ྋཏཱ་ལའི་བླ་མའི་དགེ་རྩ་ཚོགས་པ།

སྤྱིར་འཛམ་གླིང་ཐོག་དགེ་རྩ་ཚོགས་པ་མང་དག་ཅིག་ཡོད་ཀྱང་། ཏཱ་ལའི་བླ་མའི་དགེ་རྩ་ཚོགས་པ་ནི་ཕ་མ་ཉམ་ཐག་ཡིན་ཞིང་འོས་ཆོས་ཚང་བའི་བོད་ཕྲུག་ཚོར་ཤེས་ཡོན་སློབ་སྦྱོང་གྱི་གོ་སྐབས་སྤྲོད་རྒྱུ་དང་། ན་གཞོན་ཕོ་མོ་ཚོར་གནའ་དེང་ཤེས་ཡོན་གྱི་ལམ་ནས་འཇིག་རྟེན་ཀུན་ཁྱབ་འགན་ཁུར་གི་བསམ་བློ་གོང་མཐོར་གཏོང་རྒྱུར་བློ་སྟོབས་སྤེལ་བ། ནང་ཆོས་དང་ཚན་རིག་དབར་དོན་སྙིང་ལྡན་པའི་བགྲོ་གླེང་གོང་མཐོར་གཏོང་བ། ཁོར་ཡུག་སྲུང་སྐྱོབ་ཀྱི་ལས་འགུལ་གོང་མཐོར་གཏོང་བ། འཚེ་མེད་ཞི་བའི་ཐབས་ལམ་ལ་བརྟེན་ནས་མི་སྒེར་གྱི་འཚར་ལོངས་དང་། སྤྱི་ཚོགས་ཀྱི་འགྱུར་ལྡོག་གོང་མཐོར་གཏོང་རྒྱུའི་བློ་སྟོབས་སྤེལ་བ། དེ་བཞིན་ཆེས་ཉམ་ཐག་པའི་སྤྱི་ཚོགས་ལ་ངལ་སེལ་དང་མཐུན་འགྱུར་སྦྱར་རྒྱུ་སོགས་ཡིན།

དགེ་རྩའི་ཡོང་འབབ་ནི་དགེ་རྩ་འཛུགས་མཁན་དང་། འཛམ་གླིང་ཡུལ་གྲུ་གང་ས་ནས་དད་ལྡན་མང་ཚོགས་ཀྱིས་ཕུལ་བའི་ཞལ་འདེབས་ལ་བརྟེན་ནས་ཡོང་གི་ཡོད། དགེ་རྩ་ཚོགས་པ་འདི་ནི་གྲོང་ཁྱེར་ནིའུ་ཡོག་ཏུ་ཡོད་པའི་ཨ་རིའི་ཁེ་མེད་དགེ་རྩ་ཚོགས་པར་དེབ་སྐྱེལ་བྱས་པའི་དགེ་རྩ་ཚོགས་པ་ཞིག་ཡིན། འཛིན་སྐྱོང་ཐད་དགེ་རྩ་འཛུགས་མཁན་གྱི་གཙོ་སྐྱོང་འོག དགེ་རྩ་ཚོགས་པའི་ཚོགས་མི་ལྷན་རྒྱས་ཀྱིས་གནང་གི་ཡོད་པ་བཅས། ཞིབ་ཕྲའི་གནས་ཚུལ་དགེ་རྩའི་དབྱིན་ཡིག་དྲྭ་ཚུགས་འདིར་  www.dalailamatrust.com གསལ་བས་གཟིགས་པར་འཚལ།

འབྲེལ་བ་གཏུགས་གནང་ས།
The Dalai Lama Trust
241 East 32nd Street
New York, NY 10016
U.S.A.