ད་ཉིན་གསུམ་བཅུའི་དུས་དྲན་ཐེངས་བཞི་བཅུ་པའི་སྐབས་འདིར། ངོས་ནས་བོད་ཕྱི་ནང་དུ་ཡོད་པའི་རང་རིགས་སྤུན་ཟླ་རྣམས་དང༌། དེ་བཞིན་འཛམ་གླིང་གིས་ཁུལ་གང་སར་ཡོད་པའི་ང་ཚོའི་གྲོགས་པོ་ཁག ང་ཚོར་རྒྱབ་སྐྱོར་གནང་མཁན་བཅས་ཚང་མར་འཚམས་འདྲི་ཞུ་རྒྱུ་ཡིན།
ང་ཚོ་བཙན་བྱོལ་བར་གྱུར་ཏེ་མི་ལོ་བཞི་བཅུ་འགྲོ་གི་ཡོད་ཅིང༌། དེའི་རིང་བོད་ཕྱི་ནང་གཉིས་ཀའི་ཐོག་ནས་ང་ཚོའི་རང་དབང་གི་དོན་དུ་འཐབ་རྩོད་བྱས་ཡོད། མི་གཅིག་གི་མི་ཚེའི་ནང་ལོ་བཞི་བཅུ་ཟེར་བ་འདི་དུས་ཡུན་ཐུང་ཐུང་ཞིག་མིན། དེའི་རིང་བོད་ནང་གི་སྤུན་ཟླ་ཆེས་མང་དང༌། ༡༩༥༩ ལོར་བོད་ཡུལ་བཞག་སྟེ་བཙན་བྱོལ་ལ་ཡོང་མཁན་གྱི་བོད་མི་མང་པོ་ཞིག་འདས་གྲོངས་སོང་སྟེ། དེང་སྐབས་བོད་ཕྱི་ནང་གཉིས་ཀར་མི་རབས་གཉིས་པ་དང༌། གསུམ་པའི་ན་གཞོན་ཚོས་ལྷག་བསམ་སྙིང་སྟོབས་ཆེན་པོའི་སྒོ་ནས་བོད་ཀྱི་རང་དབང་འཐབ་རྩོད་ཀྱི་ལས་འགན་འཁུར་བཞིན་ཡོད། མི་ལོ་བཞི་བཅུའི་རིང་ང་ཚོ་བཙན་བྱོལ་བ་རྣམས་ནས་སྤྱི་ཚོགས་ལམ་ལུགས་མང་གཙོའི་ཕྱོགས་སུ་གོམ་པ་ཆེན་པོ་སྤོས་པའི་ཐོག ཤེས་ཡོན་སློབ་སྦྱོང་དང༌། རང་གི་ཐུན་མོང་མ་ཡིན་པའི་ཆོས་དང་རིག་གཞུང་མི་ཉམས་རྒྱུན་འཛིན་བྱས་པར་རྒྱལ་སྤྱིའི་ཐོག་ནས་གདེང་འཇོག་ཆེན་པོ་ཐོབ་ཡོད། གྲུབ་འབྲས་དེ་དག་ནི་བོད་མི་ཚོ་ནས་སྙིང་སྟོབས་ཆེན་པོས་འབད་བརྩོན་བྱས་པ་ལ། རྒྱལ་སྤྱིའི་ཚོགས་སྡེ་མང་པོ་ཞིག་དང༌། སྒེར་ཁག་གིས་རོགས་རམ་གནང་བ་དང༌། ལྷག་པར་རྒྱ་གར་གྱི་སྲིད་བློན་ནེ་ཧ་རུས་བོད་མི་ཚོ་རྒྱ་གར་ནང་བཙན་བྱོལ་དུ་བསྡད་འཐུས་ཞལ་བཞེས་ཐོག བོད་མིའི་སློབ་སྦྱོང་དང༌། གཞིས་ཆགས་ཀྱི་འཆར་གཞི་གཏན་འབེབས་གནང་བ་ནས་བཟུང་རྒྱ་གར་གཞུང་དང༌། མི་མང་གིས་སྣེ་ལེན་མཐུན་འགྱུར་ཧ་ཅང་ཡག་པོ་གནང་བ་བཅས་ལས་བྱུང་བ་ཡིན་པས་ང་ཚོས་བཀའ་དྲིན་རྗེས་དྲན་ཞུ་བཞིན་ཡོད།
འདས་པའི་མི་ལོ་བཞི་བཅུའི་རིང་རྒྱ་ནག་གཞུང་གིས་བོད་ལ་རང་འདོད་ལྟར་དབང་སྒྱུར་བྱས་ཡོད་ཅིང༌། པཎ་ཆེན་རིན་པོ་ཆེ་སྐུ་གོང་མས་ ༡༩༦༢ ལོར་ཕྱོགས་བསྡོམས་གནང་བའི་ཡིག་འབྲུ་ཁྲི་བདུན་གྱི་སྙན་ཞུའི་ནང་རྒྱ་མིས་བོད་ནང་གདུག་རྩུབ་བཙན་དབང་ཇི་ལྟར་བྱས་པའི་ལོ་རྒྱུས་རྣམས་གསལ་པོར་འཁོད་ཡོད་པ་དང༌། དེ་རྗེས་རིག་གནས་གསར་བརྗེ་ཟེར་བའི་ལས་འགུལ་སྐབས་གཏོར་བཤིག་དང༌། མི་མང་གིས་སྡུག་བསྔལ་ཇི་ལྟར་མྱངས་པ་ཡོངས་གྲགས་ལྟར་བློ་ཕམ་ཡིད་སྐྱོའི་རང་བཞིན་ལས་མ་མཆིས་པས་ཞིབ་གསལ་བརྗོད་འདོད་མེད། ༡༩༨༩ ལོར་པཎ་ཆེན་རིན་པོ་ཆེ་སྐུ་གཤེགས་ཉེར་གནང་བའི་ཡོངས་ཁྱབ་གསུང་བཤད་ནང༌། བོད་ཡར་རྒྱས་བཏང་ནས་ཐོབ་པའི་ཁེ་ཕན་ལས། གཏོར་བཤིག་བཏང་བ་དང༌། བོད་མིས་དཀའ་སྡུག་མྱངས་པའི་གྱོང་གུན་ཆེ་བ་བྱུང་ལུགས་གསལ་པོ་གསུངས་ཡོད།
ད་ཕན་བོད་ནང་སྤྱིར་ན་དཔལ་འབྱོར་འཛུགས་སྐྲུན་ཡར་རྒྱས་ཕྲན་བུ་ཕྱིན་ཡོད། འོན་ཀྱང་ལོ་རྒྱུས་དང༌། ཆོས་དང་རིག་གཞུང༌། སྐད་ཡིག ཡུལ་སྲོལ་གོམས་གཤིས། ས་བབས་གནས་སྟངས་སོགས་གང་ཅིའི་ཐད་བོད་རྒྱ་གཉིས་མི་འདྲ་བའི་དབང་གིས་ཕན་ཚུན་ལྟ་སྤྱོད་མི་མཐུན་པ་དང༌། བློ་འདོད་མ་ཁེངས་པ། ཡིད་ཆེས་མེད་པ་བཅས་ཀྱི་གཞི་རྩའི་དཀའ་ངལ་ཆེན་པོ་ཞིག་ད་ལྟའང་ཡོད་མུས་ཡིན། བོད་མིའི་ཕྱོགས་ནས་མི་མཐུན་པའི་རྣམ་འགྱུར་ཅུང་ཟད་ཐོན་མ་ཐག་རྒྱའི་དབང་འཛིན་པ་ཚོས་དེ་འཕྲལ་དྲག་རྩུབ་བཙན་གནོན་གྱིས་བོད་ནང་འགྲོ་བ་མིའི་ཐོབ་ཐང་བརྡལ་བཤིག་ཚབས་ཆེན་གཏོང་གི་ཡོད། བོད་ཀྱི་རིག་གཞུང་དང༌། མི་རིགས་ཀྱི་ངོ་བོ་གཅེས་སྲུང་བྱེད་པའི་བྱ་སྤྱོད་བཀག་འགོག་བྱེད་པ་དེ་ནི་བོད་ནང་འགྲོ་བ་མིའི་ཐོབ་ཐང་བརྡལ་བཤིག་གཏོང་བའི་དམིགས་བསལ་གྱི་བྱེད་སྟངས་ཤིག་ཡིན། དེ་ནི་མི་རིགས་དང༌། རིག་གཞུང་དབྱེ་འབྱེད་མཐོང་ཆུང་བྱས་པ་ལས་བྱུང་བ་ཞིག་དང༌། དཀའ་རྙོག་འདིའི་ངོ་བོ་ཤིན་ཏུ་གཏིང་ཟབ་ཡོད་པའི་རྟགས་མཚན་ཞིག་ཀྱང་ཡིན།
