༄༅། །ཕྱི་ལོ་ ༢༠༢༥ ཟླ་ ༡༠ ཚེས་ ༣༡ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དབུས་དང་སློབ་མདའ་རུ་ཐུན་མོང་ནས་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་ལྷར་བཅས་སྲིད་ཞིའི་གཙུག་རྒྱན་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེད་ཅིང་གཟིགས་པ་ཆེན་པོ་མཆོག་བསྟན་འགྲོ་སྤྱི་དང་བྱེ་བྲག་རང་ཅག་བོད་གངས་ཅན་པ་ཡོངས་ཀྱི་མགོན་དཔུང་དམ་པར་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ཟབ་མོ་རྣམས་ལྷུན་གྱིས་འགྲུབ་པའི་ཕྱིར། དང་སློབ་སྤྱི་མགྲིན་ནས་ཇི་ལྟར་གསོལ་འདེབས་ཞུས་པ་ལྟར་ཞལ་བཞེས་བཀའ་དྲིན་ཆེ་ཐོབ་བཞིན་༸གོང་ས་ལྔ་པ་ཆེན་པོའི་དག་སྣང་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་འབུལ་ཆེད་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་དབུ་བཞུགས་ཐོག རྣམ་པར་རྒྱལ་བ་ཕན་བདེ་ལེགས་བཤད་གླིང་དང་བསྙེན་མཚམས་པ་སོགས་ནས་སྐུའི་ཚེ་སྒྲུབ་ཉིན་བཞི་སྔོན་བཏང་གིས་དེ་རིང་རེས་གཟའ་པ་སངས་གཟའ་སྐར་དགེ་འཛོམས་ཉིན་སྔ་དྲོའི་ཆུ་ཚོད་ ༦ ཐོག་ཆོག་གྲྭ་འདུས་ཚོགས་ནས་སྐུའི་ཚེ་སྒྲུབ་དང་། ཆུ་ཚོད་ ༨ དང་སྐར་མ་བཅུའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གཟིམ་སྒོ་ནས་གདན་ཞུའི་སྐབས་རྣམ་གྲྭའི་སྤྱན་རྒྱ་སྤོས་འཛིན་དང་། སྦྱིན་བདག་འཐུས་ཚབ་མི་ལྔ་ནས་སྤོས་སྣེ། བོད་ཁྱིམ་སློབ་གྲྭའི་སློབ་ཕྲུག་རྣམས་ནས་རུ་སྒྲིག་དང་རྔོན་པའི་འདོན་དང་བཅས་ཕེབས་བསུ་གཟབ་རྒྱས་ཐོག་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་གྲུབ་པ་དང་བརྟན་བཞུགས་ཀྱི་དབུ་བཞུགས་རྡོར་སློབ་ཁྲོམ་ཐོག་རིན་པོ་ཆེ་མཆོག་ནས་མཇལ་དར་རྐྱང་འབུལ་ཞུས།
དེ་རྗེས་བརྟན་བཞུགས་བསྟར་འབུལ་དབུ་འཛུགས་ཀྱིས་བརྟན་བཞུགས་ཀྱི་ཆོ་ག་གསུང་མུར་གསོལ་འབྲས་རིམ་པར་ཕེབས་ཤིང་། དངོས་གཞི་བླ་མ་ལྷར་བསྐྱེད་ནས་བཟུང་ཞལ་འདོན་ཐར་ཆགས་སུ་གསུངས་ཏེ་ཚེ་འགུགས་རྗེས་ཚེ་མདའ་འབུལ་བཞེས་གནང་། གསོལ་འདེབས་མཎྜལ་སྐབས་དབུ་བཞུགས་སློབ་དཔོན་ཁྲོམ་ཐོག་རིན་པོ་ཆེ་ནས་མཎྜལ་ཚོམ་བུ་འདེགས་འབུལ་སྐབས་སྦྱིན་བདག་འཐུས་ཚབ་མི་གཉིས་ནས་རམ་འདེགས་ཞུས། མཎྜལ་གྲུབ་རྗེས་དབུ་བཞུགས་སྐུ་བཞེངས་ཐོག་ཞལ་འདོན་ཚིག་བསྟུན་གྱིས་ཚེ་བུམ་དང་། ཚེ་ཆང་། ཚེ་རིལ། མདའ་དར། དབང་། དྲག་པོ། ཞི་བ། རྒྱས་པ་བཅས་ཀྱི་ལས་བཞི་འབྲང་རྒྱས་དང་། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་བཅས་ཕུལ་ཟིན་པ་དང་དབུ་བཞུགས་མཆོག་མཇལ་ཁ་དང་། ཞལ་འདོན་༸རྒྱལ་བའི་ཞབས་བརྟན་གསུང་མུར་སྦྱིན་བདག་འཐུས་ཚབ་མི་བཅོ་ལྔ་སྐོར་ནས་མཇལ་ཁ་ཞུས་པ་དང་། འབུལ་དངོས་སྤྱན་ལམ་དུ་བསྟར། ཡོན་འགྱེད། ཚོགས་འགྲེམས་གནང་།
མཐར་བཀའ་དྲིན་གཏང་རག་མཎྜལ་དམག་སྒར་གྱི་འཐུས་མི་རུ་དཔོན་ཉི་མ་ཚེ་རིང་ནས་འདེགས་འབུལ་དང། ཚོགས་མི་གྲངས་ ༡༥ ནས་མཇལ་ཁ་ཞུས་མཚམས། ཞལ་འདོན་ཉི་གཞོན་འཆར་ཀ་མ་དང་། བསྟན་འབར་མ། ཀ་ཁྲི་སྒྲོག བཀྲ་ཤིས། བདེན་ཚིག་སྨོན་ལམ་བཅས་གསུངས་ནས་བརྟན་བཞུགས་དངོས་གཞི་ལེགས་པར་གྲུབ་རྗེས། བོད་ཀྱི་སྒྲ་སྙན་དང་ཕྱི་རྒྱལ་གྱི་གྷེ་ཌར་མཉམ་སྡེབ་ཀྱིས་མགོན་པོ་གང་ཉིད་མཆོག་ལ་བསྟོད་གཞས་གཟིགས་འབུལ་གྱིས་བརྟན་བཞུགས་གནང་སྒོ་ལེགས་པར་གྲུབ་སྟེ། དྭང་སློབ་དམག་སྒར་གྱི་འཐུས་ཚབ་མི་ལྔ་ནས་སྤོས་སྣེ་དང་། རྣམ་གྲྭའི་སྤྱན་རྒྱ་བཅས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་དུ་གདན་འདྲེན་ཕེབས་སྐྱེལ་ཞུས་ཡོད།
ཐེངས་འདིར་དང་སློབ་ཀྱི་བརྟན་བཞུགས་ལ་དགའ་ལྡན་ཁྲི་རིན་པོ་ཆེ་༸རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་དང་། ཤར་པ་ཆོས་རྗེ་ངག་དབང་འབྱོར་ལྡན་མཆོག། སྒོ་མང་མཁན་པོ། ཤར་རྩེ་མཁན་པོ། བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་དང་བདེ་སྲུང་བཀའ་བློན་སོགས་ཀྱིས་གཙོས་གྲྭ་བཙུན་སྔགས་གསུམ་གྱིས་གཙོས་ཡུལ་ལུང་འདྲ་མིན་ནས་ཕེབས་པའི་དད་ལྡན་སེར་སྐྱ་སྟོང་ཕྲག་བརྒལ་བ་ཆེད་ཕེབས་གནང་ཡོད།
