དུས་རབས་ཉི་ཤུ་པ་མཇུག་བསྒྲིལ་ལ་ཉེ་བ་དང༌། ང་ཚོ་བོད་མི་རིགས་ཀྱིས་རང་དབང་སྒེར་ལངས་བྱས་ཏེ་ལོ་སུམ་ཅུ་སོ་བརྒྱད་འཁོར་བར་དྲན་གསོ་བྱེད་པའི་སྐབས་འདིར་རང་ཅག་འགྲོ་བ་མིའི་རིགས་ཀྱི་སྤྱི་ཚོགས་འདི་ལོ་རྒྱུས་ཀྱི་དུས་མཚམས་གནད་འགག་ཆེན་པོ་ཞིག་ཏུ་སླེབས་ཡོད། འཛམ་གླིང་འདི་འབྲེལ་ཐག་ཇེ་ཉེར་ཕྱིན་པའི་དབང་གིས་ཕན་ཚུན་གཅིག་ལ་གཅིག་བརྟེན་པའི་ལྟོས་ཤུགས་ཇེ་ཆེར་སོང་ནས་རྒྱལ་ཁབ་གཅིག་གི་དཀའ་ངལ་རྒྱལ་ཁབ་དེ་གཅིག་པུས་སེལ་ཐབས་མེད་པར་འགྱུར་ཡོད་པས། འཛམ་གླིང་འདིར་གཞན་ཕན་གྱི་བསམ་བློ་མེད་ན། རང་རེའི་མདུན་ལམ་ཉེན་ཁའི་གནས་སུ་ལྷུང་ངེས་ཡིན། དེང་སྐབས་དྲག་པོའི་རྟེན་གཞི་རྒྱ་སྐྱེད་དང༌། འཛུགས་སྐྲུན། མི་འབོར་འཕར་བ་སོགས་ཀྱིས་རྐྱེན་པས་ཁོར་ཡུག་ཉམས་ཆག་ཏུ་འགྱུར་བཞིན་པ་དང༌། རང་བྱུང་གི་ནུས་པའི་འབྱུང་ཁུངས་དང༌། གཏེར་ཁའི་འབྱུང་ཁུངས་གསར་པ་འཚོལ་ཞིབ་བྱེད་པའི་ཐད་ཁྱོན་ཡོངས་ལ་བསམ་བློ་མ་བཏང་བར་འཕྲལ་ཁེ་གཙོ་བཟུང་བྱས་ན། དེ་ནི་མིག་རྒྱང་ཐུང་བའི་བྱ་ཐབས་ཤིག་ཡིན་པས་ཕན་ཐོགས་མེད། དེང་དུས་ཚན་རིག་ཡར་རྒྱས་སོང་བ་འདིས་འགྲོ་བ་མིའི་དཀའ་ངལ་སེལ་རྒྱུར་ཕན་ནུས་གང་ཙམ་བྱུང་ཡོད་ཀྱང༌། གོང་དུ་བརྗོད་པ་ལྟར་འཛམ་གླིང་གི་དཀའ་ངལ་མཐའ་དག་སེལ་ཐབས་སུ་ཚན་རིག་གཅིག་པུ་ཡར་རྒྱས་གཏོང་བ་ཙམ་མ་ཡིན་པར། བྱམས་སྙིང་རྗེ་དང༌། ཕན་ཚུན་མཛའ་བརྩེ། གདུང་སེམས་མཉམ་བསྐྱེད་སོགས་བཟང་སྤྱོད་ཀྱི་ནུས་པ་འཕེལ་རྒྱས་གཏོང་རྒྱུ་གལ་ཆེན་པོ་ཡིན།
ང་རང་ཚོས་འགན་ཁུར་ལྡན་པའི་འཚོ་བ་ཚུལ་ལྡན་ལ་སྤྱོད་ཐུབ་པའི་ཆེད་དུ་བསམ་བློ་གསར་པ་གཏོང་རྒྱུ་ནི་གལ་ཆེན་པོ་ཡིན། གལ་ཏེ་ང་ཚོས་དུས་ལས་ཡོལ་ཟིན་པའི་ལྟ་བ་དང་བསམ་བློ་རྒྱུན་འཛིན་བྱེད་པ་དང༌། ཁྱོན་ཡོངས་ཀྱི་གནད་དོན་ལ་བསམ་བློ་མི་གཏོང་བར། རང་དོན་ཁོ་ན་སྙིང་བཅངས་བཅས་བྱས་པ་ཡིན་ན་རང་རེའི་དམིགས་ཡུལ་བཟང་སྤྱོད་ཡར་རྒྱས་འགྲོ་མི་ཐུབ། བསམ་བློ་དེ་འདྲ་གཏོང་མཁན་གྱི་མི་མང་པོ་ཡོད་ན་དེ་ནི་ཕན་ཚུན་གཅིག་ལ་གཅིག་རྟེན་པའི་འཛམ་གླིང་འདི་ཞི་བདེ་མཉམ་གནས་ཀྱི་སྤྱི་ཚོགས་ཤིག་ཏུ་འཕོ་འགྱུར་འགྲོ་རྒྱུའི་འགལ་རྐྱེན་ཡིན། ང་ཚོས་སོ་སོའི་ཉམས་མྱོང་བྱུང་རིམ་ནས་བསླབ་བྱ་ལེན་དགོས་པ་ལྟར།
དུས་རབས་ཉི་ཤུ་པའི་འདས་པའི་གནས་ཚུལ་ལ་ཕྱི་མིག་ཅིག་བལྟས་པ་ཡིན་ན། དུས་རབས་འདིའི་ནང་མིས་སྡུག་བསྔལ་མྱོང་དགོས་བྱུང་བ་དང༌། མིའི་ཆེ་མཐོང་དང༌། རང་དབང༌། ཞི་བདེ་བཅས་བརླག་པའི་རྒྱུ་རྐྱེན་གཙོ་བོ་ནི་ཕན་ཚུན་བར་གྱི་འགལ་བ་སེལ་ཐབས་སུ་དྲག་ཤུགས་བེད་སྤྱོད་བྱས་པ་དེ་ཡིན། དེར་བརྟེན་དུས་རབས་ཉི་ཤུ་པ་འདི་དམག་འཁྲུག་དང་མི་གསོད་ཁྲག་སྦྱོར་གྱི་དུས་རབས་ཤིག་རེད་ཅེས་བརྗོད་ཆོག རིང་མིན་འཆར་ལ་ཉེ་བའི་དུས་རབས་ཉེར་གཅིག་པ་དེ་གྲོས་མོལ་དང༌། ཞི་བདེ་མཉམ་གནས་ཀྱི་དུས་རབས་ཤིག་ཡོང་ཆེད་ང་ཚོས་འབད་བརྩོན་བྱེད་དགོས་པ་ཡིན། མིའི་སྤྱི་ཚོགས་ནང་ཕན་ཚུན་བསམ་ཚུལ་དང༌། ཁེ་ཕན་མ་མཐུན་པ་རྒྱུན་མཐུད་ཡོང་ངེས་ཡིན་ནའང༌། ད་ལྟའི་དངོས་ཡོད་གནས་སྟངས་ཀྱི་ཐོག་ནས་ང་ཚོ་ཚང་མ་ཕན་ཚུན་གཅིག་ལ་གཅིག་བརྟེན་གྱི་རྒྱུ་སྐར་ཆུང་ཆུང་འདིའི་ཐོག་མཉམ་དུ་སྡོད་དགོས་ཀྱི་ཡོད་པར་བརྟེན་རྒྱལ་ཁབ་ཕན་ཚུན་བར་དང༌། མི་སྒེར་ཕན་ཚུན་བར་ཁེ་ཕན་དང་བསམ་ཚུལ་མི་མཐུན་པའི་དཀའ་ངལ་ཡོད་རིགས་བློ་གྲོས་དང༌། རྣམ་དཔྱོད་ལྡན་པའི་སྒོ་ནས་ཕན་ཚུན་གླེང་མོལ་བྱས་ཏེ་སེལ་ཐབས་བྱེད་དགོས།
འགྲོ་བ་མིའི་མདུན་ལམ་གྱི་ཐད་རྒྱལ་སྤྱིའི་སྤྱི་ཚོགས་ཀྱི་ལས་འགན་གལ་ཆེ་ཞིག་ནི་ཕན་ཚུན་གླེང་མོལ་དང༌། འཚེ་བ་སྤོང་བའི་རིགས་པའི་གཞུང་ལུགས་གོང་འཕེལ་གཏོང་ཐབས་བྱེད་དགོས་པ་དེ་ཡིན་ཞིང༌། སྲིད་གཞུང་ཁག་གིས་འཚེ་བ་མེད་པའི་ལྟ་སྤྱོད་ལ་མོས་མཐུན་བྱེད་པ་དང༌། དེ་རྩ་ཆེར་འཛིན་པའི་ཚིག་ཙམ་གྱིས་མི་ཕན་པར་དེ་དག་ཁྱབ་སྤེལ་འབྱུང་ཐབས་སུ་ལག་ལེན་དངོས་སུ་བསྟར་དགོས། ངོས་ནས་དེ་ལྟར་ཡིད་ཆེས་བྱས་ཏེ་ད་བར་བོད་མིའི་རང་དབང་གི་འཐབ་རྩོད་འདི་འཚེ་མེད་ཞི་བའི་ལམ་ཕྱོགས་སུ་སྣེ་འཁྲིད་བྱས་པ་དང༌། བོད་དོན་དཀའ་ངལ་སེལ་ཐབས་སུ་ཞི་འགྲིགས་ཀྱི་ཀུན་སློང་བཅངས་ནས་གྲོས་མོལ་བྱས་ཏེ་ཕན་ཚུན་གཉིས་མོས་ཀྱི་ཐབས་ལམ་ཞིག་རྙེད་ཐབས་བྱས་ཡོད།
སྟོན་པ་ཐུགས་རྗེ་ཅན་གྱིས་འཚེ་མེད་ཞི་བ་དང༌། བྱམས་པ་དང་སྙིང་རྗེའི་ལམ་སྟོན་གནང་བ་གཞིར་བཟུང་ང་ཚོས་སེམས་ཅན་ཐམས་ཅད་ཀྱི་ཚེ་སྲོག་ལ་བརྩེ་གདུང་བཅངས་ནས་དྲག་འཐབ་ཀྱི་རིགས་སྤོངས་དགོས་པ་ལྟར། འཚེ་མེད་ཞི་བའི་ཐབས་ལམ་འདི་ནི་ང་ཚོ་བོད་མིའི་རྩ་དོན་སྒྲུབ་པའི་ཐབས་ལམ་བཟང་ཤོས་དང༌། ཕུགས་རྒྱང་རིང་པོར་ཕན་ཐོགས་ཆེན་པོ་ཡོད་པ་ཞིག་ཡིན་པར་མ་ཟད། དོན་དངོས་ཐོག་སྒྲུབ་ཐུབ་པ་ཞིག་ཀྱང་ཡིན་པར་ཡིད་ཆེས་ཡོད།
ང་ཚོས་དེ་རིང་དུས་དྲན་ལ་སྲུང་བརྩི་ཞུ་བ་དང་བསྟུན་བར་ལམ་བོད་ནང་དྲག་གནོན་བྱེད་ཤུགས་ཆེ་རུ་བཏང་སྟེ་ལོ་གཅིག་སོང་བའི་གནས་ཚུལ་ལ་ཕྱི་མིག་ལྟ་སྐབས་རྒྱ་ནག་གཞུང་གིས་མུ་མཐུད་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་ཚབས་ཆེ་བཏང་དང་གཏོང་བཞིན་པ་རེད། སྔ་ལོ་ཕྱི་ཟླ་བཞི་པར་རྒྱ་ནག་གཞུང་གིས་བོད་ནང་རྡུང་རྡེག་ཚ་ནན་གཏོང་བ་ཟེར་བའི་ལས་འགུལ་སྤེལ་ཏེ་སོ་སོའི་ཆབ་སྲིད་ཀྱི་དགོས་འདུན་ཞི་བའི་ལམ་ནས་འདོན་མཁན་བོད་མི་རྣམས་ལ་མནར་གཅོད་གཏོང་བ་དང༌། བཙོན་འཇུག་བྱེད་ཤུགསཆེ་རུ་བཏང་ཡོད། དེ་བཞིན་དགོན་སྡེ་ཁག་ནང་ཆབ་སྲིད་སློབ་གསོ་ཟེར་བའི་ལས་འགུལ་སྤེལ་བའི་རྐྱེན་གྱིས་གྲྭ་བཙུན་མང་པོ་ཞིག་དགོན་པ་ནས་ཕྱིར་འབུད་བྱས་པ་དང༌། ཁག་གཅིག་བཙོན་དུ་བཅུག་པ་དེའི་ཁོངས་ནས་འགའ་ཞིག་འདས་གྲོངས་སུ་སོང་ཡོད། ཀུན་གཟིགས་པཎ་ཆེན་རིན་པོ་ཆེ་གང་དུ་བཞུགས་ཡོད་ད་ལྟའང་གསལ་པོར་ཤེས་རྟོགས་མ་ཐུབ་པར་བརྟེན། ཁོང་གི་དོན་དུ་བློ་འཚབ་ཧ་ཅང་ཆེན་པོ་འདུག