རྒྱའི་དབང་འཛིན་པ་ཚོས་བོད་མིས་མི་འདོད་པའི་རྣམ་འགྱུར་བསྟན་པ་འདིའི་འབྱུང་རྩ་བོད་ཀྱི་ཆོས་དང་རིག་གཞུང་ལ་ཐུག་པར་ངོས་འཛིན་བྱས་ཏེ་བོད་མི་རིགས་ཀྱི་ངོ་བོ་དང༌། རིག་གཞུང་གི་སྙིང་པོ་རྣམས་ཉམས་དམས་རྩ་བརླག་ཏུ་གཏོང་རྒྱུའི་དམིགས་ཡུལ་བཟུང་སྟེ་འབད་བརྩོན་བྱེད་བཞིན་འདུག བོད་བཅིངས་འགྲོལ་བཏང་ལུགས་བཤད་དེ་མི་ལོ་ལྔ་བཅུ་སོང་ཡང༌། བོད་ཀྱི་རྩོད་རྙོག་གསོན་ཤུགས་ཆེན་པོར་གནས་ཏེ་ད་དུང་ཡང་དཀའ་ངལ་སེལ་ཐུབ་མེད། བོད་དང་རྒྱ་ནག་གཉིས་ཀར་ཕན་ཐོགས་གཏན་ནས་མེད་པའི་ད་ལྟའི་ལམ་ཕྱོགས་འདི་གའི་ཐོག་མུ་མཐུད་ཕྱིན་ན་བོད་མིའི་དཀའ་ངལ་སེལ་མི་ཐུབ་ལ། རྒྱ་ཕྱོགས་ལ་ཡང་བརྟན་ལྷིང་དང་ཆིག་སྒྲིལ་འབྱུང་མི་ཐུབ་ཅིང༌། རྒྱལ་སྤྱིའི་ནང་རྒྱ་ནག་གི་མིང་མཐོང་ལ་ཡང་གནོད་རྐྱེན་ཡོང་ངེས་ཡིན། བོད་རྒྱའི་དཀའ་རྙོག་སེལ་ཐབས་ནི་འགན་ཁུར་བླངས་ཏེ་རྒྱུ་མཚན་ལྡན་པའི་གྲོས་མོལ་བྱ་རྒྱུ་ལས་ཐབས་ལམ་གཞན་མེད།
དངོས་དོན་དེ་ལ་བསྟུན་ཏེ། ལོ་རབས་བདུན་ཅུའི་འགོ་སྟོད་དུ་ངོས་ནས་གཞུང་ཞབས་རྒན་གྲས་འགའ་ཞིག་དང་གོ་བསྡུར་ཐོག་དབུ་མའི་ལམ་ཕྱོགས་ཀྱི་དོན་ཚན་གཙོ་ཆེ་བ་ཁག་གཏན་འབེབས་བྱས་ཤིང༌། དེའི་ནང་བོད་རང་བཙན་དང༌། ཁ་བྲལ་མིན་པར་རྒྱ་ནག་མི་མང་སྲིད་གཞུང་གི་ནང་ཁོངས་སུ་སྡོད་རྒྱུ་དང༌། བོད་མི་རིགས་ལའང་གཞི་རྩའི་ཐོབ་ཐང་ཁག་དང༌། རང་དབང་ཆ་ཚང་ཡོད་པ་བཅས་ཀྱི་ཐོག་ནས་བོད་རྒྱའི་དཀའ་རྙོག་སེལ་ཐབས་ཡོད་པར་ཡིད་ཆེས་བྱས་ཡོད། ངོས་ནས་བྱམས་སྙིང་རྗེ་དང༌། འཚེ་མེད་ཞི་བའི་ལམ་གྱི་རྨང་གཞིར་གྱུར་པའི་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་ཡོང་ཐབས་བྱ་རྒྱུ་གལ་གནད་ཆེན་པོར་ངོས་འཛིན་བྱེད་ཀྱི་ཡོད་ཅིང༌། དེ་ལྟ་བུའི་རིག་གཞུང་འདི་ནི་དེང་གི་དུས་རབས་ལ་ཕན་ཐོགས་ཡོད་པ་ཞིག་ཡིན་སྟབས། མི་ཉམས་གོང་སྤེལ་བྱེད་འོས་ངེས་ཡིན། ༡༩༧༨ ལོའི་ལོ་མཇུག་ཏུ་ཏེང་ཞའོ་ཕིང་གིས་ང་ཚོར་འབྲེལ་བའི་ཐོག་གྲོས་མོལ་བྱེད་རྒྱུའི་རྣམ་འགྱུར་བསྟན་མ་ཐག་ངོས་ནས་དེ་འཕྲལ་བརྡ་ལན་བྱས་པ་ཡིན།
