ནང་ཆོས་དང་ནང་པ།

༄༅། །བདག་ཅག་གི་སྟོན་པ་བཅོམ་ལྡན་འདས་ཀྱིས་ནང་པ་སངས་རྒྱས་པའི་ཆོས་ཨང་ཀི་དང་པོ་ཞིག་གསུངས་ཡོད། དེའི་སྙིང་དོན་ནི་སེམས་ཅན་གཞན་ལ་ཕན་ཐོགས་ཡག་པོ་བྱེད་དགོས་པ་དང་། གལ་སྲིད་ཕན་ཐོགས་བྱེད་མ་ཐུབ་རུང་གནོད་པ་ནམ་ཡང་མ་བྱེད་ཟེར་བ་དེ་ཡིན།

    ཆོས་ནི་རང་རང་སོ་སོའི་འདི་དང་ཕྱི་མའི་དོན་སྒྲུབ་ཐབས་དང་། མི་ཡ་རབས་སེམས་བཟང་བཟོ་བའི་ཐབས་ཤེས་ཡག་ཤོས་དེ་ཡིན་པ་རེད། ཆོས་སྒྲུབ་ཅེས་པ་ཡང་ཕྱིའི་ལྷ་ཁང་དང་། སྐུ་གསུང་ཐུགས་རྟེན་ཡོད་མེད་ལ་རག་ལུས་པ་མ་ཡིན་པར། ནང་བསམ་བློའི་སྟེང་ནས་བསྒྲུབ་དགོས་པ་ཡིན། རང་ཉིད་དངོས་འབྲེལ་ཆོས་ལ་ཡིད་ཆེས་ཡོད་མཁན་ཞིག་ཡིན་ན། ཆོས་ནས་གསུང་པ་རྣམས་ལ་དོ་སྣང་གིས། ལག་ལེན་དུ་བསྟར་ཐབས་འབད་བརྩོན་བྱེད་རྒྱུ་དེ་གལ་ཆེན་པོ་ཡིན། 

    འཛམ་གླིང་འདིར་གནའ་སྔ་མོ་ནས་ཆོས་ལུགས་རིགས་འདྲ་མིན་མང་པོ་ཞིག་བྱུང་ཡོད། དེ་དག་གི་ཁོངས་ནས་འགའ་ཞིག་ནུབ་ཟིན་པ་དང་། འགའ་ཞིག་ད་ལྟ་གནས་ཏེ་ཡོད། ཆོས་ལུགས་དེ་དག་ཚར་མར་ལེགས་ཆ་ཡོད་པ་ཡིན། ང་རང་ཚོ་བོད་ལ་དར་ཁྱབ་ཆེ་བའི་ཆོས་ནི་ནང་པ་སངས་རྒྱས་པའི་ཆོས་ཡིན། ནང་ཆོས་ཀྱི་ལེགས་ཆའམ་རྒྱུ་མཚན་བཀོད་སྟངས་ནི། སངས་རྒྱས་ལ་དད་པ་བྱེད་ན་རང་ཉིད་སྐྱིད་པོ་ཡོང་གི་རེད་བརྗོད་པ་ལྟ་བུ་མ་ཡིན་པར། རྒྱུ་འབྲས་ཀྱི་རྣམ་གཞག་བཤད་ཀྱི་ཡོད། རང་ཉིད་བདེ་བ་འདོད་ན། བདེ་བ་དེའི་རྒྱུ་གང་ཡིན་རྩད་གཅོད་ཀྱིས་དེ་བསྒྲུབ་དགོས་པ་དང་། སྡུག་བསྔལ་མི་འདོད་ན་དེའི་རྒྱུ་སྤོང་བ་ལ་འབད་དགོས། དཔེར་ན། ད་རིང་ཆར་བ་ཆེན་པོ་ཞིག་བབས་ན། རྒྱུ་དེས་སང་ཉིད་གནམ་གཤིས་བསིལ་བོ་ཡོང་བ་དང་། ད་རིང་ཉི་མ་ཚ་བོ་བསྟན་ན། རྒྱུ་དེས་སང་ཉིན་གནམ་གཤིས་ཚ་བ་ཆེན་པོ་ཡོང་བ་དེ་དག་ནི་རྒྱུ་སྔོན་སོང་གི་འབྲས་བུ་ཡིན། དེ་བཞིན་ཕྲུ་གུ་ཆུང་ཆུང་དུས་ཡོན་ཏན་བསླབ་པ་དེ་ཁོ་རང་ད་ལྟ་སྐྱིད་པོ་འབྱུང་ཆེད་ཙམ་མིན་པར། མ་འོངས་པའི་མི་ཚེ་བདེ་སྐྱིད་ལྡན་པ་འབྱུང་བའི་རྒྱུ་སྒྲུབ་ཀྱི་ཡོད་པ་ཡིན། 