སྔ་ལོ་རྒྱ་ནག་གཞུང་གིས་ཆོས་ལུགས་ཀྱི་སྲིད་བྱུས་ལ་འགྱུར་བ་ཆེན་པོ་ཞིག་བཏང་སྟེ་ཁོང་ཚོས་བོད་ཀྱི་གནའ་རབས་ཀྱི་ཆོས་དང༌། རིག་གཞུང་ལ་གུས་བརྩི་བྱེད་པའི་ཕྱི་ཚུལ་གྱི་རྣམ་པ་དེ་ཡང་ཡོངས་སུ་དོར་བའི་སྲིད་བྱུས་གསར་པ་ཞིག་བཏོན་པའི་ནང༌། ནང་པའི་ཆོས་ལུགས་ཀྱིས་སྤྱི་ཚོགས་རིང་ལུགས་ལ་བསྟུན་དགོས་པ་ལས། སྤྱི་ཚོགས་རིང་ལུགས་ཀྱིས་ནང་པའི་ཆོས་ལུགས་ལ་བསྟུན་ཐབས་མེད་ཅེས་དང༌། ནང་པའི་ཆོས་ལུགས་ཀྱིས་བོད་ཀྱི་དཔལ་འབྱོར་ཡར་རྒྱས་གཏོང་རྒྱུར་གནོད་ཀྱི་འདུག་ཅེས་བརྗོད་འདུག སྲིད་བྱུས་གསར་པ་དེས་བོད་ཀྱི་ཐུན་མོང་མ་ཡིན་པའི་རིག་གཞུང་དང༌། རྒྱལ་ཁབ་ཀྱི་ངོ་བོ་བཅས་གོ་རིམ་ལྡན་པའི་སྒོ་ནས་ཉམས་ཆག་དང་རྩ་མེད་གཏོང་ཐབས་བྱེད་བཞིན་པ་གསལ་པོར་མཚོན་ཐུབ།
དེ་བཞིན་བོད་ནང་བོད་ཀྱི་སྐད་ཡིག་སློབ་སྦྱོང་སྤྲོད་རྒྱུ་ཉུང་དུ་བཏང་འདུག ལྷ་སར་ཡོད་པའི་བོད་ལྗོངས་སློབ་གྲྭ་ཆེན་མོའི་བོད་ཡིག་ཚན་ཁག་ལ་དེའི་གོང་བོད་ཀྱི་རྒྱལ་རབས་ལོ་རྒྱུས་སོགས་ཀྱི་སློབ་ཚན་བོད་ཀྱི་སྐད་ཡིག་ཐོག་ནས་སློབ་ཁྲིད་བྱེད་ཀྱི་ཡོད་ཀྱང༌། ད་ཆ་སློབ་ཚན་དེ་དག་རྒྱའི་སྐད་ཡིག་ཐོག་ནས་སློབ་ཁྲིད་བྱ་རྒྱུའི་འགྱུར་བ་བཏང་ཡོད་པ་དང༌། ལོ་རབས་བརྒྱད་ཅུ་པའི་ནང་ཞི་བར་གཤེགས་པའི་ཀུན་གཟིགས་པཎ་ཆེན་རིན་པོ་ཆེས་ཐུགས་ཁུར་དང་རྒྱབ་སྐྱོར་གནང་སྟེ་བོད་ནང་ཚོད་ལྟའི་བོད་ཡིག་གི་འབྲིང་རིམ་སློབ་གྲྭ་ཆེད་འཛུགས་གནང་ཡོད་པ་དེ་དག་ཀྱང་སྒོ་རྒྱག་བཞིན་ཡོད་ཅིང༌། དངོས་འབྲེལ་བྱས་ན་སློབ་གྲྭ་དེ་རིགས་ཀྱིས་ཕན་ཐོགས་ཆེན་པོ་བྱུང་ཡོད་པར་བརྟེན་བོད་མིས་བསྔགས་བརྗོད་ཆེན་པོ་བྱས་ཡོད་པ་རེད།
ད་ཆ་བོད་ནང་ཕྱོགས་གཅིག་ནས་བོད་ཀྱི་རིག་གཞུང་དང༌། ཆོས་ལུགས། ཤེས་རིག་སོགས་ཉམས་དམས་སུ་གཏོང་བའི་ལས་འགུལ་གསར་པ་སྤེལ་བ་དང༌། ཕྱོགས་གཞན་ཞིག་ནས་བོད་ནང་རྒྱ་མིའི་མི་འབོར་སྤོ་ཞུགས་མུ་མཐུད་བྱེད་བཞིན་པ་དེས་བོད་ཀྱི་ཐུན་མོང་མ་ཡིན་པའི་རིག་གཞུང་དང༌། ཆོས་ལུགས་ཀྱི་ངོ་བོ་ཉམས་དམས་སོང་སྟེ། བོད་མི་རྣམས་རང་གི་ལུང་པའི་ནང་མངོན་གསལ་མེད་པའི་གྲངས་ཉུང་མི་རིགས་ཤིག་ཏུ་འགྱུར་བཞིན་དུ་མཆིས། སྲིད་བྱུས་དེ་དག་ནི་བོད་ཀྱི་རིག་གཞུང་རྩ་མེད་གཏོང་རྒྱུར་དམིགས་པ་ཞིག་ཡིན་སྟབས་ད་ཆ་བོད་ཀྱི་གྲོང་ཁྱེར་ཆེ་ཁག་ནང་བོད་མི་རྣམས་མི་གྲལ་གྱི་མཐའ་ལ་འབུད་བཞིན་ཡོད། ད་ལྟའི་གནས་ཚུལ་ལྟར་རྒྱའི་མི་འབོར་སྤོ་ཞུགས་མུ་མཐུད་བྱས་པ་ཡིན་ན། ལོ་ངོ་བཅུ་ཕྲག་ཁ་ཤས་ནང་བོད་མིའི་གོམས་གཤིས་དཔལ་ཡོན་རྩ་མེད་དུ་འགྲོ་ཉེན་ཡོད།
རྒྱའི་བྱ་སྤྱོད་དེ་དག་ལ་བོད་མི་རྣམས་ཀྱིས་གཙོ་བོ་ཞི་བའི་ཐབས་ལམ་གྱི་སྒོ་ནས་ངོ་རྒོལ་བྱས་དང་བྱེད་བཞིན་ཡོད་ཅིང༌། མི་མང་སུ་འདྲ་ཞིག་ཡིན་རུང་ཁོང་ཚོར་དྲང་བདེན་མིན་པའི་བྱ་སྤྱོད་རིགས་ལ་ཞི་བའི་སྒོ་ནས་ངོ་རྒོལ་བྱེད་པའི་ཐོབ་ཐང་ཡོད་པར་ངས་ཡིད་ཆེས་བྱེད་ཀྱི་ཡོད། འོན་ཀྱང་ཉེ་ཆར་བོད་ནང་འབར་གས་ཀྱི་གནས་ཚུལ་རེ་གཉིས་ཐོན་པ་དེར་ངོས་རང་བློ་འཚབ་ཆེན་པོ་བྱུང༌། ང་རང་གི་ངོས་ནས་བོད་མི་རྣམས་ལ་འཚེ་མེད་ཞི་བའི་ལམ་ཐོག་བསྐྱོད་དགོས་པའི་འབོད་སྐུལ་མུ་མཐུད་བྱ་རྒྱུ་ཡིན། འོན་ཀྱང་རྒྱ་ནག་གཞུང་གི་ངོས་ནས་གདུག་རྩུབ་ཀྱི་བྱ་སྤྱོད་ལག་བསྟར་བྱེད་མཚམས་མ་བཞག་ན་བོད་ནང་གི་གནས་སྟངས་ཛ་དྲག་ཏུ་འགྲོ་རྒྱུ་བཀག་འགོག་བྱེད་མི་ཐུབ་པའི་གནས་སུ་གྱར་ངེས་ཡིན། ངོས་རང་བོད་མི་ཞིག་ཡིན་པའི་ཆ་ནས་རྒྱ་ནག་དང༌། ཕྱི་རྒྱལ་ཡུལ་གྲུ་ཁགཏུ་ཡོད་པའི་རྒྱའི་མི་མང་དང་འབྲེལ་བ་བྱེད་རྒྱུ་འདི་དམིགས་བསལ་གྱི་གལ་གནད་ཆེན་པོར་མཐོང༌། བོད་མི་མང་དང་རྒྱའི་མི་མང་བར་བསམ་ཚུལ་ཤེས་རྟོགས་གཏིང་ཟབ་ཡོང་བ་བྱ་རྒྱུ་འདི་ཕན་ཚུན་གཉིས་ཀར་ཁེ་ཕན་ཡོད་པ་ཞིག་ཡིན་པས། ཕན་ཚུན་གོ་ཤེས་དང༌། གུས་བརྩི། ཞི་བདེ་བཅས་ཡོང་བའི་ཆེད་དུ་མི་དང་མིའི་བར་འབྲེལ་བ་བྱ་རྒྱུ་འདི་ངས་དུས་རྟག་ཏུ་ཧ་ཅང་གལ་ཆེན་པོར་བརྩི་གི་ཡོད། ཉེ་ལམ་བོད་རྒྱའི་མི་མང་དབར་གོ་བསྡུར་རིམ་པ་འབྱུང་བཞིན་ཡོད་པ་འདིས་ང་ཚོ་ཕན་ཚུན་གཉིས་ཀས་བློ་འཚབ་བྱེད་པའི་གནས་ཚུལ་དང༌། རེ་འདུན་ཇི་ཡོད་ཕན་ཚུན་གོ་རྟོགས་སྤེལ་རེས་བྱ་རྒྱུའི་ཐད་ལ་ཕན་ཐོགས་ཆེན་པོ་བྱུང་ཡོད། རྒྱ་ནག་ནང་དང༌། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་རྒྱའི་སྤུན་ཟླ་ཕོ་མོ་རྣམས་ཀྱི་ནང་ནས་བོད་མི་མང་གི་དཀའ་སྡུག་དང༌། གཞི་རྩའི་ཐོབ་ཐང་ལ་རྒྱབ་སྐྱོར་བྱེད་མཁན་མང་དུ་སོང་བ་འདི་ང་ཚོར་མཚོན་ན་དམིགས་བསལ་གྱི་སྐུལ་ལྕག་དང༌། ང་ཚོའི་སེམས་ཤུགས་སྤེལ་བའི་ཆ་རྐྱེན་དུ་གྱུར།
ཉེ་དུས་ཏེང་ཞའོ་ཕིང་འདས་གྲོངས་གྱུར་པ་དེ་རྒྱ་ནག་གི་ངོས་ནས་ཧ་ཅང་ཕངས་པོ་བྱུང་ཡོད་ལ། ཏེང་ཞའོ་ཕིང་དང་ང་རང་ངོ་ཤེས་ཡོད། རྒྱ་ནག་གཞུང་ཕྱོགས་ནས་བོད་ཀྱི་དཀའ་རྙོག་རྣམས་ང་ཚོ་ཕན་ཚུན་ཐད་ཀར་འབྲེལ་བ་བྱས་ཏེ་གྲོས་མོལ་གྱི་ལམ་ནས་སེལ་རྒྱུའི་གྲོས་འགོ་འདོན་མཁན་ཡང་ཏེང་ཞའོ་ཕིང་ཡིན། འོན་ཀྱང་བློ་ཕམ་པ་ཞིག་ལ་ཁོང་གི་མི་ཚེའི་རིང་ཁ་བཤད་ལག་བསྟར་གྱི་དོན་ཕན་ལྡན་པའི་གྲོས་མོལ་ཞིག་བྱེད་ཐུབ་མེད། ཁོང་གི་རྗེས་སུ་ལས་གནས་འཛིན་མཁན་རྒྱ་ནག་གི་འགོ་ཁྲིད་ཚོས་བོད་ཀྱི་གནད་དོན་དཀའ་རྙོག་འདི་གྲོས་མོལ་གྱི་ལམ་ནས་སེལ་སླད་ལམ་སྒོ་གསར་པ་ཞིག་འབྱེད་རྒྱུའི་སྙིང་སྟོབས་དང༌། བློ་རྩལ་འདོན་རྒྱུར་ངས་ཁ་ཞེ་གཉིས་མེད་ཀྱི་རེ་བ་བྱེད་ཀྱི་ཡོད།