འོན་ཀྱང་དོན་དངོས་ཐོག་རྒྱ་ནག་དང༌། ང་ཚོའི་བར་གྱི་འབྲེལ་ལམ་དེར་འགྱུར་བ་འདྲ་མིན་སྣ་ཚོགས་ཤིག་བྱུང་ཡོད། བློ་ཕམ་པ་ཞིག་ལ། ངོས་ནས་འབད་བརྩོན་ཇི་ལྟར་བྱས་ཀྱང་རྒྱ་ནག་གི་འགོ་ཁྲིད་ཚོའི་ངོས་ནས་ཆབ་སྲིད་ཀྱི་སྙིང་སྟོབས་མ་ལྡངས་པ་ལྟ་བུས་བདག་སྤྲོད་ཇི་བཞིན་མ་བྱས་པར་བརྟེན། ༡༩༩༣ ལོའི་ཕྱི་ཟླ་ ༨ པར་ང་ཚོའི་བར་གཞུང་འབྲེལ་གྱི་འབྲེལ་བ་མཚམས་ཆད་པ་དང༌། དེ་རྗེས་མི་སྒེར་པ་དང༌། ཕྱེད་གཞུང་འབྲེལ་གྱི་འབྲེལ་ལམ་འགའ་ཤས་བྱུང་ཞིང༌། འདས་པའི་ལོ་ཕྱེད་གཉིས་ཙམ་རིང་འབྲེལ་ལམ་གཅིག་ལ་ངེས་གཏན་དང་དོན་ཕན་གྱི་རྣམ་པ་ཅུང་ཟད་ཐོན་ཞིང༌། སྲིད་འཛིན་ཅང་ཙེ་མིན་རང་ཉིད་ནས་ཀྱང་བོད་དོན་ཐོག་དོ་སྣང་གནང་གི་ཡོད་པའི་མངོན་རྟགས་གསལ་པོ་བྱུང༌།
སྔ་ལོ་ཕྱི་ཟླ་ ༦ པའི་ནང་ཨ་རིའི་སྲིད་འཛིན་པེ་ཅིང་དུ་ཕེབས་སྐབས་ཅང་ཙེ་མིན་གྱིས་བོད་དོན་ཐོག་གླེང་མོལ་རྒྱུན་རིང་གནང་ཞིང༌། སྲིད་འཛིན་རྣམ་གཉིས་ནས་གསར་འགོད་པ་མཇལ་འཕྲད་སྐབས་སུ་ཅང་ཙེ་མིན་གྱིས་བོད་དོན་སྐོར་གྲོས་མོལ་འགོ་འཛུགས་མ་བྱས་གོང་ཏཱ་ལའི་བླ་མས་དོན་ཚན་གཉིས་ལ་ཡོངས་བསྒྲགས་གསལ་བཤད་དགོས་ཚུལ་གསུངས་ཡོད། ང་ཚོའི་ངོས་ནས་དེ་དོན་གསལ་བཤད་བྱ་རྒྱུ་དང༌། དེ་ཡང་ཕྱི་ལ་ཡོངས་བསྒྲགས་མ་བྱས་གོང་ནང་དོན་གོ་བསྡུར་བྱེད་འདོད་ཡོད་ལུགས་གསལ་པོར་བརྗོད་དེ་བརྡ་ལན་བཟང་པོ་ཞིག་ཡོང་རེ་བྱས་ཀྱང་བརྡ་ལན་གང་ཡང་མ་བྱུང༌། རྒྱུ་རྐྱེན་གང་ཡང་མེད་པར་སྔ་ལོའི་སྟོན་མཇུག་ནས་བཟུང་རྒྱ་ཕྱོགས་ནས་བོད་རྒྱའི་གྲོས་མོལ་དང༌། ངོས་ལ་ལྟ་སྟངས་ཐད་མངོན་གསལ་དུ་མཁྲེགས་བཟུང་གི་རྣམ་འགྱུར་ཇེ་སྡུག་ཏུ་བཏང་སོང་ཞིང༌། གློ་བུར་གྱི་འགྱུར་བ་དེ་དང་འབྲེལ་བར་བོད་ནང་སླར་ཡང་གདུག་རྩུབ་དྲག་ཤུགས་ཆེ་རུ་བཏང་བ་བཅས་ད་ལྟ་ང་ཚོ་དང་རྒྱ་ནག་གཞུང་བར་འབྲེལ་བའི་གནས་སྟངས་འདི་འདྲ་ཞིག་ཏུ་གནས་ཡོད།
