༄༅། །ཕྱི་ལོ་ ༢༠༢༦ ཟླ་ ༡ ཚེས་ ༢༦ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་མོན་གྷོ་ཌི་རུ་རྟེན་གཞི་བྱས་པའི་བྱེས་ཀྱི་ཆོས་སྡེ་ཆེན་པོ་དཔལ་ལྡན་འབྲས་སྤུངས་སྒོ་མང་གྲྭ་ཚང་གི་ཆོས་གྲྭའི་ནང་དུ་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་སྐབས་བཅུ་དྲུག་པའི་དགེ་བཤེས་ལྷ་རམས་པའི་ཕྱག་འཁྱེར་བཞེས་མཁན་དགེ་འདུན་པ་ ༣༥༤ ལ་མཇལ་ཁ་བཀའ་དྲིན་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༧།༣༠ ཙམ་ལ་སྐབས་བཅུ་དྲུག་པའི་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་དགེ་བཤེས་ལྷ་རམས་པའི་ཕྱག་འཁྱེར་གནང་བའི་མཛད་སྒོར་དགའ་ལྡན་ཁྲི་རིན་པོ་ཆེ་༸རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དབུ་བཞུགས་ཐོག་རྒྱུགས་སྤྲོད་དོ་དམ་པས་སློབ་གཉེར་ཁང་གི་བྱུང་རིམ་དང་ད་ལྟའི་གནས་སྟངས། ཕྱག་འཁྱེར་གྱི་གལ་གནད་སོགས་ངོ་སྤྲོད་སྙིང་བསྡུས་སྙན་སྒྲོན་ཞུས་མཚམས། དགའ་ལྡན་ཁྲི་རིན་པོ་ཆེ་མཆོག་གིས་ཕྱི་ལོ་ ༢༠༢༤ ལོར་དགེ་ལུགས་རྒྱུགས་སྤྲོད་ཆེན་མོའི་སློབ་གཉེར་མཐར་ཕྱིན་པའི་དགེ་འདུན་པ་ ༡༧༤ དང་། ཕྱི་ལོ་ ༢༠༢༥ ལོར་དགེ་ལུགས་རྒྱུགས་སྤྲོད་ཀྱི་སློབ་གཉེར་མཐར་ཕྱིན་པའི་དགེ་འདུན་པ་ ༡༨༠ ལ་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་སྐབས་བཅུ་དྲུག་པའི་དགེ་བཤེས་ལྷ་རམས་པའི་བསླབ་པ་མཐར་སོན་པའི་ཕྱག་འཁྱེར་གནང་།
དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་ཆོས་རིག་བཀའ་བློན་མཆོག་གི་སྐུ་ཚབ་བདུད་འདུལ་རྡོ་རྗེ་ལགས་དང་། དཔལ་ལྡན་དགའ་ལྡན་ཕོ་བྲང་གི་དྲུང་ཆེ་རྣམ་སྤེལ་ཚང་བློ་བཟང་སྦྱིན་པ་ལགས་གཉིས་ཀྱིས་གསུང་བཤད་དང་། ཤར་པ་ཆོས་རྗེ་༸རྗེ་བཙུན་ངག་དབང་འབྱོར་ལྡན་མཆོག་དང་དགའ་ལྡན་ཁྲི་རིན་པོ་ཆེ་༸རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་རྣམ་པ་གཉིས་ཀྱིས་རིམ་པར་བཀའ་སློབ་གསུང་བཤད་གནང་རྗེས་ལྷ་རམས་པ་རྣམ་པས་༸རྒྱལ་བའི་མཚན་སྔགས་བསོག་སྒྲུབ་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་སྒུག་ཞུས། ཆུ་ཚོད་ ༩ པ་ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྒོ་མང་ཆོས་གྲྭ་གསར་པའི་ཡང་ཐོག་ནས་ཆིབས་བསྒྱུར་སྐབས་གྲྭ་ཚང་ཁག་གི་མཁན་རིན་པོ་ཆེ་རྣམ་པས་སྤོས་སྣེ་དང་བཅས་ཕེབས་བསུ་དང་། མགོན་པོ་མཆོག་བཞུགས་ཁྲིར་༸ཞབས་སོར་འཁོད་མཚམས་ཕྱི་ལོ་ ༢༠༢༤ དང་ ༢༠༢༥ ལོར་དགེ་ལུགས་རྒྱུགས་སྤྲོད་ཀྱི་སློབ་གཉེར་མཐར་སོན་པའི་དགེ་བཤེས་ལྷ་རམས་པ་རྣམས་དང་སྐུ་པར་ལྷན་སྒྲོན་དང་མཇལ་ཁ་བཀའ་དྲིན་སྩལ་ཡོད།
ཕྱི་ལོ་ ༡༩༤༩ ལོར་རྒྱ་ནག་དམར་པོའི་དཔུང་དམག་གིས་བོད་ལ་དྲག་པོའི་བཙན་འཛུལ་བྱེད་འགོ་བཙུགས་ཤིང༌། ཕྱི་ལོ་ ༡༩༥༡ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཙན་འོག་ཏུ་གྲོས་མཐུན་དོན་ཚན་བཅུ་བདུན་ཟེར་བ་འཇོག་དགོས་བྱུང་སྟེ་ལོ་བརྒྱད་ཙམ་རིང་གནས་ཐབས་མཛད་ཀྱང་རྒྱ་ནག་གཞུང་གི་དབང་འཛིན་པས་གྲོས་མཐུན་གྱི་དོན་ཚན་ཁག་ལ་རྩིས་མེད་དང་བོད་མིར་དྲག་གནོན་དབང་གིས་ྋགོང་ས་ྋསྐྱབས་མགོན་ཆེན་པོ་མཆོག་དང་བཀའ་ཤག་བཅས་གཡུལ་རྒྱལ་ལྷུན་རྩེ་རྫོང་དུ་བོད་གཞུང་སྤོ་བཤུག་དང་འབྲེལ་གྲོས་མཐུན་དོན་ཚན་བཅུ་བདུན་བཙན་འོག་ཏུ་འཇོག་དགོས་བྱུང་བའི་གསལ་བསྒྲགས་བསྐྱངས།
བོད་གཞུང་མང་བཙན་བྱོལ་དུ་ཕེབས་ནས་ལོ་བཅུའི་རྗེས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་འོག་དགེ་ལྡན་རིག་གཞུང་གཅེས་སྐྱོང་ཚོགས་པ་གསར་འཛུགས་གནང་ཡོད་པ་དང་། ཕྱི་ལོ་ ༡༩༧༢ ལོར་དགེ་ལུགས་རྒྱུགས་སྤྲོད་ཆེན་མོའི་སྒྲིག་གཞི་གཏན་འབེབས་ཀྱིས་ཕྱི་ལོ་ ༡༩༧༤ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་ཕྱག་འཁྱེར་ཐོག་མ་འབུལ་བཞེས་དང་། ཕྱི་ལོ་ ༡༩༧༥ ལོར་སེ་ར་ཐེག་ཆེན་གླིང་དུ་དགེ་ལུགས་རྒྱུགས་སྤྲོད་ཆེན་མོ་དངོས་སུ་དབུ་འཛུགས་ཀྱིས་ལོ་རེར་རྩོད་རྒྱུགས་དང་བཤད་རྒྱུགས། བྲིས་རྒྱུགས་སོགས་ལ་དགེ་བཤེས་ལྷ་རམས་པ་ ༦༩ ཡིས་རྒྱུགས་ཞིབ་གནང་གི་ཡོད་འདུག་པ་དང་། འདི་ལོ་ཁྱོན་བསྡོམས་དགེ་བཤེས་ལྷ་རམས་པའི་ཕྱག་འཁྱེར་བཞེས་མཁན་ཁྱོན་བསྡོམས་ ༤༡༡ བཅས་ལོ་ངོ་ལྔ་བཅུ་ཐམ་པའི་རིང་དགེ་བཤེས་ལྷ་རམས་པ་ ༢༢༦༠ བསླབ་པ་མཐར་སོན་ཏེ་ཕྱག་འཁྱེར་ཕུལ་ཡོད་འདུག
