རྒྱུད་ཆེན་ཡབ་སྲས་གསུམ་གྱི་རྗེས་དྲན་བགྲོ་གླེང་ལ་ཆིབས་བསྒྱུར་བསྐྱངས་པ། 

མདུན་ངོས། / རྒྱུད་ཆེན་ཡབ་སྲས་གསུམ་གྱི་རྗེས་དྲན་བགྲོ་གླེང་ལ་ཆིབས་བསྒྱུར་བསྐྱངས་པ། 

༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༢ ཉིན་གྱི་སྔ་དྲོ་ཆུ་ཚོད་༩།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཞུགས་སྒར་ཕོ་བྲང་ནས་རྡ་རམ་ས་ལའི་ཉེ་ཁུལ་དུ་ཡོད་པའི་དཔལ་ལྡན་རྒྱུད་སྟོད་གྲྭ་ཚང་གིས་ཇི་ལྟར་གསོལ་བ་བཏབ་པ་ལྟར། ཁམས་གསུམ་ཆོས་ཀྱི་རྒྱལ་པོ་ཤར་ཙོང་ཁ་པ་ཆེན་པོ་མཆོག་བར་དོ་ལོངས་སྤྱོད་རྫོགས་པའི་སྐུ་མངོན་དུ་བྱས་ནས་ལོ་དྲུག་བརྒྱ་འཁོར་བ་དང་། རྗེ་བླ་མ་ཙོང་ཁ་པ་ཆེན་པོས་རྒྱུད་ཆེན་ཤེས་རབ་སེངྒེ་དཔལ་བཟང་པོ་མཆོག་ལ་རྒྱུད་འགྲེལ་ཆེན་མོའི་གླེགས་བམ་གནང་སྟེ་གསང་སྔགས་ཀྱི་བསྟན་པའི་བདག་པོར་མངའ་གསོལ་ནས་ལོ་དྲུག་བརྒྱ་འཁོར་བ། དེ་བཞིན་རྒྱུད་ཆེན་རྡོ་རྗེ་འཆང་༸རྗེ་བཙུན་ཀུན་དགའ་དོན་གྲུབ་དཔལ་བཟང་པོ་མཆོག་འཁྲུངས་ནས་ལོ་དྲུག་བརྒྱ་འཁོར་བའི་རྒྱུད་ཆེན་རྗེས་དྲན་གྱི་བགྲོ་གླེང་ཚོགས་མགོན་དུ་ཆིབས་བསྒྱུར་བསྐྱངས་ཡོད་པ་རེད། 

དེ་ཡང་དཔལ་ལྡན་རྒྱུད་སྟོད་གྲྭ་ཚང་དུ་ཕེབས་བསུ་ཟབ་རྒྱས་དང་བཅས་གཙུག་ལག་ཁང་དུ་ཆིབས་བསྒྱུར་གྱིས་རྒྱུད་ཆེན་རྗེས་དྲན་ཆེད་གསར་བཞེངས་གནང་བའི་སྐུ་གསུང་ཐུགས་རྟེན་རྣམས་ལ་རབ་གནས་བྱིན་འབབས་གནང་བ་དང་། དེ་ནས་བཞུགས་ཁྲིར་༸ཞབས་སོར་འཁོད་མཚམསམཎྚལ་རྟེན་གསུམ་འདེགས་འབུལ་དང་། རྗེ་བཙུན་ཀུན་དགའ་དོན་གྲུབ་ཀྱི་སྣང་བརྙན་འབུལ་ལམ་ཞུས་རྗེས་སྔགས་རིམ་ཆེན་མོ་སོགས་ཕྱག་དཔེ་དབུ་འབྱེད་དང་། སྟོད་རྒྱུད་གྲྭ་ཚང་གིས་མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་གྱི་མཚོན་རྟགས་སུ་རིན་ཆེན་གཉིས་པ་ལས་གྲུབ་པའི་འཁོར་ལོ་རྡོར་དྲིལ་གྱིས་བརྒྱན་པའི་དྲན་རྟེན་དང་། སྐྱབས་འོག་རྒྱུད་ཟུར་ཐུན་མོང་ནས་རིན་ཆེན་གཉིས་པ་ལས་གྲུབ་པའི་ཚེ་བུམ་རྒྱལ་བ་ཚེ་དཔག་མེད་པའི་སྣང་བརྙན་གྱིས་བརྒྱན་པ་འབུལ་ལམ་ཞུས་མཚམས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། 