འདས་པའི་ལོ་བཅུ་ཕྲག་འགའ་ཤས་ཀྱི་ཉམས་མྱོང་ལ་གཞིགས་ན། གཞུང་འབྲེལ་གསལ་བསྒྲགས་ཡིག་ཆ་དང༌། གཏམ་བཤད་འདྲ་ཆགས་པོ་ཡོད་ཀྱང༌། ཆབ་སྲིད་འཁྲབ་སྟོན་གྱི་རྣམ་འགྱུར་མཁས་པོ་གཅིག་པུས་མི་མང་གི་སྡུག་བསྔལ་ཆུང་དུ་གཏོང་མི་ཐུབ་ལ། མདུན་དུ་ལྷགས་པའི་དཀའ་ངལ་ཡང་སེལ་མི་ཐུབ། བཙན་དབང་དྲག་ཤུགས་ཀྱིས་མིའི་ལུས་ལ་དབང་སྒྱུར་ཐུབ་ན་ཡང༌། མིའི་བསམ་བློའི་འགྱུར་བ་ནི་རྒྱུ་མཚན་ལྡན་ཞིང་དྲང་བདེན་ཁོ་ནས་མ་གཏོགས་འབྱུང་མི་ཐུབ་པ་གསལ་པོ་ཡིན། འོ་ན་གང་བྱེད་དགོས་ཟེར་ན༑ ཆབ་སྲིད་ཀྱི་སེམས་ཤུགས་ལ་བརྟེན་ནས་རྒྱང་རིང་གི་ཁེ་ཕན་ལ་བསམ་གཞིགས་ཀྱིས་དཀའ་གནད་ཀྱི་རྩ་བར་གཏུགས་ཐོག་མི་མང་ལ་འདོད་པ་ཁེངས་པའི་ཁེ་ཕན་ཞིག་ཡོད་པ་བྱས་ནས་དཀའ་ངལ་སེལ་ཐུབ་པ་བྱེད་དགོས། དེ་ལྟར་གཉིས་མོས་ཀྱི་ལམ་ནས་བོད་རྒྱའི་དཀའ་རྙོག་སེལ་ཐུབ་པ་བྱུང་མཚམས་ལོ་ཤས་གོང་དུ་བརྗོད་ཟིན་པ་ལྟར། ངོས་ནས་བོད་ཀྱི་ཆབ་སྲིད་འགན་ཁུར་མཚམས་འཇོག་རྒྱུ་ཡིན།
བོད་རྒྱའི་དཀའ་རྙོག་འདི་ནི་ལྟ་བ་འདྲ་མིན་དང༌། སྤྱི་ཚོགས་ཀྱི་ལམ་ལུགས་འདྲ་མིན་ལས་བྱུང་བ་ཞིག་གམ། ཡང་ན་གོམས་གཤིས་རྙིང་པ་དང༌། གསར་བརྗེའི་བར་གྱི་འགལ་བས་བྱུང་བ་ཞིག་མིན་ལ། འགྲོ་བ་མིའི་ཐོབ་ཐང་གི་གནད་དོན་གཅིག་པུ་ཡང་མིན། དེ་ནི་དུས་རབས་མང་པོའི་གོང་ནས་ཡོད་པའི་རྒྱལ་རབས་ལོ་རྒྱུས་དང༌། རིག་གཞུང༌། མི་རིགས་ཀྱི་ངོ་བོ་བཅས་ཐུན་མོང་མ་ཡིན་པའི་ཁྱད་ཆོས་དང་འབྲེལ་བའི་གནད་དོན་དཀའ་རྙོག་གཏིང་ཟབ་ཅན་ཞིག་ཡིན། ༡༩༧༨ ལོའི་ལོ་མཇུག་གི་དུས་སྐབས་བཞིན་དཀའ་རྙོག་ཚབས་ཆེ་འདི་དག་ངོ་ཐུག་གྲོས་མོལ་བྱས་ཏེ་སེལ་ཐབས་བྱེད་དགོས་པ་དང༌། ཐོག་མར་བོད་རྒྱ་བར་ཡིད་ཆེས་བརླག་པའི་ཚོར་སྣང་མེད་པ་བཟོ་དགོས། དེ་ནི་ཉིན་གཅིག་ལ་བཟོ་ཐུབ་པ་ཞིག་མིན་པས་ཕན་ཚུན་ངོ་འཕྲད་ཐོག་ལྷག་བསམ་རྣམ་དག་ངང་གྲོས་མོལ་བྱས་ཏེ་སེལ་ཐབས་བྱེད་དགོས།
