ངས་ཐུབ་པ་ནི་ཆོས་འབྲེལ་ག་དུས་བྱས་ཀྱང་འབུལ་བ་ལེན་གྱི་མེད།

མདུན་ངོས། / ངས་ཐུབ་པ་ནི་ཆོས་འབྲེལ་ག་དུས་བྱས་ཀྱང་འབུལ་བ་ལེན་གྱི་མེད།

རྩེ་ལེ་སྣ་ཚོགས་རང་གྲོལ་གྱི་གསུང་གི་ནང་དུ་ཁོང་གིས་ཤ་མི་བཞེས་པ་དང་། ཆོས་བཤད་ནས་འབུལ་བ་མི་ལེན་པ། ཞོན་པ་མི་ཞོན་པ་དང་གསུམ་གྱི་དམ་བཅའ་བཞག་འདུག་པས་ངའི་སེམས་ལ་ཧ་ཅང་ཕན་ཐོགས་བྱུང་། ངས་དེ་དག་གི་ནང་ནས་ང་ཕར་ཚུར་འགྲོ་བའི་སྐབས་རླངས་འཁོར་དང་གནམ་གྲུའི་ནང་ཡིན་པས་ཞོན་པ་ནི་དམིགས་བསལ་སྤོང་དགོས་པ་མི་འདུག སྤྱི་ཚོགས་ཀྱི་ནང་དུ་གང་ཐུབ་ཀྱིས་དཀར་ཟས་ལ་དང་དོད་བྱེད་པ་དང་། དམར་ཟས་ཉུང་དུ་གཏོང་དགོས་པའི་སྐོར་ངས་རྟག་པར་འབོད་བསྐུལ་བྱེད་བཞིན་ཡོད། རྒྱ་གར་ནང་གི་བོད་པའི་དགོན་པ་ཆེ་ཁག་གི་སྤྱིའི་ཐབ་ཚང་ནས་དམར་ཟས་གཏན་ནས་གཏོང་གི་མེད་པར་དཀར་སྐྱོང་བྱེད་བཞིན་ཡོད། ངས་ཐུབ་པའམ་ང་དང་འབྲེལ་བ་ཡོད་པ་ནི། ཆོས་འབྲེལ་ག་དུས་བྱས་ཀྱང་འབུལ་བ་ལེན་གྱི་མེད། འབུལ་བ་བླངས་ན་ཚོང་བརྒྱབ་པ་དང་གཅིག་པ་རེད། ངས་ཕར་ཆོས་བཤད་ཁུལ་བྱས། ཚུར་འབུལ་བ་བླངས་ན་ཚོང་བརྒྱབ་པ་རང་རེད། རྩེ་ལེ་སྣ་ཚོགས་རང་གྲོལ་གྱིས་ཀྱང་ཆོས་ཀྱིས་ཚོང་བྱེད་པ་འདི་ཡག་པོ་གཏན་ནས་མི་འདུག་ཅེས་གསུངས་འདུག ལོ་ཤས་སྔོན་ནས་ཕྱི་རྒྱལ་སོགས་སུ་ངས་སྐད་ཆ་བཤད་སྐབས་འཛིན་བྱང་བཙོངས་པའི་ནང་ནས་ངས་སྒོར་རྡོག་གཅིག་ཀྱང་བླངས་མེད། བླ་མའི་མིང་ཞིག་ཁྱེར། ཆོས་འདྲ་ཞིག་བཤད་ཁུལ་བྱས་ཏེ་འབུལ་བ་ལེན་པ་དེ་སྔོན་ཆུ་བཟང་རིན་པོ་ཆེས།    དབང་བསྐུར་ཆོས་བཤད་བྱེད་དུས་རྣམ་དཔྱོད་འདྲ་ཞིག་འདུག་སྟེ། །འབུལ་བར་ཨང་ཉན་བྱེད་དུས་སེམས་པ་གཏིང་ནས་སྐྱོ་བྱུང་། །

ཞེས་ཆོས་བཤད་དུས་འབུལ་བ་ལ་འདོད་རྔམ་བྱེད་པ་འདི་སེམས་གཏིང་ནས་སྐྱོ་བྱེད་རེད་ཅེས་གསུངས་འདུག གང་ལྟར་ངས་འབུལ་བ་གཏན་ནས་ལེན་གྱི་མེད་པས་ཁྱེད་ཚོས་འབུལ་བ་ཁྱེར་ཡོད་པ་རྣམས་རང་འཇགས་སློག་ས་ཡོད་ན་དེ་ཀ་དང་། མེད་ན་དེ་གའི་སྤྱི་ཚོགས་ལ་ཕན་པའི་ཆེད་བེད་སྤྱོད་བྱོས། ཁྱེད་ཅག་གིས་གོ་མྱོང་ཡོད་རྒྱུ་རེད། སྔོན་མ་ང་ ༡༩༧༩ ལོར་ Moscow མའོ་སི་ཁའོ་བརྒྱུད་ནས་སོག་ཡུལ་ལ་སླེབས་པ་རེད། སོག་ཡུལ་དུ་འགྲེམས་སྟོན་ཁང་ཞིག་གི་ནང་དུ་ཁ་ཆེས་ཆེར་གདངས་པའི་གྲྭ་ཆས་ཅན་ཞིག་གི་ཁའི་ནང་དུ་མི་སེར་ཚང་མ་འགྲོ་བཞིན་པའི་རི་མོ་ཞིག་འདུག དེ་ནི་གྲྭ་པ་རྣམས་མི་མང་ལ་བཤུ་གཞོག་གཏོང་མཁན་རེད་ཟེར་བའི་མཚོན་དོན་རེད། སྣེ་ཤན་པ་དེས་དེ་སྐོར་ང་ལ་འགྲེལ་བཤད་བྱེད་པར་འཚེར་སྣང་བྱེད་ཀྱི་འདུག་པས་ངས་ཁྱོད་འཚེར་མི་དགོས། ང་ཚོ་གྲྭ་པ་དང་བླ་མས་མི་མང་ལ་བཤུ་གཞོག་བཏང་བ་རི་མོར་བྲིས་པ་རེད། དེ་བདེན་པ་རེད་ཅེས་བརྗོད་པ་ཡིན། 

                         ཕྱི་ལོ་༢༠༡༦ཟླ་ ༨ ཚེས་༡༨ ཉིན་ལ་དྭགས་ཞི་བའི་ཚལ་དུ་གནང་བ་ལས་བཏུས།