས་པ་ཆེས་ཆེ་ཤོས་ནི་བྱིས་པ་ཡིན་པ་དང་། མ་འོངས་པའི་འཛམ་གླིང་ཇི་ལྟ་བུ་ཞིག་ཏུ་འགྱུར་བའང་ཁ་ཚོའི་ཐག་གཅོད་རག་ལས་ཡོད་པའི་སྐོར་གསུང་བཤད་གནང་བ་དང་། དེ་བཞིན་དེ་གི་སྐབས་སུ་བྱམས་བརྩེ་དང་སྙིང་རྗེ། གཏོང་ཕོད་དང་བཟོད་བསྲན། བསམ་ཤེས་ལྡན་པ་བཅས་ནི་ད་ལྟའི་གཞོན་སྐྱེས་ཚོའི་ཁྲོད་ཉུང་དྲགས་པའི་དཀའ་ངལ་ཡོད་པ་ཀྱང་། ད་ལྟ་ནང་སེམས་ལ་འགྱུར་བ་གཏོང་བར་སློབ་གསོའི་ལམ་ལུགས་ནང་ལུས་སེམས་གཉིས་ཀ་ཡར་རྒྱས་གཏོང་ཐབས་སུ་ཤེས་བྱ་དང་སྤྱི་ཚོགས། སེམས་མྱོང་དང་བཟང་སྤྱོད་སོགས་མཉམ་འབྲེལ་གྱིས་འཚར་ལོངས་ཚད་ལྡན་བྱེད་ཐུབ་ཀྱི་ཡོད་སྐོར་གསུངས་རྗེས་༧གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་ནང་བསམ་བློའི་རིན་ཐང་གོང་མཐོར་གཏོང་ཐབས་སྐོར་གྱི་འདུ་འཛོམས་ཁག་དང་། དབུ་འབྱེད་མཛད་སྒོ་འདིས་གལ་གནད་ཆེ་བའི་བསླབ་གཞི་འདི་ལ་རེ་བ་ཆེ་བ་དང་། དེ་བཞིན་དགའ་སྤོབས་སྩལ་ཡོད་སྐོར་གཏམ་བཤད་གནང་། 

དེ་ནས་སཱི་ཤེས་ཡོན་སློབ་གསོའི་བསླབ་གཞི་གཏན་འབེབ་ལས་གཞིའི་ལག་བསྟར་འགན་འཛིན་འབུམ་རམས་པ་དགེ་བཤེས་བློ་བཟང་བསྟན་འཛིན་ལགས་ཀྱིས་སཱི་ཤེས་ཡོན་སློབ་གསོའི་སྐོར་ངོ་སྤྲོད་གནང་དོན། ཕྱི་ལོ་ ༡༩༩༨ ལོར་༧རྒྱལ་བ་རིན་པོ་ཆེ་མཆོག་གིས་ཨེ་མོ་རི་གཙུག་ལག་སློབ་གྲྭ་ཆེན་མོ་དང་བོད་དབར་གྱི་རིག་གཞུང་བརྗེ་ལེན་གྱི་ལས་གཞི་དབུ་འཛུགས་གནང་སྐབས། ཁོང་གིས་ཤེས་ཡོན་ནི་ལག་ཆ་ཙམ་ཞིག་ཡིན་པ་དང་། དེས་སྤྱི་ཚོགས་ལ་ཕན་ཐོགས་མིན་དེ་བེད་སྤྱོད་བྱེད་མཁན་ལ་རག་ལས་ཀྱི་ཡོད་པས། གལ་ཏེ་གཞན་གྱི་བདེ་སྡུག་ལ་སེམས་འཁུར་བྱེད་མཁན་དང་སྤྱི་ཚོགས་ལ་དོ་འཁུར་བྱེད་མཁན་གྱི་མི་བཟང་པོ་ཞིག་གི་ལག་ལ་ཤེས་ཡོན་ཡོད་ཚེ། དེས་མི་སྒེར་རང་ཉིད་ཙམ་མ་ཟད་སྤྱི་ཚོགས་དེ་ཡང་བདེ་སྐྱིད་ལྡན་པ་ཞིག་ཏུ་བསྐྲུན་ཐུབ་ཀྱི་ཡོད་པ་དང་། ད་ལྟ་ང་ཚོས་སེམས་བཟང་གི་ཤེས་ཡོན་སློབ་གསོ་དེ་འཁྲིད་ཐབས་ཡོད་སྟབས། ལུས་དང་སེམས་ཀྱི་ཤེས་ཡོན་གཉིས་མཉམ་འབྲེལ་བྱེད་དགོས་ཞེས་བཀའ་སློབ་ཕེབས་པ་ལྟར། འདས་པའི་ལོ་མང་རིང་ནས་ཨེ་མོ་རི་གཙུག་ལག་སློབ་ཆེན་དང་བོད་ཀྱི་དགོན་སྡེ་གཉིས་མཉམ་འབྲེལ་གྱི་ཐོག་ནས་བྱམས་བརྩེ་སོགས་ནང་བསམ་བློའི་རིན་ཐང་ཐོག་ལ་ཞིབ་འཇུག་བྱས་པ་རེད། དེ་ལྟར་བྱེད་དགོས་དོན་གཙོ་བོ་ནི་ནུབ་གླིང་གི་མཁས་པའི་ཁྲོད་ཀྱི་དེང་རབས་ཚན་རིག་དང་། རྒྱ་གར་དང་བོད་གཉིས་ཀྱི་སྲོལ་རྒྱུན་རིག་གཞུང་གཉིས་བར་བགྲོ་གླེང་ཡོད་ཆེད་དུ་རེད། ༧གོང་ས་མཆོག་ནས་ཨེ་མོ་རི་གཙུག་ལག་སློབ་གྲྭ་ཆེན་མོའི་ངོས་ནས་དེང་དུས་ཤེས་ཡོན་ལམ་སྲོལ་ནང་མིའི་ལྷན་སྐྱེས་ཀྱི་བཟང་སྤྱོད་ཀྱི་སློབ་གསོ་འཇུག་དགོས་པའི་དགོངས་ཚུལ་བཏོན་པ་བཞིན། ཨེ་མོ་རི་གཙུག་ལག་སློབ་ཆེན་གྱིས་ཁོང་གི་ཆོས་ལུགས་ཀྱི་མཚམས་ལས་འདས་པ་(Beyond Religion)ཞེས་པ་སོགས་ཕྱག་དཔེ་དང་གསུང་བཤད།  དེ་བཞིན་སེམས་ཁམས་རིག་པ་བ་གཞན་གྱི་དགོངས་ཚུལ་རྣམས་ལ་གཞི་བཅོལ་སྟེ་བསླབ་གཞི་འདི་གཏན་འབེབ་བྱས་པ་རེད། འདས་པའི་ལོ་བཞིའི་ནང་ཁྱོན་སློབ་གསོ་བ་ ༦༠༠ ལྷག་གིས་སཱི་ཤེས་ཡོན་སློབ་གསོའི་ཟབ་སྦྱོང་ནང་མཉམ་ཞུགས་བྱས་ཡོད་པ་དང་། དེ་དག་ཁྲོད་ནས་སློབ་གསོ་བ་ ༡༥༠ ལྷག་གིས་སཱི་ཤེས་ཡོན་སློབ་གསོའི་བསླབ་གཞི་ལ་རྒྱབ་སྐྱོར་དང་བསམ་ཚུལ་བཏོན་ཡོད་པ་དང་། ད་ལྟའི་ཆར་བསླབ་གཞི་དེར་རྒྱལ་སྤྱིའི་ཚོགས་སྡེ་དང་ལྟེ་གནས་མང་པོ་ཞིག་གིས་རྒྱབ་སྐྱོར་དང་མཉམ་འབྲེལ་གནང་གི་ཡོད། འདི་ལྟ་བུའི་གཞིས་རྒྱ་ཆེ་ཞིང་། དོན་དངོས་ཐོག་འཛམ་གླིང་ལ་ཕན་ནུས་བསྐྲུན་ཐུབ་པའི་ཤེས་ཡོན་གྱི་ལས་གཞི་འདིའི་ནང་ཞུགས་རྒྱུའི་གོ་སྐབས་ཐོབ་པར་དགའ་སྤྲོ་དང་ཆེ་མཐོང་ཞིག་ཏུ་རྩི་བཞིན་ཡོད་ལ། སཱི་ཤེས་ཡོན་སློབ་གསོའི་བསླབ་གཞི་གཏན་འབེབ་ཚོགས་ཆུང་གིས་༧གོང་ས་མཆོག་གཙོས་པའི་ཨེ་མོ་རི་གཙུག་ལག་སློབ་གྲྭ་དང་སློབ་སྟོན་པ་ཡོངས་ལ་བཀའ་དྲིན་ཆེ་ཞུ། ཞེས་སོགས་གསུང་བཤད་གནང་བ་དང་།

དེ་ནས་རྒྱལ་ས་ལྡི་ལིའི་སྲིད་བློན་གཞོན་པ་དང་ཤེས་རིག་བློན་ཆེན་གཅིག་ལྕོགས་མཱ་ནི་ཤི་སི་སོ་དྷི་ཡ་(Manish Sisodia)མཆོག་གིས། དེང་སྐབས་འཛམ་གླིང་ནང་དྲག་སྤྱོད་དང་སྡང་སེམས་སོགས་ལས་བྱུང་བའི་དཀའ་ངལ་ཁག་གཞུང་གིས་ཉིན་རེར་ཉོས་པའི་མཚོན་ཆ་དང་ཁྲིམས་གཏན་འབེབ་བྱས་པ་བཅས་བརྒྱུད་ནས་སེལ་ཐབས་བྱེད་ཀྱི་ཡོད་ཀྱང་། མིའི་རིགས་དང་རང་བྱུང་ཁམས་ལ་སྔར་བཞིན་ཛ་ཇེ་དྲག་ཏུ་འགྲོ་བཞིན་ཡོད་པས། བསླབ་གཞི་འདི་ནི་དེང་སྐབས་ཀྱི་འཛམ་གླིང་ནང་ལེགས་སྐྱེས་ཆེ་ཤོས་དང་། མིའི་རིགས་གཅིག་མཚུངས་ངང་གནས་ཐབས། དྲག་སྤྱོད་དང་སྡང་སེམས་ལས་བྱུང་བའི་དཀའ་ངལ་ཁག་སེལ་བའི་ཐབས་ལམ་ཁོ་ན་ཡིན་པ། བསླབ་གཞི་འདིའི་གཏན་འབེབ་ཀྱི་བརྒྱུད་རིམ་ཁྲོད་བསམ་ཚུལ་བརྗེ་རེས་དང་བསླབ་གཞིའི་ལག་དེབ་སྔོན་འབྱོར་བྱུང་བའི་སྟབས་ཀྱིས། བསླ་གཞི་འདི་ཚན་རིག་དང་མཐུན་པ་རེད། ལོ་གཅིག་གི་སྔོན་ནས་བཟུང་ལྡི་ལིའི་གཞུང་གི་སློབ་གྲྭ་ཁག་ ༡༠༠༠ ཙམ་གྱི་ནང་། སློབ་ཕྲུག་འབུམ་ ༡༥ ཙམ་དང་དགེ་རྒན་ཁྲི་ ༢ ཙམ་གྱིས་༧གོང་ས་རྒྱལ་བ་རིན་པོ་ཆེ་མཆོག་གི་ལམ་སྟོན་བཞིན་ཉིན་རེའི་ཞོགས་པར་བདེ་སྐྱིད་ཀྱི་སློབ་ཚན་ (Happiness Curriculum) ཟེར་བ་ཞིག་སློབ་འཁྲིད་བྱེད་བཞིན་ཡོད་པ་དང་། དེར་གྲུབ་འབྲས་རྒྱ་ཆེན་པོ་བྱུང་ཡོད་པས་སློབ་ཕྲུག་གི་དགེ་རྒན་དང་ཕ་མ་སོགས་ཀྱིས་བསྟོད་བསྔགས་རྒྱ་ཆེན་ཐོབ་ཀྱི་ཡོད་པས། འཛམ་གླིང་གི་རྒྱལ་ཁབ་ཁག་ཚང་མའི་ནང་བདེ་སྐྱིད་ཀྱི་བསླབ་གཞི་དང་སྤྱི་ཚོགས་དང་སེམས་མྱོང་། བཟང་སྤྱོད་བཅས་ཀྱི་བསླབ་གཞི་གཉིས་གང་རུང་མགྱོགས་པོར་གཏན་འབེབ་ཡོང་བའི་རེ་བ་ཞུས་པ་ལྟར། ༧གོང་ས་མཆོག་གི་གཙོས་ཐེངས་འདིའི་བསླབ་གཞི་གཏན་འབེབ་ནང་དངོས་ཤུགས་བརྒྱུད་གསུམ་ནས་ལས་ཀ་བྱེད་མཁན་ཚང་མར་ཐུགས་རྗེ་ཆེ་ཞུ། ཞེས་དང་། 