ངོས་ཀྱི་མཐོང་ཚུལ་ལྟར་ན། རྒྱ་ནག་གི་འགོ་ཁྲིད་པ་ཚོ་དོགས་པ་རྣམ་རྟོག་ཤིན་ཏུ་ཆེ་བའི་དབང་གིས་ངོས་ནས་ལྷག་བསམ་རྣམ་དག་གིས་བོད་རྒྱའི་དཀའ་རྙོག་སེལ་ཐབས་དང༌། གནད་དོན་གཞན་དག་སྐོར་བསམ་ཚུལ་རིམ་བརྗོད་རྣམས་དང་ལེན་བྱ་རྒྱུར་འགོག་རྐྱེན་བཟོ་གི་འདུག དཔེ་མཚོན་གསལ་ཤོས་ཤིག་ལ། བོད་ས་མཐོའི་ཁོར་ཡུག་འགྱུར་རྐྱེན་ཆེ་བས་ཁུལ་དེའི་བྱ་གཞག་ལ་ཡིད་གཟབ་དགོས་པའི་འབོད་སྐུལ་ལོ་མང་གོང་ནས་རིམ་པར་བྱས་ཡོད། དེ་ཡང་བོད་གཅིག་པུའི་ཁེ་ཕན་ཆེད་མིན་ཏེ། བོད་ནང་ཁོར་ཡུག་གི་གནས་སྟངས་འགྱུར་ལྡོག་ཆེན་པོ་བྱུང་ན་རྒྱ་ནག་གི་ཡུལ་གྲུ་མང་པོ་དང༌། ཉེ་འཁོར་རྒྱལ་ཁབ་གཞན་དག་ལ་ཡང་གནོད་སྐྱོན་ཡོང་རྒྱུར་བརྟེན་འབོད་སྐུལ་དེ་ལྟར་བྱས་པ་ཡིན། འོན་ཀྱང་བློ་ཕམ་པ་ཞིག་ལ་སྔ་ལོ་རྒྱ་ནག་ནང་ཁུལ་ཆུ་ལོག་ཆེན་པོ་མ་བྱུང་བར་རྒྱ་ནག་གི་འགོ་ཁྲིད་ཚོས་གནད་དོན་དེ་ལ་དོ་སྣང་བྱས་མ་སོང༌། ད་ཆ་བོད་ཀྱི་ས་ཁུལ་ཁག་ལ་ཤིང་ནགས་གཅོད་བྲེགས་མཚམས་འཇོག་དགོས་པའི་བཀའ་ཁྱབ་བཏང་བ་ལ་དགའ་བསུ་ཞུ་རྒྱུ་དང༌། ད་དུང་ཡང་བོད་ཀྱི་ཁོར་ཡུག་སྲུང་སྐྱོབ་ཆེད་དུ་ལས་དོན་ཁག་མང་བསྒྲུབ་རྒྱུའི་རེ་བ་ཡོད། ངོས་ནས་བོད་དོན་གྱི་དཀའ་རྙོག་གྲོས་མོལ་གྱི་ལམ་ནས་སེལ་ཐབས་བྱ་རྒྱུ་འདི་ལ་འགྱུར་བ་གང་ཡང་མེད་ཅིང༌། རང་བཙན་ཡང་རྩོད་ཀྱི་མེད།
ངའི་རེ་བ་ནིབོད་རྒྱའི་གྲོས་མོལ་གང་མགྱོགས་འགོ་འཛུགས་ཐུབ་པ་ཞིག་དང༌། བོད་མི་རིགས་ལ་རང་སྲིད་རང་སྐྱོང་གི་ཐོབ་དབང་ཚད་ལྡན་ཡོད་པའི་ཐོག་ནས་ཆོས་དང༌། རིག་གཞུང༌། སྐད་ཡིག སྤྱི་ཚོགས་ཀྱི་དཔལ་འབྱོར་སོགས་ཡར་རྒྱས་གཏོང་ཐུབ་པ་དགོས་རྒྱུ་འདི་ཡིན། དབུ་མའི་ལམ་ཕྱོགས་འདི་ལ་བརྟེན་ནས་རྒྱ་ནག་མི་མང་སྲིད་གཞུང་ནང་བརྟན་ལྷིང་ཆིག་སྒྲིལ་ཡོང་རྒྱུ་དང༌། བོད་མི་རིགས་ལ་ཡང་ཞི་བདེ་དང༌། མིའི་ཐོབ་ཐང་ལྡན་པའི་སྒོ་ནས་མི་ཚེ་སྐྱེལ་རྒྱུའི་གོ་སྐབས་ཡོང་བ་བྱ་རྒྱུར་ཕན་ཐོགས་ཡོང་བའི་ཡིད་ཆེས་ཡོད། རྒྱ་ཕྱོགས་ནས་དྲང་བདེན་གྱི་ལམ་ནས་བོད་རྒྱའི་དཀའ་རྙོག་སེལ་བ་ཡིན་ན། ངོས་ལ་བོད་རྒྱ་ཆེའི་མི་མང་གིས་ཡིད་ཆེས་བློས་འགེལ་བྱེད་པའི་གོ་སྐབས་འདི་བཟུང་སྟེ་བོད་རྒྱ་ཁ་བྲལ་དུ་མི་འགྲོ་བའི་འབོད་སྐུལ་བྱེད་ཐུབ།