རྒྱ་ནག་ནང་དུས་རབས་གསར་པ་ཞིག་འགོ་ཚུགས་ཟིན་པ་དེས་དོན་ཕན་ལྡན་པའི་འགྱུར་བ་གཏོང་རྒྱུའི་གོ་སྐབས་གསར་པ་ཞིག་སྤྲད་ཡོད། ཤར་ཏུར་ཀི་སི་ཐན་(ཤིང་ཅང་)ནང་ཡུ་གུར་མི་མང་གིས་ཉེ་ཆར་ངོ་རྒོལ་རྔམ་སྟོན་བྱས་པ་དེར་དྲག་ཤུགས་ཀྱིས་རྡུང་རྡེག་བཏང་བ་དང༌། དེ་རྗེས་དྲག་པོའི་བྱ་སྤྱོད་བྱུང་བ་རྣམས་ནི་བློ་ཕམ་བྱེད་འོས་པའི་གནས་ཚུལ་ཐབས་སྐྱོ་པོ་ཞིག་རེད། བོད་དང་འདྲ་བར་ཤར་ཏུར་ཀི་སི་ཐན་གྱི་ནང་དུ་ཡང་རྒྱུན་རིང་བདེ་བར་འཚོ་གནས་ཐུབ་པའི་ཐབས་ལམ་དེ་ཞི་བའི་གྲོས་མོལ་ཁོ་ནར་བརྟེན་ནས་འཚོལ་དགོས། རྒྱ་ནག་གཞུང་གི་ལས་འགན་གཞན་ཞིག་ནི་ཧོང་ཀོང་རྒྱ་ནག་གི་མངའ་ཁོངས་སུ་རྩིས་ལེན་བྱེད་སྐབས་དཀའ་རྙོག་མི་ཡོང་བ་བྱེད་དགོས་པ་དང༌། དེ་བཞིན་དུས་བསྟུན་དངོས་ཡོད་གནས་ཚུལ་ལ་གཞིགས་པའི་རྣམ་དཔྱོད་ལྡན་པའི་སྲིད་བྱུས་རྒྱལ་ཁབ་གཅིག་ལ་ལམ་ལུགས་གཉིས་ཞེས་པ་འདི་ཁ་ཞེ་གཉིས་མེད་ཀྱི་ལག་ལེན་བསྟར་དགོས་པ་དེ་ཡིན། གོང་དུ་བརྗོད་པའི་གནད་དོན་རྣམས་ཀྱི་ཐད་དགེ་མཚན་ལྡན་པའི་ལག་ལེན་ཞིག་བསྟར་བ་ཡིན་ན་རྒྱ་ནག་ནང་ཁུལ་དང༌། རྒྱལ་སྤྱིའི་འབྲེལ་ལམ་གང་ཅི་ནས་ཆབ་སྲིད་ཀྱི་ཐོག་ཡིད་ཆེས་དང༌། གུ་ཡངས་ཀྱི་བསམ་ཤེས་ཐོབ་རྒྱུར་ཡང་ཕན་ཐོགས་ཆེན་པོ་ཡོང་རྒྱུ་ཡིན།
དེང་སྐབས་བོད་དོན་ལ་རྒྱལ་སྤྱིའི་ཐོག་ནས་རྒྱབ་སྐྱོར་ཇེ་ཆེར་འགྲོ་བཞིན་པ་འདིས་འགྲོ་བ་མིའི་དཀའ་ངལ་ལ་ཚང་མའི་སེམས་ནང་རང་བཞིན་ལྷན་སྐྱེས་ཀྱི་གདུང་སེམས་མཉམ་སྐྱེད་ཡོང་གི་ཡོད་པ་དང༌། བདེན་པ་དང་དྲང་བདེན་ལ་ཚང་མའི་སེམས་ནང་གཅེས་ཞེན་གྱི་བསམ་བློ་ཞིག་ཡོང་གི་ཡོད་པ་གསལ་པོར་མཚོན་ཡོད། བོད་དོན་ལ་རྒྱབ་སྐྱོར་བྱེད་པ་དེ་རྒྱ་ནག་ལ་མི་དགའ་བའི་ནུབ་ཕྱོགས་དགྲ་འཛིན་སྟོབས་ཤུགས་ཀྱི་བྱུས་ངན་རེད་ཟེར་བ་ནི། ཆབ་སྲིད་ཀྱི་ཁེ་ཕན་འགྲུབ་ཆེད་བདེན་པའི་གནས་ཚུལ་ལས་གཡོལ་ཐབས་བྱེད་པའི་ཐ་ཤལ་གྱི་བྱ་བ་བློ་ཕམ་བྱེད་འོས་པ་ཞིག་རེད། གང་ཡིན་ཞེ་ན། རང་ཉིད་ཀྱི་བསམ་བློར་འདི་ལྟ་བུའི་སྒྲིབ་གཡོག་གིས་བཀབ་ན་དཀའ་ངལ་སེལ་བའི་ཐབས་ལམ་རྙེད་མི་ཐུབ། བོད་ཀྱི་དཀའ་