དེ་ནས་ཕྲུ་གུའི་ངལ་རྩོལ་ལམ་སྲོལ་ལ་ངོ་རྒོལ་གནང་མཁན་དང་ནོ་བྷེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་ས་ཏི་ཡར་ཐི་(Kailash Satyarthi) མཆོག་གིས། ཁོང་རང་གི་ལས་འགུལ་དང་འབྲེལ་ནས་སཱི་ཤེས་ཡོན་སློབ་གསོའི་གལ་གནད་སྐོར་ལ་ཁོང་གིས།  ང་ལ་ནོ་བྷེལ་ཞི་བདེའི་གཟེངས་གནང་རྒྱུའི་ཡོངས་ཁྱབ་གསལ་བསྒྲགས་བྱེད་སྐབས། ངའི་གྲོགས་པོ་དང་གསར་འགོད་པ་འགའ་ཤས་ཀྱིས། ཀེ་ལ་ཤི་ལགས་ཁྱེད་རང་འཛམ་གླིང་གི་ཁྱད་དུ་འཕགས་པའི་བཟང་སྤྱོད་ཀྱི་དབུ་འཁྲིད་ལྷན་དུ་མཉམ་ཞུགས་བྱེད་རྒྱུ་རེད་ཅེས་བརྗོད་བྱུང་། ངས་ང་བློ་གྲོས་ལྡན་པའི་བྱིས་པ་གཉིས་དང་ལྷན་དུ་མཉམ་ཞུགས་བྱ་རྒྱུ་ཡིན་ཞེས་ལན་འདེབས་བྱས་པ་ཡིན། དེར་ཁོ་ཚོས་ཁྱེད་ཀྱི་མི་ཚེ་ཧྲིལ་པོ་བྱིས་པའི་ལྷན་དུ་བཞུགས་ཡོད་ལ། སྤྱོད་པ་དག་ཀྱང་བྱིས་ཚུལ་ལྟར་ཡིན་པས། ཁྱེད་ཀྱིས་བརྗོད་པའི་བྱིས་པ་གཉིས་དེ་སུ་རེད་ཅེས་དྲིས་པར་ངས། གཅིག་ནི་ཡེ་ཤུའི་ཆོས་དཔོན་ཌེ་སི་མན་ཊུ་ཊུ་དང་། གཅིག་ཤོས་དེ་༧གོང་ས་མཆོག་རེད་ཅེས་ལན་འདེབས་བྱས་པ་ཡིན། ཞེས་དང་།  ང་ལ་མཚོན་ན་བྱིས་དུས་ནི་བྱིས་དུས་ཤིག་མིན་པར། དེ་ནི་ཕྱི་གསལ་ནང་གསལ་དང་། བདེན་པ། བཟོད་གསོལ། གསར་པ་ཞིག་སྦྱངས་འདོད་ཀྱི་འདུན་པ་བཅས་ཡིན། སཱི་ཤེས་ཡོན་སློབ་གསོས་ད་ལྟ་ངས་ཤེས་ཡོན་ལམ་སྲོལ་ལ་འཛིན་པའི་ལྟ་ཕྱོགས་དེར་འགྱུར་བ་གཏོང་བའི་རེ་བ་བྱེད་ཀྱི་ཡོད། ཕྲུ་གུ་རྣམས་བཙའ་སྐབས་དྭངས་གཙང་ལྷད་མེད་ཅིག་ཡིན་ཡང་ཡར་སོན་དུས་ཤེས་ཡོན་ཀྱི་རྐྱེན་པས་བཅོས་མའི་ངོ་བོ་དང་། ཆོས་ལུགས་དང་མི་རིགས་སོགས་དབྱེ་འབྱེད་ཀྱི་བསམ་ཚུལ་ཡོད་མཁན་ཞིག་ཏུ་འགྱུར་འགྲོ་ཡི་ཡོད། དེར་བརྟེན། ང་ཚོས་བཟང་སྤྱོད་ཀྱི་བསླབ་གཞི་འདི་བརྒྱུད་ནས་ཕྲུ་གུའི་ནང་སེམས་ཀྱི་རང་གཤིས་དེ་བསྐྱར་གསོ་ཡོང་ཐབས་དང་། དགེ་རྒན་རྣམས་ལ་སྦྱོང་བརྡར་སྤྲོད་དགོས་པ་དང་། དེ་བཞིན་ཕྲུ་གུ་རྣམས་ལ་བྱམས་བརྩེའི་སློབ་གསོ་སྤྲད་པ་ཙམ་མ་ཡིན་པར། ཕྲུ་གུའི་ས་ནས་བྱམས་བརྩེ་ཇི་ལྟར་སྦྱོང་དགོས་མིན་ཡང་ཤེས་པར་བྱེད་དགོས། ངས་འདས་པའི་ལོ་ ༥༠ ལྷག་གི་རིང་ནས་ཕྲུ་གུའི་ས་ནས་སློབ་སྦྱོང་བྱེད་ཀྱི་ཡོད། ཅེས་དང་།

དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། བཀུར་འོས་ཆོས་གྲོགས་ཕོ་མོ་རྣམ་པ།  ངོས་རང་ཉིད་ཀྱང་འགྲོ་བ་མི་འཐེར་འབུམ་བདུན་ཡོད་ཁོངས་ནས་གཅིག་ཡིན།  དེར་བརྟེན་འགྲོ་བ་མི་རིགས་སྤྱིའི་བདེ་ཐབས་ལ་དམིགས་ནས་ལྷན་ཚོགས་འདི་ལྟ་བུར་བཅར་རྒྱུ་བྱུང་བར་ཧ་ཅང་དགའ་པོ་བྱུང་།  འཛམ་གླིང་ཆགས་རྗེས་རིམ་བཞིན་སྲོག་ཆགས་ཐོག་མར་བྱུང་སྐབས་ནུ་ཞོའི་སེམས་ཅན་ཁྲོད་རྙོག་གྲ་མང་ཤོས་བཟོ་མཁན་མི་ཆགས་ཡོད། སྤྱིར་སྲོག་ཆགས་གཞན་ཚོར་ཡང་རང་གཅེས་འཛིན་གྱི་བསམ་བློར་བརྟེན་པའི་ཆགས་སྡང་གི་བློ་ཡོད། སྐབས་རེ་རླུང་ལངས་ནས་གནོད་འཚེ་ཕྲན་བུ་བྱེད་རེས་བྱེད་ཀྱི་ཡོད། ང་ཚོ་འགྲོ་བ་མིར་མཚོན་ན་མིའི་རྣམ་དཔྱོད་ལ་བརྟེན་ནས་གནོད་འཚེ་ཧ་ཅང་ཆེན་པོ་བཟོ་བཞིན་ཡོད། འོན་ཀྱང་རྣམ་དཔྱོད་དེ་ལ་བརྟེན་ནས་རླབས་ཆེན་གྱི་བྱ་བ་མང་པོ་ཞིག་བསྒྲུབ་ཐུབ་བཞིན་ཡོད།

ངོས་ཀྱིས་གོང་དུ་བརྗོད་མ་ཐག་པ་ལྟར་གལ་ཏེ་མིའི་རྣམ་དཔྱོད་དེ་བེད་སྤྱོད་ལོག་པ་བཏང་བ་ཡིན་ན་གཏོར་བཤིག་ཚབས་ཆེ་བྱེད་ཐུབ། གཞི་རྩའི་མིའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་རེད། ཧ་ཅང་ཡག་པོ་ཡོད། དཔེ་མཚོན་ཞིག་གཞག་པ་ཡིན་ན། ངོས་ཀྱི་དཔའ་བོ་འདིར་ཕེབས་པ་སྐུ་ཞབས་རི་ཆཌ་མོར་ཁོང་བྱང་ཕྱོགས་ཨ་ཡིར་ལེན་དུ་ཆུང་དུས་ཨིན་ཇིའི་དམག་མི་ཞིག་གིས་ཟིང་འཁྲུག་ཞོད་འཇག་ཆེད་འགྱིག་མདེལ་བརྒྱབ་སྟེ་མིག་གཉིས་ཀ་ལོང་བ་རེད།  དྲན་པ་ལས་ཡར་གསོ་སྐབས་ཁོང་གི་བསམ་བློ་ཐོག་མ་དེ་ཞེ་སྡང་དང་འཁོན་སེམས་མིན་པར་རང་ཉིད་ཀྱི་ཨ་མ་ལགས་ཀྱི་ཞལ་རས་མཇལ་ཐུབ་ཀྱི་མ་རེད་བསམས་པའི་བསམ་བློ་འཁོར་འདུག  