དེ་རིང་འདིར་གསང་ཆེན་རྒྱུད་གྲྭ་རྣམ་གཉིས་ཞེས་སྨད་རྒྱུད་དང་སྟོད་རྒྱུད་རེད། དེ་རིང་གདན་ས་ལ་རུབ་རུབ་བྱེད་རྒྱུ་བྱུང་བ་རེད། ཁྱེད་རང་ཚོས་ཤོག་གསུངས་པ་རེད། ཐུགས་རྗེ་ཆེ་ཞུ་རྒྱུ་ཡིན། རྗེ་རིན་པོ་ཆེས་སེ་ར་ཆོས་སྡིངས་ལ་རྒྱུད་འགྲེལ་ཆེན་མོ་གསུངས་ནས་རྗེས་ལ་འདི་བཤད་སྒྲུབ་གཉིས་ཀྱི་ཐོག་ནས་འཛིན་མཁན་སུ་ཡོད་དམ་ཞེས་བཀའ་འདྲི་གནང་བ་རེད། རྒྱལ་མཆོག་ཐམས་ཅད་མཁྱེན་པ་དང་། མཁས་གྲུབ་རིན་པོ་ཆེ་སོགས་འགྲན་ཟླ་བྲལ་བའི་སློབ་མ་ཚོ་དེར་ཡོད་ཀྱང་གང་ཡང་མ་གསུངས་པ་རེད། དགོས་པ་ཡོད་ཀྱི་རེད། རྗེ་བཙུན་ཤེས་རབ་སེང་གེ་ཡར་བཞེངས་ནས་རྒྱུད་བཤད་སྒྲུབ་གཉིས་ཀྱི་ཐོག་ནས་ཐོས་བསམ་སྒོམ་གསུམ་དང་འབྲེལ་བའི་ཐོག་ནས་བསྟན་པ་འཛིན་མཁན་ངས་བྱེད་ཀྱི་ཡིན་ཞེས་ཞལ་བཞེས་གནང་བ་རེད། རྗེ་རིན་པོ་ཆེ་ཧ་ཅང་ཐུགས་དགྱེས་པོ་བྱུང་ནས་རྒྱུད་འགྲེལ་ཆེན་མོ་རྗེ་བཙུན་ཤེས་རབ་སེང་གེའི་ཕྱག་ལ་གནང་བ་རེད། 

རྗེས་ལ་རྒྱུད་ཆེན་ཀུན་དགའ་དོན་གྲུབ་ཐུན་མོང་སྣང་ངོར་ཏོག་ཙམ་རྙོག་དྲ་བྱུང་བས་ཟུར་དུ་ཕེབས་ནས་དཔལ་ལྡན་སྟོད་རྒྱུད་གྲྭ་ཚང་ཟེར་བ་དེ་ཚུགས་པ་རེད། གང་ལྟར་གཙང་ལ་ལྷུན་པོ་རྩེ་གཡག་ཤི་ལུང་པ་ཟེར་བ་ཅིག་ཡོད་པ་མིན་ནམ། གཡག་ཤི་སར་རྟ་འཁྲབ་དགོས་པ་རེད་གསུངས་ནས་གཙང་གི་སྲད་རྒྱུད་ཚུགས་པ་རེད། དེ་ནས་དབུས་ཀྱི་རྒྱུད་གྲྭ་གཉིས་བཅས་ཀྱིས་རྗེའི་བསྟན་པ་སྤྱི་དང་གསང་སྔགས་ཀྱི་བསྟན་པ་འཛིན་མཁན་གཙོ་བོ་ཆགས་ཡོད་པ་རེད། གསང་སྔགས་ཀྱི་ནང་ནས་གསང་བ་འདུས་པ་གཙོ་བོ་རེད། གསང་བ་འདུས་པ་དཔལ་མགོན་འཕགས་པ་ཀླུ་སྒྲུབ་རང་ཉིད་ཀྱིས་བསྐྱེད་རིམ་གྱི་རྣམ་གཞག་སྟོན་པ་མདོར་བྱས་མཛད། དེ་རྒྱུད་ཀྱི་ཁུངས་སུ་འབྲེལ་བ་ལ་མདོ་བསྲེས་གསུངས། དེ་ནས་རྫོགས་རིམ་སྐོར་ལ་ཀླུ་སྒྲུབ་རང་གིས་རིམ་ལྔ་མཛད་ཡོད། ཨརྱ་དེ་བས་རིམ་ལྔའི་དོན་འགྲེལ་གཅེས་བསྡུས་མཛད་ཡོད། དེ་རྗེས་སློབ་དཔོན་ཟླ་བ་གྲགས་པས་རྒྱུད་འགྲེལ་ཆེན་མོ་མཛད་ནས་གསང་བ་འདུས་པ་གཙོ་བོ་རེད། མིང་ལའང་གསང་འདུས་གྲྭ་ཚང་ཞེས་ཐོགས་ཡོད་པ་ཞིག་བྱུང་བ་རེད། གསང་སྔགས་གསར་མའི་བསྟན་པ་འཛིན་མཁན་གཙོ་བོ་ཆགས་ཡོད་པ་རེད། ཅེས་སོགས་བཀའ་སློབ་སྩལ་རྗེས་གཏང་རག་མཎྚལ་ཕུལ་བ་དང་། 