ངོས་རང་བོད་མི་མང་གི་མགྲིན་ཚབ་པ་རང་དབང་ཅན་ཞིག་ཡིན་པའི་ཆ་ནས་བོད་ཀྱི་དཀའ་རྙོག་སེལ་བའི་ཐབས་ཤེས་སྒོ་གང་ས་ནས་བྱས་པ་ལ་སྲིད་གཞུང་ཁག་དང༌། གྲོས་ཚོགས་ཁག་མང༌། གཞུང་འབྲེལ་ཡིན་མིན་ཚོགས་པ་ཁག གཞན་ཡང་སྤྱིར་བཏང་མི་མང་ཁག་བཅས་ནས་རྒྱབ་སྐྱོར་ཤུགས་ཆེ་གནང་བ་དང༌། ལྷག་པར་ཨ་རིའི་སྲིད་འཛིན་ཁི་ལིན་ཊོན་དང་ཁོང་གི་སྲིད་གཞུང་ནས་བོད་རྒྱའི་རྩོད་རྙོག་གྲོས་མོལ་གྱི་ལམ་ནས་འགྲིགས་ཐབས་ལ་ཐུགས་ཁུར་ཆེ་བཞེས་གནང་བར་མ་ཟད། ཨ་རིའི་གྲོས་ཚོགས་གོང་འོག་གི་སྲིད་དོན་ཚོགས་པ་ཁག་ཚང་མས་ཀྱང་བོད་དོན་ལ་རྒྱབ་སྐྱོར་ཤུགས་ཆེ་གནང་མུས་བཅས་ཀྱིས་ང་ཚོའི་བློ་སྟོབས་འཕེལ་བསྐྱེད་ཆེན་པོ་བྱུང་བས་ཚང་མར་ཐུགས་རྗེ་ཆེ་ཞུ་རྒྱུ་ཡིན།
བོད་མིའི་དཀའ་སྡུག་མྱོང་ཚུལ་དང༌། ང་ཚོས་འཚེ་མེད་ཞི་བའི་སྒོ་ནས་རང་དབང་འཐབ་རྩོད་བྱེད་པ་འདིས་འཛམ་གླིང་གང་སར་དྲང་བདེན་རྩ་ཆེར་འཛིན་མཁན་མང་པོར་སེམས་འགུལ་ཆེན་པོ་ཐེབས་ཡོད། འདས་པའི་ལོའི་ནང་རྒྱལ་སྤྱིའི་ཐོག་བོད་དོན་ལ་དོ་སྣང་བྱེད་པའི་གནས་ཚུལ་ནི་སྔར་བྱུང་མྱོང་མེད་པའི་ཚད་མཐོར་སོན་པ་དང༌། དེང་སང་བོད་དོན་ཐོག་གདུང་སེམས་མཉམ་བསྐྱེད་བྱེད་མཁན་འགྲོ་བ་མིའི་ཐོབ་ཐང་གི་ཚོགས་པ་ཁག་དང༌། སྲིད་གཞུང་དང་གྲོས་ཚོགས་ཁག་ཙམ་མ་ཡིན་པར། གཙུག་ལག་སློབ་གཉེར་ཁང་ཆེ་ཁག་དང༌། སྤྱིར་བཏང་གི་སློབ་གྲྭ་ཁག ཆོས་ལུགས་དང༌། སྤྱི་ཚོགས་ནང་གི་ཚོགས་སྡེ་འདྲ་མིན་ཁག སྒྱུ་རྩལ་མཁན་དང༌། ཚོང་རིགས་མི་སྣ། སྤྱིར་བཏང་གི་མི་མང་བཅས་ནས་རྒྱབ་སྐྱོར་དང༌། གདུང་སེམས་མཉམ་བསྐྱེད་བྱེད་བཞིན་ཡོད། རྒྱ་ཆེའི་མི་མང་ནས་བོད་དོན་ལ་སེམས་འཁུར་ཤུགས་ཆེ་བྱས་པའི་དབང་གིས་སྲིད་གཞུང་དང༌། གྲོས་ཚོགས་ཁག་མང་གིས་རྒྱ་ནག་གཞུང་དང་གྲོས་མོལ་བྱེད་སྐབས་བོད་ཀྱི་སྐོར་གླེང་མོལ་བྱ་རྒྱུ་གནད་དོན་གལ་ཆེའི་གྲས་སུ་འཇོག་གི་ཡོད།
འགྲོ་བ་མིའི་ཐོབ་ཐང་དང༌། མང་གཙོའི་ལས་འགུལ་སྤེལ་མཁན་རྒྱ་རིགས་ཀྱི་སྤུན་ཟླ་ཕོ་མོ་ཚོ་དང༌། རྒྱ་རིགས་ནང་ཆོས་ལ་དད་ཅན། སྤྱིར་བཏང་ཕྱིར་སྡོད་རྒྱ་རིགས། ཐེ་ཝན་མི་མང་བཅས་པ་དང་ང་ཚོའི་བར་གྱི་འབྲེལ་བ་ཇེ་ཟབ་དང་རྒྱ་ཆེར་སོང་ཡོད། རྒྱ་རིགས་སྤུན་ཟླ་ཕོ་མོའི་ནང་ནས་ང་ཚོར་རྒྱབ་སྐྱོར་དང༌། གདུང་སེམས་མཉམ་བསྐྱེད་བྱུང་བ་འདིས་ང་ཚོའི་སེམས་ཤུགས་དང་རེ་བ་ཇེ་ཆེར་སོང༌། ལྷག་པར་རྒྱ་ནག་ནང་གནས་འཁོད་རྒྱ་རིགས་སྙིང་སྟོབས་ཅན་ཚོས་རྒྱ་ནག་གཞུང་ལ་འབོད་སྐུལ་དང༌། བསམ་འཆར་ཡོངས་བསྒྲགས་བྱས་ཏེ་རྒྱ་ནག་གཞུང་གིས་བོད་དོན་ཐོག་འཛིན་པའིསྲིད་བྱུས་འདི་དག་སྒྱུར་བཅོས་གཏོང་དགོས་པའི་འབོད་སྐུལ་བྱས་པ་ནས་ངོས་རང་ལ་སེམས་འགུལ་ཆེན་པོ་ཐེབས་བྱུང༌།
ད་ལྟའི་ཆར་རྒྱ་ནག་གཞུང་གིས་བོད་དོན་སྐོར་མཁྲེགས་བཟུང་བྱེད་ཀྱི་ཡོད་ན་ཡང༌། དེང་སང་རྒྱལ་སྤྱིའི་ཐོག་བོད་ཀྱི་རང་དབང་འཐབ་རྩོད་ཀྱི་གནས་བབ་ནི་སྔར་དང་མི་འདྲ་བའི་བཟང་པོ་ཡོད་པར་བརྟེན། བོད་རྒྱ་བར་དོན་ཕན་ལྡན་པའི་གྲོས་མོལ་ཡོང་བའི་དུས་སྐབས་བཟང་པོ་ཞིག་ལ་ངོས་འཛིན་བྱེད་ཀྱི་ཡོད། རྒྱལ་སྤྱིའི་ནང་ང་ཚོར་རྒྱབ་སྐྱོར་གནང་མཁན་སྲིད་གཞུང་དང༌། གྲོས་ཚོགས་ཁག མི་མང་བཅས་ཚང་མར་སྔར་ལྷག་སེམས་ཤུགས་དང་སྙིང་སྟོབས་བསྐྱེད་དེ་རྒྱབ་སྐྱོར་མུ་མཐུད་གནང་རོགས་ཞེས་འབོད་སྐུལ་ཞུ་རྒྱུ་ཡིན། འདི་ལྟ་བུའི་རྒྱལ་སྤྱིའི་སེམས་ཁུར་དང༌། རྒྱབ་སྐྱོར་ཡོད་པའི་རྣམ་འགྱུར་ནི་ང་ཚོར་ཤིན་ཏུ་དགོས་གལ་ཆེན་པོ་ཡིན་ཞིང༌། རྒྱལ་སྤྱིའི་རྣམ་འགྱུར་དེ་ལ་བརྟེན་ནས་རྒྱ་ནག་གི་དཔོན་རིགས་རྣམས་ལ་བོད་ཀྱི་གནད་དོན་འདི་དཀའ་རྙོག་ཛ་དྲག་ཅན་ཞིག་ཡིན་པ་དང༌། གལ་གནད་ཆེན་པོར་བཟུང་སྟེ་འོས་འཚམས་ཀྱི་སེལ་ཐབས་བྱེད་དགོས་པའི་འགུལ་ཤུགས་སྐུལ་བརྡ་ཞིག་ཏུ་འགྱུར་ངེས་ཡིན། ད་ཕན་བོད་རང་དབང་གི་ཆེད་ལུས་སྲོག་དོར་བའི་དཔལ་བོ་ཕོ་མོ་རྣམས་ལ་གུས་འདུད་དང༌། བོད་ནང་གི་དཀའ་སྡུག་མྱུར་དུ་སེལ་ཐུབ་པའི་སྨོན་ལམ་བཅས།། །།