ངོ་མཚར་ལྡན་པ་རེད།  ངོ་མཚར་ལྡན་པ་རེད།  རང་ཉིད་ལོང་བ་བཟོ་མཁན་ཨིན་ཇིའི་དམག་མི་དེར་འཁོན་འཛིན་ནམ་ཡང་བཅང་མེད།  མཐར་ཁོང་གཉིས་གྲོགས་པོ་བློས་ཐུབ་ཆགས་ཐུབ་ཡོད། དེས་གང་མཚོན་བཞིན་ཡོད་པ་བརྗོད་ན་འགྲོ་བ་མིའི་གཞི་རྩའི་རང་བཞིན་དེ་བྱམས་བརྩེའི་རང་བཞིན་ཡིན་པ་གསལ་པོར་མཚོན་པ་རེད། 

དེང་སྐབས་ཚན་རིག་པ་ཚོས་ཀྱང་འགྲོ་བ་མིའི་གཞི་རྩའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཡིན་སྐོར་བཤད་ཀྱི་ཡོད།  ང་ཚོ་སྤྱི་ཚོགས་ལ་བརྟེན་པའི་སེམས་ཅན་རེད།  རང་ཉིད་འཚོ་བར་གཞན་གྱི་བྱམས་བརྩེ་ལ་མཐའ་གཅིག་ཏུ་བརྟེན་དགོས་པ་རེད།  ཐོག་མར་ཆུང་བྱིས་པའི་དུས་སུ་མའི་བྱམས་བརྩེར་བརྟེན་དགོས་པ་དང་།  ན་ཚོད་ཡར་རྒས་སྐབས་གྲོགས་པོ་གྲོགས་མོའི་བྱམས་བརྩེའི་འབྲེལ་བར་བརྟེན་དགོས།  གོང་དུ་གསུང་བཤད་གནང་བ་ལྟར་ཕྲུ་གུ་ཚོར་ཤེས་ཡོན་སློབ་སྦྱོང་སྤྲོད་འགོ་འཛུགས་སྐབས་བཟང་སྤྱོད་དེ་དག་ཐོག་དོ་སྣང་གང་ཡང་བྱེད་ཀྱི་མེད། དེང་དུས་ཤེས་ཡོན་སློབ་སྦྱོང་དེ་གཙོ་བོ་ཕྱི་དངོས་པོའི་དཔལ་འབྱོར་མཐུན་རྐྱེན་གོང་འཕེལ་གཏོང་ཐབས་ལ་དམིགས་བཞིན་ཡོད། དེར་བརྟེན་བྱིས་པའི་བློ་ལྷན་སྐྱེས་སུ་ཡོད་པའི་བྱམས་བརྩེའི་བསམ་བློ་དེ་རིམ་བཞིན་བག་ལ་ཉལ་བའི་ཚུལ་དུ་གནས་བཞིན་ཡོད། ལྷན་སྐྱེས་སུ་ཡོད་པའི་བྱམས་བརྩེའི་བློ་དེ་བག་ལ་ཉལ་བའི་ཚུལ་དུ་གནས་ནས་ཕྱི་དངོས་པོའི་མཐོན་སྐྱེས་ལ་དང་དོད་ཤུགས་ཆེ་བྱས་པར་བརྟེན། 

འདོད་ཡོན་བསྒྲུབ་ཆེད་མིའི་ཕུལ་བྱུང་གི་རྣམ་སྤྱོད་ཚུལ་མིན་སྤྱོད་བྱེད་ནས་གཏོར་བཤིག་ཚབས་ཆེ་བཟོ་བཞིན་ཡོད། མིའི་རྣམ་དཔྱོད་དེ་སྨོན་ལམ་བརྒྱབ་ནས་ལེགས་པའི་ཆ་ཞིག་བཟོ་མ་ཐུབ།  རྒྱུ་མཚན་ལ་བརྟེན་ནས་རྣམ་དཔྱོད་དེ་ལེགས་པའི་ཆ་ཞིག་ཏུ་འགྱུར་ཐུབ།  ཐོག་མར་རིག་པའི་ལམ་ནས་དཔྱད་པ་བྱས་ཏེ་ཉོན་མོངས་དང་འབྲེལ་བའི་ཚུལ་མིན་གྱི་བློ་དེ་དག་ལ་གཉེན་པོ་བསྟེན་ཐུབ།  