དེ་ནས་རྒྱུད་སྟོད་གྲྭ་ཚང་གི་མཁན་རིན་པོ་ཆེ་ཐུབ་བསྟན་བསྟན་འཛིན་མཆོག་གིས་མཛད་སྒོ་ངོ་སྤྲོད་གསུང་བཤད་དང་། དགའ་ལྡན་ཁྲི་རིན་པོ་ཆེ་མཆོག་གསུང་བཤད་རིམ་པར་གནང་རྗེས་སླར་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཀའ་སློབ་སྩལ་དོན། 

ཁྱེད་རང་ཚོས་བརྟན་བཞུགས་གནང་གི་ཡོད་པ་རེད། བོད་མི་སྤྱི་བོ་གནམ་བསྟན་ཡོངས་རྫོགས་ཀྱིས་༸རྒྱལ་བ་རིན་པོ་ཆེ་ཚེ་རིང་པོ་ཡོང་བར་ཤོག་ཅེས་སྨོན་ལམ་རྒྱག་བཞིན་ཡོད་པ་རེད། ལྷག་པར་དུ་གཞིས་ལུས་རྒྱ་ཆེའི་མི་མང་གིས་ཧ་ཅང་སེམས་ཤུགས་བསྐྱེད་ནས་དད་པ་དང་ཞེན་ཁོག་ཧ་ཅང་ཆེན་པོ་འདུག འཛམ་གླིང་འདིའི་སྒང་དུའང་ངོས་ལ་དགའ་བོ་བྱེད་མཁན་ཧ་ཅང་མང་པོ་རེད། ངོས་ཀྱིས་སྨོན་ལམ་འདི་རྒྱག་བཞིན་ཡོད། ས་སོགས་འབྱུང་བ་ཆེན་པོ་དང༌།། ནམ་མཁའ་བཞིན་དུ་རྟག་པར་ཡང༌།། སེམས་ཅན་དཔག་ཏུ་མེད་པ་ཡི།། རྣམ་མང་ཉེར་འཚོའི་གཞིར་ཡང་ཤོག། ཅེས་སྤྱོད་འཇུག་ལས་གསུངས་པ་ལྟར་རྒྱུན་དུ་སྨོན་ལམ་རྒྱག་བཞིན་ཡོད། གང་ལ་གང་འཚམ་གྱིས་ཕན་ཐོགས་ཡོང་ཐུབ་པ་ཞིག་མིག་མཐོང་ལག་ཟིན་ལ་འདུག དེར་བརྟེན། ཇི་སྲིད་ནམ་མཁའ་གནས་པ་དང༌།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་ཉིན་རེ་བཞིན་ནམ་མཁའ་མ་ཟད་ཀྱི་བར་དུ་གཞན་དོན་སྒྲུབ་པའི་སེམས་བསྐྱེད་བཞིན་ཡོད། མི་ཚེ་འདིར་ཁ་ཡོད་ལག་ཡོད་ཀྱིས་མི་མང་པོ་ཞིག་ལ་ཕན་ཐོགས་ཡོང་བ་ཞིག་བྱེད་བཞིན་ཡོད་པས་མ་འོངས་པར་ཡོང་བ་ལ་སྨོན་ལམ་བརྒྱབ་པ་ཙམ་མ་ཡིན་པར། ད་ལྟ་ཁ་ཡོད་ལག་ཡོད་ཀྱིས་བོད་མི་གཙོ་བོར་གྱུར་པའི་འཛམ་གླིང་འདིའི་སྒང་གི་མི་མང་པོ་ཞིག་གིས་ངོས་ལ་བློ་གཏད་ནས་དགའ་བོ་བྱེད་བཞིན་ཡོད་པ་རེད། དེར་བརྟེན། ཅི་ཙམ་གྱིས་ཚེ་རིང་དུ་གནས་བ་དེའི་ཚོད་ཀྱིས་གཞན་ཕན་གྱི་བྱ་བ་སྒྲུབ་ཐུབ་པ་ཞིག་ཡིན་པས་སྙིང་སྟོབས་བསྐྱེད་བཞིན་ཡོད། མཁྱེན་སོང་ངམ། ལོ་བརྒྱ་དང་བཅུ་གྲངས་ཤིག་ལ་ཕལ་ཆེར་སྡོད་ཐུབ་པ་ཞིག་ལ་དཔལ་ལྡན་ལྷ་མོའི་ལུང་བསྟན་ཞིག་ཀྱང་སྔོན་མ་ནས་བཤད་བཞིན་ཡོད། ཕལ་ཆེར་ལོ་བརྒྱ་དང་བཅུ་གྲངས་ཤིག་སྡོད་ཐུབ་པ་ཞིག་ལ་སྨོན་ལམ་རྒྱག་གི་ཡོད་ལ་སྙིང་སྟོབས་བསྐྱེད་བཞིན་ཡོད།  ཕལ་ཆེར་ཚེ་རིང་པོར་གནས་ཀྱི་རེད། 

