༄༅། །ཕྱི་ལོ་ ༢༠༢༥ ཟླ་ ༡༢ ཚེས་ ༢༥ ནས་ ༢༧ བར་ཉིན་གྲངས་གསུམ་དང་། ཕྱི་ལོ་ ༢༠༢༦ ཟླ་ ༡ ཚེས་ ༢༢ ནས་ ༢༥ བར་ཉིན་གྲངས་བཞི་བཅས་ཁྱོན་ཉིན་གྲངས་བདུན་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཀར་རྟེན་གཞི་བྱས་པའི་མོན་གྷོ་འདོད་རྒུ་གླིང་གི་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཆོས་གྲྭའི་ནང་། དགེ་འདུན་བཅུ་ཚོགས་ཀྱི་དབུས་སུ། འབྲས་སྤུངས་བློ་གསལ་གླིང་དང་སྒོ་མང་། དགའ་ལྡན་བྱང་རྩེ་དང་ཤར་རྩེ་བཞིས་གཙོས་དགོན་སྡེ་གྲྭ་ཚང་བཅོ་ལྔའི་བསྒྲུབ་བྱ་ ༣༦༩ ལ་ད་ཆོག་ཉེས་མེད་ཕུན་ཚོགས་ཀྱི་སྒོ་ནས་ཚངས་པར་སྤྱོད་པའི་གཙོ་བོ་བསླབ་གཞི་ཡོངས་སུ་རྫོགས་པ་བསྙེན་རྫོགས་ཀྱི་སྡོམ་པ་རྣམ་པར་དག་པ་སྩལ།
ྋགོང་ས་ྋསྐྱབས་མགོན་ཆེན་པོ་མཆོག་གིས་རབ་བྱུང་བཅུ་དྲུག་པའི་ཤིང་རྟ་ཆོ་འཕྲུལ་ཟླ་བ་སྔ་མའི་ཚེས་ ༡༥ ཕྱི་ལོ་ ༡༩༥༤ ཟླ་ ༢ ཚེས་ ༡༧ ཉིན་ལྷ་ལྡན་གཙུག་ལག་ཁང་གི་རྟེན་གཙོ་ཇོ་བོ་ཤཱཀྱ་མུ་ནེ་དང༌། རྒྱལ་མཆོག་སྐུ་ཕྲེང་རིམ་པའི་ཐུགས་དམ་གྱི་རྟེན་ཐུབ་དབང་རྟ་ཟུར་མ། འདུལ་བ་ལུང་སྡེ་བཞིའི་གླེགས་བམ། སྒྲོལ་མ་གླིང་དགའ་མ་རྣམས་བཞུགས་སུ་གསོལ་བའི་སྤྱན་སྔར། གངས་ཅན་འདུལ་འཛིན་ཀུན་གྱི་ཏོག་ལྟ་བུ་བརྟན་མཁས་ཀྱི་དཔལ་ཡོན་ཡོངས་སུ་མངའ་བ་ཡོངས་འཛིན་ཆེ་བ་ཤར་པ་ཆོས་རྗེ་གླིང་རིན་པོ་ཆེ་ཐུབ་བསྟན་ལུང་རྟོགས་རྣམ་རྒྱལ་འཕྲིན་ལས་དཔལ་བཟང་པོས་མཁན་སློབ་སྦྲགས་མ་དང༌། དགའ་ལྡན་ཁྲི་རིན་པོ་ཆེ་ཐུབ་བསྟན་ཀུན་དགས་དུས་གོ་བ། ཡོངས་འཛིན་ཆུང་བ་ཁྲི་བྱང་རིན་པོ་ཆེས་གསང་སྟོན་པ། དགའ་ལྡན་ཁྲི་ཟུར་བློ་གླིང་མི་ཉག་བཀྲ་ཤིས་སྟོང་འདུས་དང༌། བྱང་རྩེ་ཆོས་རྗེ། མཚན་ཞབས་རྣམ་པ་བཅས་ཀྱིས་ལས་གྲལ་ཁ་སྐོང་མཛད་དེ། འདུལ་བ་འཛིན་པ་དགེ་འདུན་བཅུ་ཕྲག་གི་དབུས་སུ་བསླབ་གཞི་ཡོངས་སུ་རྫོགས་པའི་དགེ་སློང་གི་བསླབ་སྡོམ་རྣམ་པར་དག་པར་ནོད་བཞེས་བཀའ་དྲིན་ཆེ་ཞིང་། ས་ཕག་ཟླ་ ༡༡ ཚེས་ ༢༡ ཕྱི་ལོ་ ༡༩༦༠ ཟླ་ ༡ ཚེས་ ༡༩ ཉིན། བྲག་གཡབ་ཧོ་ཐོག་ཐུ་ངག་དབང་བློ་བཟང་བསྟན་འཛིན་ཆོས་ཀྱི་རྒྱལ་མཚན་སོགས་བསྒྲུབ་བྱ་ ༡༥ ལ་གནས་མཆོག་ཝཱ་རཱ་ཎ་སཱིའི་སི་ལོན་གཙུག་ལག་ཁང་དུ་བསྙེན་རྫོགས་ཐོག་མར་སྩལ་བ་ནས་ད་བར་བསྒྲུབ་བྱ་ ༡༩༠༠༠ ལྷག་ལ་དགེ་སློང་གི་བསླབ་སྡོམ་སྩལ་ཏེ་གཏན་བདེའི་ས་བོན་བསྐྲུན་པར་མཛད་ཡོད།