འཕྲལ་གསལ་ཆགས་སྡང་གི་བློ་དེ་དག་གིས་རང་ཉིད་སྲུང་སྐྱོབ་བྱས་པ་ལྟ་བུར་སྣང་ཡང་དོན་དངོས་ཉོན་མོངས་པའི་བློ་དེ་དག་གིས་རང་ཉིད་ཕུང་ལ་སྦྱར་རྒྱུ་རེད།  མིའི་རྣམ་དཔྱོད་ཀྱི་ཤེས་རབ་ལ་བརྟེན་ནས་བསམ་བློ་ལེགས་ཉེས་དབྱེ་འབྱེད་ཐུབ་པ་མ་ཟད། འཕྲལ་དང་ཕུགས་ཀྱི་ཁེ་ཕན་ཡང་གསལ་པོར་རྟོགས་ཐུབ།  དེར་བརྟེན་མིའི་རྣམ་དཔྱོད་ལ་བརྟེན་ནས་ཕྱོགས་ཡོངས་ཀྱི་གནས་ཚུལ་རྟོགས་ཐུབ། མིའི་རྣམ་དཔྱོད་ཀྱི་ཤེས་རབ་ལ་བརྟེན་ནས་དངོས་ཡོད་གནས་ཚུལ་རྟོགས་ཐུབ་པ་ལས་ཉོན་མོངས་པའི་གཞན་དབང་དུ་སོང་བའི་བླ་དེས་དངོས་ཡོད་གནས་ཚུལ་རྟོགས་མ་ཐུབ། 

དཔེར་ན་ཁོང་ཁྲོའི་བློ་སྐྱེ་སྐབས་འཕྲལ་ཙམ་མ་གཏོགས་ཕུགས་རྒྱང་རིང་པོའི་བསམ་བློ་འཁོར་མ་ཐུབ། ལྷག་པར་དེང་སྐབས་ཚད་རྡུལ་དངོས་ཁམས་རིག་པ་དང་རྒྱ་གར་གནའ་རབས་ཀྱི་ལྟ་གྲུབ་དེ་དག་ལས་ཀྱང་ཁོང་ཁྲོའི་གཞན་དབང་དུ་གྱུར་བའི་བློ་དེར་གཞན་མི་སྡུག་པ་མཐོང་སྐབས་དེ་འདྲའི་མི་སྡུག་པའི་ཆ་ཤས་བརྒྱ་ཆ་བརྒྱ་ནས་དགུ་བཅུ་རྣམ་རྟོག་གིས་སྒྲོ་བཏགས་པ་ལས་བྱུང་སྐོར་གསུང་ཡོད།  རྣམ་དཔྱོད་ཤེས་རབ་དེས་བརྟག་དཔྱད་ཡག་པོ་བྱེད་པ་ཡིན་ན་ཁོང་ཁྲོ་ལངས་པའི་སྐབས་མི་སྡུག་པའི་ཆོས་ཇི་ལྟར་སྣང་བ་ལྟར་གྲུབ་མེད་པ་དེ་གསལ་རྟོགས་ཐུབ་རྒྱུ་རེད།  ཤེས་ཡོན་ལམ་བརྒྱུད་མིའི་རྣམ་དཔྱོད་དང་བྱམས་བརྩེ་ཟུང་འབྲེལ་ཐོག་ནས་བསམ་བློ་ཇེ་བཟང་དུ་གཏོང་རྒྱུ་ཧ་ཅང་གལ་ཆེན་པོ་རེད།  དེར་བརྟེན་དེ་རིང་ཨེ་མོ་རི་མཐོ་སློབ་ཀྱིས་གཙོས་འབྲེལ་ཡོད་ཚོས་འགན་ཁུར་གནང་བར་ཡི་རང་བསྔགས་བརྗོད་ཞུ་རྒྱུ་ཡིན།  དེ་རིང་དབུ་འབྱེད་བྱས་པ་དེ་ལ་བརྟེན་ནས་བདུན་ཕྲག་གཅིག་ནང་ཚུད་ལ་གྲུབ་འབྲས་འདི་ཡིན་ཞེས་སྟོན་རྒྱུ་ཁག་པོ་ཡིན་ཡང་མ་འོངས་པར་སྤྱི་ཚོགས་བྱམས་བརྩེ་ལྡན་པ་ཞིག་ཡོང་རྒྱུར་ཕན་ཐོགས་ཡོང་ངེས་ཡིན།  ཞེས་སོགས་ཀྱི་བཀའ་སློབ་སྩལ་ཡོད།