    སྔར་བོད་ལུང་པར་སངས་རྒྱས་ཀྱི་བསྟན་པ་དར་ཁྱབ་ཆེན་པོ་བྱུང་ཡོད་ཀྱང་། ཆོས་ཞེས་པ་རྩ་བ་ཆེན་པོ་ཞིག་ཡིན་པ་དང་། ཡིད་ཆེས་ཀྱི་སྒོ་ནས་ཆོས་ལ་དད་པ་བྱས་པ་མ་གཏོགས་ཆོས་ཀྱི་གནད་འགག་ཡག་པོ་ཤེས་མཁན་ཉུང་ཉུང་རེད། དེ་མཚུངས་ཆོས་ཕྲན་བུའི་ཤེས་མཁན་ཚོས་ཀྱང་ལག་ལེན་དུ་མ་བསྟར་བའི་སྐྱོན་ཆ་བྱུང་ཡོད། སྔར་གྱི་ཉམས་མྱོང་གི་ཐོག་ནས་ཕྱིས་འབྱུང་ཡང་བསྐྱར་ནོར་འཁྲུལ་མི་འབྱུང་བ་དེ་དག་རང་ཉིད་སོ་སོས་སེལ་དགོས། མི་གཞན་ཞིག་གིས་ཚེར་མ་བཏོན་པ་ནང་བཞིན་ཡོངས་ཐབས་མེད། 

    ནང་པ་དངོས་འབྲེལ་ཞིག་བྱེད་འདོད་ན། མི་དགེ་བཅུ་སྤང་གི་ཉམས་ལེན་མི་བྱེད་མཐུ་མེད་ཡིན། མི་དགེ་བཅུ་སྤོང་གི་ལག་ལེན་འདི་མཐོ་རིས་དང་། ཐར་པ་བགྲོད་པའི་སྐས་འཛེགས་ཀྱི་བང་རིམ་དང་པོའི་ཚོད་དེ་ཡིན་པས་ཨེ་ཤེས་བལྟ་དགོས། དེ་ལྟར་བྱུང་ན་ནང་པའི་གྲས་སུ་ཚུད་པ་རེད། 

    ནང་ཆོས་ནས་གསུང་པའི་བཟང་པོའི་ཡོན་ཏན་ཉམས་སུ་བསླངས་ན། མི་ཚེ་བདེ་སྐྱིད་ལྡན་པ་ཡོང་རྒྱུ་ཡིན། བདེ་སྐྱིད་ཀྱི་རྒྱུའི་གཙོ་བོ་ནང་སེམས་ཀྱི་བསམ་བློའི་འཁྱེར་སོ་ཡིན། ཕྱིའི་རྒྱུ་དངོས་ཀྱི་སྟོབས་འབྱོར་དང་། དབང་ཐང་། གཏམ་སྙན་གྲགས་བཅས་མཐུན་པའི་རྐྱེན་ཡིན་ཡང་རྒྱུའི་གཙོ་བོ་མིན། རང་ཉིད་ཕུང་ལ་སྦྱོར་མཁན་ཡང་སེམས་ཡིན་ལ། དེ་ལ་གཉེན་པོ་བསྟེན་ཏེ་མེད་པ་བཟོ་མཁན་དེ་ཡང་སེམས་ཡིན། 

    ནང་པའི་གཞུང་ནས་བདག་ཉིད་བདག་གི་མགོན་ཡིན་ཞེས་གསུང་པའི་དགོངས་དོན། སྡུག་བསྔལ་ནི་ཟད་རུང་ཡིན་པས་སྡུག་བསྔལ་སེལ་བའི་ཐམས་ལམ་མ་ནོར་བ་ཞིག་རང་གིས་ཤེས་པར་བྱས་ཏེ། དེ་དག་གི་ལག་ཏུ་བླངས་ནས་རང་རྒྱུད་ཀྱི་སྡུག་བསྔལ་གྱི་རྒྱུ་ཟད་རྒྱུ་ཡོད་པ་དང་། སྡུག་བསྔལ་གྱི་རྒྱུ་ཟད་པ་དང་འབྲས་བུའི་སྡུག་བསྔལ་ལས་ཐར་རྒྱུུ་ཡོད་པ་དེ་ཡིན། དེར་བརྟེན་གཙོ་བོ་རང་གི་ལག་པར་ཡོད་པ་གསུངས་ཡོད། 

    རྒྱུན་པར་གཞན་ཕན་གྱི་ཀུན་སློང་བཟང་པོས་ཉམ་ཐག་ལ་རོགས་ཕན་དང་། བཟོད་བསྲན། འདོད་ཆུང་ཆོག་ཤེས་སོགས་ཀྱི་བཟང་པོའི་ཡོན་ཏན་རང་རྒྱུད་ལ་ཡོད་ན་རང་བློ་བག་ཕེབས་ཤིང་བདེ་སྐྱིད་ཡོང་བ་བཅས་རེད། དེ་དག་དངོས་འབྲེལ་ཡིན་མིན་བརྟག་ཞིབ་བྱས་ན་ར་འཕྲོད་ཡོང་རྒྱུ་ཡིན།