བོད་ཀྱི་སངས་རྒྱས་ཀྱི་བསྟན་པ་དང་དེ་བཞིན་བོད་རྒྱ་ཆེའི་མི་མང་གི་སྙིང་སྟོབས་རྣམས་ང་ཚོ་རང་དབང་ལུང་པར་ཡོད་པ་ཚོས་དེ་དག་གི་ཚབ་བྱས་ཏེ་བྱེད་བཞིན་ཡོད་པ་རེད། ད་ལྟའི་བར་དུ་ཧུར་ཐག་བྱས་པ་རེད་ལ། ད་དུང་ཡང་ཧུར་ཐག་བྱེད་རོགས། ངོས་ཀྱིས་ཧུར་ཐག་བྱེད་ཀྱི་ཡིན། དེ་ནས་རྒྱུད་པ་གྲྭ་ཚང་དང་འབྲེལ་བ་ཡོད་པ་ཁྱོད་ཚོ་སྦྱིན་བདག་སོགས་མང་པོ་ཞིག་སླེབས་འདུག ཚང་མར་ཐུགས་རྗེ་ཆེ་ཞུ་རྒྱུ་ཡིན། ད་ལྟའི་བར་དུ་བོད་ཀྱི་སངས་རྒྱས་ཀྱི་བསྟན་པ་ལ་དོ་སྣང་གསར་བ་ཞིག་སླེབས། དེ་ལྟ་བུའི་བསྟན་པ་འཛིན་མཁན་རྒྱུད་པ་གྲྭ་ཚང་ལ་ཆ་བཞག་ན་དངོས་གནས་བསྟན་པ་འཛིན་མཁན་གལ་ཆེན་པོ་ཞིག་རེད་འདུག་བསམ་པའི་ཐོག་ནས་རོགས་བྱེད་ཀྱི་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན། ང་ཚོ་མི་ཚེ་གཅིག་གི་ནང་ལ་འབྲེལ་བ་བྱུང་ཡོད་པ་རྣམས་ཚེ་རབས་ནས་ཚེ་རབས་ལ་འབྲེལ་བ་ཡོང་བ་ཞིག་ཕལ་ཆེར་རེད། དེ་སྔའི་ལོ་རྒྱུས་ལ་བལྟས་པ་ཡིན་ནའང་ཤེས་རྒྱུ་རེད། གང་ལྟར་གལ་ཆེ་ཤོས་ངོས་ཀྱིས་ནམ་རྒྱུན་ཚང་མར་བཤད་བཞིན་ཡོད། ད་ལྟའི་དུས་རབས་འདིར་སྐྱེས་པའི་བོད་མི་ཚང་མ་འཕགས་པ་སྤྱན་རས་གཟིགས་ཀྱིས་ཚེ་རབས་ནས་ཚེ་རབས་ལ་རྗེས་སུ་གཟུང་གི་རེད། དེར་ངོས་ལ་རྒྱུ་མཚན་ཡོད། ངོས་རང་དབང་རྣོན་ཆོས་ཀྱི་རྗེས་འབྲང་རེད་མ་གཏོགས་དབང་རྟུལ་དད་པའི་རྗེས་འབྲང་མ་རེད། རྒྱུ་མཚན་ལ་བསམ་བློ་བཏང་ནས་བཤད་དུས་ངོས་ཀྱིས་གསལ་བོ་དྲན་གྱི་འདུག ང་ཚོ་ཚང་མ། སྐྱེ་བ་ཀུན་ཏུ་ཡང་དག་བླ་མ་དང་།། འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་།། ཞེས་སྨོན་ལམ་བརྒྱབ་པ་ལྟར་ད་ལྟའི་དུས་རབས་ཁག་པོ་འདིར་འཕགས་པ་སྤྱན་རས་གཟིགས་ཀྱི་གདུལ་ཞིང་གི་གནས་འདིར་བསྟན་པ་དང་འགྲོ་བའི་དོན་དུ་སྨོན་ལམ་ཚུན་ཆད་བརྒྱབ་ནས་སྡོད་མཁན་རྣམས་ཚེ་རབས་ནས་ཚེ་རབས་ལ་འཕགས་པ་སྤྱན་རས་གཟིགས་ཀྱིས་རྗེས་སུ་གཟུང་རྒྱུ་ཞིག་ཏན་ཏན་ཡོང་གི་རེད། ཅེས་སོགས་བཀའ་སློབ་སྩལ་རྗེས་རྒྱུད་ཀྱི་ཊཱིཀའི་གསང་སྔགས་མཁས་པའི་བགྲོ་གླེང་ཆེན་མོ་དབུ་འཛུགས་ཀྱིས་ཆུ་ཚོད་༡༡།༠༠ ཡོལ་ནས་རྒྱུད་སྟོད་གྲྭ་ཚང་གི་བླ་མ་དབུ་མཛད་བློ་བཟང་མཁས་གྲུབ་མཆོ་གིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲུབ་པ་དང་། ཉིན་གུང་ལྗགས་སྨིན་གནང་རྗེས་ཀྱ་ིཆུ་ཚོད་དང་པོ་ཡོལ་ནས་བཞུགས་སྒར་ཕོ་བྲང་དུ་ཆིབས་བསྒྱུར་བསྐྱངས་ཡོད། 