ངལ་ཕན་ཚུན་གཉིས་མོས་ཀྱི་ཐོག་ནས་སེལ་རྒྱུའི་ཐབས་ལམ་མཐར་ཐུག་དེ་བོད་མི་མང་དང༌། རྒྱའི་མི་མང་ནས་འཚོལ་དགོས་པའི་དངོས་ཡོད་ཀྱི་གནས་ཚུལ་འདི་སྙིང་ལ་བཅངས་ཏེ་ང་ཚོས་རྒྱ་ནག་གཞུང་དང་མུ་མཐུད་གྲོས་མོལ་འབྱུང་ཐབས་འབད་བརྩོན་བྱས་པ་ཡིན།
འོན་ཀྱང་རྒྱ་ནག་གཞུང་ནས་བོད་མི་མང་གི་དངོས་ཡོད་དཀའ་ངལ་སེལ་བའི་ང་ཚོའི་འབད་བརྩོན་ལ་བསམ་ཤེས་མ་བྱས་སྟབས་ང་ཚོའི་ཁྲིམས་མཐུན་དང་དྲང་བདེན་གྱི་རྩ་དོན་འདི་རྒྱལ་སྤྱིའི་ཐོག་མ་སྐྱེལ་མཐུ་མེད་བྱུང༌། བོད་མི་མང་རྣམས་གདུག་རྩུབ་ཀྱི་དྲག་གནོན་ཤིན་ཏུ་ཆེན་པོ་ཞིག་མྱངས་དང་མྱོང་བཞིན་ཡོད་ཀྱང༌། ཁོང་ཚོས་སྡུག་རུས་དང༌། སྙིང་སྟོབས། བཟོད་བསྲན་བཅས་ཧ་ཅང་ཆེན་པོ་བྱས་ཡོད། ད་དུང་ཡང་དྲང་བདེན་མིན་པའི་བྱ་སྤྱོད་དང༌། དྲག་གནོན་ལ་ངོ་རྒོལ་བྱེད་སྐབས་འུ་ཐུག་ཐབས་ཟད་ཀྱི་གནད་དོན་ཅི་འདྲ་ཞིག་བྱུང་རུང་དྲག་པོའི་ལམ་ལ་བསྐྱོད་མི་རུང་ཞེས་ངས་བོད་མི་རྣམས་ལ་འབོད་སྐུལ་ཞུ་རྒྱུ་ཡིན། གལ་སྲིད་ང་ཚོས་འཁོན་འཛིན་དང༌། ཐབས་ཟད་ཀྱི་དྲག་པོའི་ལམ་དུ་ཞུགས་པ་ཡིན་ན་ང་རང་ཚོ་ཡང་མནར་གཅོད་གཏོང་མཁན་ཚོ་དང་འདྲ་བར་སྨད་འོས་ཀྱི་གནས་སུ་ལྷུང་ངེས་ཡིན།
འཇིགས་སྐུལ་བྱེད་པ་དང༌། བཙན་དབང་གཏོང་བ། དྲག་ཤུགས་བེད་སྤྱོད་བྱེད་པ་བཅས་ནི་མནར་གཅོད་གཏོང་མཁན་གྱི་ལམ་སྲོལ་ཡིན་ཞིང༌། ང་ཚོའི་འཐབ་རྩོད་ཀྱི་གཞི་རྟེན་ནི་བདེན་དོན་དང༌། དྲང་བདེན། རྒྱུ་མཚན་ཡང་དག་པ་བཅས་ལ་བརྟེན་དགོས། འདི་ནི་ང་ཚོའི་ལག་ཆ་ནུས་པ་ཆེ་ཤོས་དེ་ཡིན། ད་ལྟ་དཀའ་ངལ་ཆེ་བའི་དུས་སྐབས་འདིར་ང་ཚོས་སེམས་ཤུགས་དང༌། ཤེས་རབ། བཟོད་བསྲན་བཅས་ལ་བརྟེན་ནས་འབད་བརྩོན་ཆེན་པོ་བྱེད་དགོས་པ་ཡིན་པས་དེ་ལྟར་འབོད་སྐུལ་ཞུ་རྒྱུ་ཡིན། བོད་མི་མང་གི་རང་དབང་ཆེད་དུ་ལུས་སྲོག་དོར་བའི་དཔའ་བོ་ཕོ་མོ་རྣམས་ལ་གུས་འདུད་དང༌། སྨོན་ལམ་བཅས།། །།
