༄༅། །ཕྱི་ལོ་ ༢༠༢༥ ཟླ་ ༡༡ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་མོན་ཡུལ་ན་གཞོན་སློབ་ཕྲུག་ཚོགས་པ་ཐུན་མོང་གིས་མདོ་ལུགས་ཀྱི་བརྟན་བཞུགས་གསོལ་འདེབས་མཎྜལ་འདེགས་འབུལ་ཞུས་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ཀྱི་དགུང་གྲངས་ ༩༠ ལ་ཕེབས་པའི་གོ་སྟོན་དང་བསྟུན་མོན་ཡུལ་སྐྱེ་འགྲོ་རྣམས་སྐྱེ་བ་ནས་ཚེ་རབས་ཐམས་ཅད་དུ་བླ་མའི་རྗེས་སུ་གཟུང་བའི་གསོལ་འདེབས་དང་འབྲེལ་བྱམས་བརྩེ་ལོའི་སྲུང་བརྩེའི་ཆེད་དུ་མོན་པའི་སློབ་ཕྲུག་ཚོགས་པས་མདོ་ལུགས་ཀྱི་བརྟན་བཞུགས་གསོལ་འདེབས་མཎྜལ་འདེགས་འབུལ་ཞུ་ཆེད་སྔ་དྲོའི་ཆུ་ཚོད་ ༩།༠༠ ཐོག་ཕོ་བྲང་རྒྱལ་སྒོ་རུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་གོ་སྒྲིག་ཚོགས་ཆུང་གི་སྤྱི་ཁྱབ་འགན་འཛིན་བླ་མ་ངག་དབང་ནོར་བུ་རིན་པོ་ཆེ་དང་། བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་དཀོན་མཆོག་བཀྲ་ཤིས་ལགས་གཙོས་གནད་ཡོད་མི་སྣ་ལྔས་སྤོས་སྣེས་མདུན་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་ཕེབས་བསུ་དང་བཅས་བཞུགས་ཁྲིར་འཁོད་མཚམས་༸མགོན་པོ་གང་ཉིད་མཆོག་གིས་བཀའ་སློབ་སྩལ་དོན།
ངོས་རང་༸རྒྱལ་དབང་གོང་མ་ཚོའི་ཡང་སྲིད་ལ་ངོས་འཛིན་བྱས་ཏེ་ཡོངས་འཛིན་གླིང་རིན་པོ་ཆེ་གཙོ་གནང་སྟེ་ཡོངས་འཛིན་རྣམ་པའི་མདུན་ནས་དཔེ་ཆ་དགའ་རབ་བལྟས་ཡོད། དུས་ལོག་ཡོང་བའི་སྐབས་སུ་རྐྱེན་ངན་གྲོགས་ལ་ཤར་བ་ལྟ་བུར་ཚུར་རྒྱ་གར་བྱང་རྒྱུད་ཀྱི་ས་ཆར་སླེབས་པ་དང་། འཛམ་གླིང་འདིའི་སྟེང་ས་ཆ་མང་པོ་ཞིག་ལ་ངོས་རང་འབྲེལ་བ་ཡོང་གི་ཡོད་ལ། མི་ཚོས་ཀྱང་ཧ་ཅང་དགའ་བོ་བྱེད་བཞིན་འདུག གང་ལྟར་ངོས་རང་ཕ་ཡུལ་མདོ་སྨད་ནས་སྐྱེས་ཏེ་བོད་གངས་ཅན་ལྗོངས་ཀྱི་བསྟན་པ་དང་འགྲོ་བའི་དོན་དུ་ཉིན་མཚན་དུས་དྲུག་ཏུ་བསམ་ནས་བསྡད་པ་ཡིན། རྒྱ་གར་ལ་བསྡད་ནས་འགྲོ་དོན་བྱས་ཏེ་དེ་རིང་དུས་ཚོད་ལ་འདིར་བསྡད་པ་དེ་ལྟར་རེད། རིམ་པའི་རྒྱ་གར་རྡོ་རྗེ་གདན་གྱིས་མཚོན་པའི་གནས་ཆེན་ཁག་ལ་འགྲོ་རྒྱུ་དང་། དེ་ཙམ་དུ་མ་ཟད་བོད་དང་རིམ་པའི་རྒྱ་ནག་གི་ནང་པ་ཚོ་ལ་ངོས་ཀྱིས་ཕན་ཐོགས་ཕལ་ཆེར་དགའ་རབ་བྱེད་ཐུབ་པ་རེད་འདུག
ངོས་རང་ལོ་དགའ་རབ་སླེབས་པ་རེད་དེ་གཟུགས་པོ་ཧ་ཅང་བདེ་བོ་འདུག བསྟན་པའི་ཞབས་འདེགས་སྒྲུབ་རྒྱུ་དང་སངས་རྒྱས་པའི་ཆོས་ལ་དད་པ་བྱེད་མཁན་རྣམས་ལ་ཆོས་ཀྱི་སྙིང་དོན་འགྲེལ་བཤད་རྒྱག་པའི་གོ་སྐབས་ཧ་ཅང་ཡག་པོ་ཡོད་པ་ལྟ་བུ་འདུག ངོས་ཀྱིས་ད་ལྟའི་བར་དུ་ཧུར་ཐག་བྱས་པ་ཡིན། ནོར་གླིང་ནས་ཐོན་ཁར་སྨོན་ལམ་བརྒྱབ་སྟེ་བསྟན་པ་དང་འགྲོ་བའི་དོན། ལྷག་པར་དུ་བོད་གངས་ཅན་ལྗོངས་ཀྱི་བསྟན་སྲིད་དོན་དུ་སྨོན་ལམ་བརྒྱབ་ནས་ཐོན་ཡོང་བ་ཡིན། ནོར་གླིང་ནས་ཐོན་ཏེ་གཙང་པོ་བརྒལ་ནས་ཡོང་དུས་སེམས་ཏོག་ཙམ་སྐྱོ་བོ་བྱུང་ཡང་། ཀོ་གྲུ་གཏོང་མཁན་ཚོས་ངོས་ལ་སེམས་གསོ་བཏང་ནས་༸རྒྱལ་བ་རིན་པོ་ཆེ་གནས་སྐབས་རིང་ལྷ་ས་ནས་ཐོན་དགོས་པ་ཆགས་ཀྱི་ཡོད་ཀྱང་། བོད་ཀྱི་བསྟན་སྲིད་དོན་དུ་མཛད་པ་འཕྱུག་པ་ཡོད་པ་མ་རེད་ཅེས་ཧ་ཅང་ཤུགས་ཆེན་པོ་བརྗོད་བྱུང་། སྙིང་རྗེ། དེ་ངོས་ཀྱི་སེམས་ལ་ཟུག་པོ་བྱུང་།
དེ་ལྟར་རིམ་པས་རྒྱ་གར་གྱི་ས་ཁུལ་མང་པོ་ཞིག་ལ་སླེབས་པ་དང་། དེ་ཙམ་དུ་མ་ཟད་པའི་འཛམ་གླིང་གི་ས་ཁུལ་མང་པོར་སླེབས་པ་རེད། གང་ལྟར་ས་གནས་གང་དུ་ཕྱིན་པ་ཡིན་ནའང་ལུས་འདི་དང་འབྲེལ་བའི་བསམ་བློ་ནི་ལྷག་བསམ་རྩེ་གཅིག་པ། དངོས་གནས་བསྟན་པ་དང་འགྲོ་བའི་དོན་དུ་ཞབས་འདེགས་ཧུར་ཐག་སྒྲུབ་བསམ་པའི་བློ་ཁྱོན་ནས་ཡལ་བ་མེད་པ་དང་། དཀའ་ངལ་འཕྲད་པའི་སྐབས་སུའང་སེམས་ཞུམ་པ་མེད་པར་ད་ལྟའི་བར་དུ་ཧུར་ཐག་བྱས་པ་ཡིན། ཧུར་ཐག་བྱས་པའི་ལག་རྗེས་ལ་འཛམ་གླིང་འདིར་ངོས་ཀྱི་མིང་ཡིན་ནའང་རེད། དེ་བཞིན་ངོས་ཀྱིས་སངས་རྒྱས་ཀྱི་ཆོས་འགྲེལ་བཤད་བརྒྱབ་པ་དེ་མང་པོ་ཞིག་གི་སེམས་ལ་ཟུག་པོ་དང་ཕན་པོ་བྱུང་ནས་བསྟན་པ་དང་འགྲོ་བའི་དོན་དུ་གང་ལ་གང་འཚམ་གྱིས་ཕན་ཕོགས་དངོས་གནས་བྱུང་གི་ཡོད་པ་རེད། མུ་མཐུད་དུ་ཧུར་ཐག་བྱེད་ཀྱི་ཡིན། བཀྲ་ཤིས་བདེ་ལེགས། ཞེས་དང་།
ངོས་རང་རྒྱ་བོད་ཀྱི་ས་མཚམས་ཟི་ལིང་ནས་སྐྱེས་ཤིང་། དེ་ནས་ཡར་ལྷ་སར་སླེབས་པ་དང་། དུས་ཀྱི་འགྱུར་བ་རིམ་པར་ཕྱིན་ནས་དེ་རིང་ང་ཚོ་རྒྱ་གར་བྱང་རྒྱུད་དུཡོད་པ་རེད། རྒྱ་གར་ས་ཆ་གང་དུ་ཕྱིན་པ་ཡིན་ནའང་ཡུལ་མི་ཚོས་ཧ་ཅང་དགའ་བོ་བྱེད་བཞིན་འདུག ངོས་རང་ལ་མཚོན་ནའང་ཡུལ་བ་འདྲ་མིན་ཡོད་པ་ཚོས་ཕྱོགས་གཅིག་ནས་ངོས་ལ་དད་པ་རེད། ཡང་དགའ་ཞེན་རེད། དེ་ལྟར་འགྱུར་བ་མེད་པར་ཤུགས་ཆེན་པོ་ཡོད་པ་ཞིག་མངོན་གསལ་དོད་པོ་འདུག དེར་བརྟེན། ངོས་རང་ཞོགས་པ་གཉིད་སད་པ་དང་དད་པ་ཅན་ཚོར་སངས་རྒྱས་པའི་ཆོས་ཀྱི་བྱིན་རླབས་ཡོང་བ་ཤོག་ཅེས་སྨོན་ལམ་རྒྱག་བཞིན་ཡོད།
ངོས་ཀྱིས་བསྟན་པ་དང་འགྲོ་བའི་དོན་དུ་དུས་ནམ་གྱི་ཚེ་ཡང་འགྱུར་བ་མེད་པར་སེམས་ཤུགས་བསྐྱེན་བཞིན་ཡོད། དེ་རིང་འདིར་ཁྱོད་ཚོ་རྒྱ་གར་ཤར་ཕྱོགས་ཀྱི་ས་མཚམས་མོན་ཡུལ་ནས་དད་པས་ཀུན་ནས་བསླངས་ཏེ་ངོས་ལ་ཐུག་པར་དགའ་བོ་བྱས་ཏེ་འཛོམས་པ་རེད། ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་ཁྱོད་ཚོས་བརྟན་བཞུགས་གནང་གི་ཡོད་པ་རེད། མ་ཎི་དང་ཨ་ར་པ་ཙ། ཏཱ་རེ་བཅས་ཀྱི་ལྗགས་ལུང་འདོན་རྒྱུ་ཡིན་རྗེས་བཟློས་བྱོས། ཅེས་བཀའ་སློབ་སྩལ་རྗེས་སྤྱན་རས་གཟིགས་ཀྱི་བསྟོད་པ་དང་གཟུངས་སྔགས། འཇམ་པའི་དབྱངས་ཀྱི་བསྟོད་པ་དང་གཟུངས་སྔགས། སྒྲོལ་མའི་བསྟོད་པ་དང་གཟུངས་སྔགས་བཅས་ཀྱི་བཟླས་ལུང་བཀའ་དྲིན་སྩལ་བ་དང་། སྐབས་དེར་སྤྱན་རས་གཟིགས་བོད་ཀྱི་ལྷ་སྐལ་རེད། ཧ་ཅང་དམིགས་བསལ་རེད། ཀུན་སློང་རྣམ་པར་དག་པའི་གཞན་ཕན་གྱི་བློ་ཡག་པོ་ཡོད་པ་ཡིན་ནའང་། ཤེས་རབ་ཀྱི་རྣམ་དཔྱོད་མེད་ན་ཁ་ཐུག་དེར་ཕན་དང་མ་ཕན་མི་ཤེས་པ་རེད། དེར་བརྟེན། འཕགས་པ་སྤྱན་རས་གཟིགས་ཀྱི་གཟུངས་སྔགས་ཡིག་དྲུག་བགྲངས་ནས་སེམས་ཀྱི་གཞན་ཕན་གྱི་བློ་ལྷང་ལྷང་ཡོད་པའི་ཐོག་ནས་གཞན་ལ་ཕན་ཐོགས་སྒྲུབ་པའི་ནུས་པ་ཆེ་ཤོས་ཤེས་རབ་ཆགས་ཡོད་པས་སོ་སོ་རང་གི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་ཡིན་ལུགས་ཀྱི་དོན་ལ་དཔྱད་པ་བྱེད་པའི་ནུས་པ་རྫོགས་དུས་རང་དོན་ཡང་དེ་ལས་ལྷག་པ་ཡོད་མ་རེད། གཞན་དོན་ལ་ཆ་བཞག་ནའང་དེ་ལས་ལྷག་ཡོད་མ་རེད། ཅེས་སོགས་བཀའ་སློབ་སྩལ་བ་དང་།
དེ་ནས་བརྟན་བཞུགས་གོ་སྒྲིག་ཚོགས་ཆུང་གི་སྤྱི་ཁྱབ་འགན་འཛིན་བླ་མ་ངག་དབང་ནོར་བུ་རིན་པོ་ཆེས་གསོལ་འདེབས་མཎྜལ་འདེགས་འབུལ་ཞུས་པ་དང་། སློབ་དཔོན་རྡོ་རྗེ་རྣམ་རྒྱལ་ལགས་ཀྱིས་དབུ་ཞྭ་འདེབས་འབུལ། སྔགས་རམས་པ་བྱམས་པ་དངོས་གྲུབ་ལགས་ཀྱིས་ལྷུང་བཟེད་འདེགས་འབུལ། དགེ་སློང་འཇིགས་མེད་ལགས་ཀྱིས་འཁར་བསིལ་འདེགས་འབུལ་དང་འབྲེལ། རྒྱལ་སྲས་སྣ་བདུན་དང་བཀྲ་ཤིས་རྟགས་བརྒྱད་སོགས་རིམ་པར་འདེགས་འབུལ་གྱིས་བརྟན་བཞུགས་གོ་སྒྲིག་ཞུ་མཁན་མི་སྣ་ཁག་ཅིག་གིས་མཇལ་ཁ་ཞུས།
བརྟན་བཞུགས་གོ་སྒྲིག་ཚོགས་ཆུང་མོན་ཡུལ་སློབ་ཕྲུག་ཚོགས་པའི་ཚོགས་གཙོ་དཀོན་མཆོག་བཀྲ་ཤིས་ལགས་ཀྱིས་བཀའ་དྲིན་གཏང་རག་གི་མཎྜལ་འདེགས་འབུལ་ཞུས་ཤིང་། དགེ་བཤེས་རིན་ཆེན་ལགས་ཀྱིས་སྐུ་རྟེན་དང་བློ་བཟང་ཤཱཀྱ་ལགས་དང་དངོས་གྲུབ་ལགས་ནས་གསུང་རྟེན་དང་ཐུགས་རྟེན་འདེགས་འབུལ་དང་འབྲེལ་མོན་ཡུལ་སློབ་ཕྲུག་ཚོགས་པའི་འཐུས་མི་ཁག་ཅིག་གིས་མཇལ་ཁ་ཞུས་མཚམས་རྟན་བཞུགས་གསོལ་འདེབས་ཀྱི་མཛད་རིམ་ལེགས་པར་གྲུབ་པ་དང་། གླུ་གར་གྱི་མཆོད་པ་ཕུལ་བ་དང་། མཐར་མོན་ཡུལ་ནས་ཆེད་བཅར་དད་ལྡན་ལྔ་བརྒྱ་བརྒལ་བར་མང་མཇལ་བཀའ་དྲིན་སྩལ་རྗེས་ཕོ་བྲང་དུ་ཆིབས་བསྒྱུར་བསྐྱངས་ཡོད།