དཔལ་ལྡན་རྒྱུད་སྟོད་གྲྭ་ཚང་གིས་གོ་སྒྲིག་ཞུས་པའི་རྒྱུད་ཆེན་ཡབ་སྲས་གསུམ་གྱི་རྗེས་དྲན་བགྲོ་གླེང་འདི་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་། བྱམས་མགོན་ཏཱའི་སི་ཏི་རིན་པོ་ཆེ་མཆོག  ཤར་བྱང་གི་ཆོས་རྗེ་རྣམ་གཉིས།  རྒྱུད་སྟོད་གྲྭ་ཚང་གི་མཁན་ལས་ཟུར།  མཚུར་ཕུ་བླ་བྲང་གི་ལས་བྱེད། བགྲོ་གླེང་གནང་མཁན་མཁས་དབང་རྣམ་པ། དེ་བཞིན་དགེ་འདུན་འདུས་མང་དང་།  བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ།  སྤྱི་འཐུས་རྒྱུན་ལས། བསྟན་པའི་སྦྱིན་བདག་དང་། རྒྱུད་གྲྭ་ཚང་གི་གྲྭ་ཟུར་བ་ཁག་གཅིག  མི་མང་བཅས་བརྒྱ་ཕྲང་བརྒལ་བ་ཕེབས་ཡོད་པ་རེད།