༄༅། །ཕྱི་ལོ་ ༢༠༢༥ ཟླ་ ༡༡ ཚེས་ ༡༧ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་བོད་མིའི་སྒྲིག་འཛུགས་ཀྱིས་གོ་སྒྲིག་བྱས་པའི་༸གོང་ས་སྐུ་ཕྲེང་བཅུ་བཞི་པ་༸རྒྱལ་དབང་བསྟན་འཛིན་རྒྱ་མཚོ་མཆོག་གིས་བོད་གཞུང་དགའ་ལྡན་ཕོ་བྲང་གི་ཆོས་སྲིད་ལུགས་གཉིས་ཀྱི་དབུ་ཁྲིད་ཀྱི་མཛད་འགན་བཞེས་ནས་ལོ་ངོ་ ༧༥ འཁོར་བའི་དུས་སྟོན་མཛད་སྒོ་དང་། དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་(CST)ཁག་བདུན་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་གི་སློབ་ཟུར་བཅས་ཀྱི་བཀའ་དྲིན་རྗེས་དྲན་གྱི་མཛད་སྒོར་ཆིབས་བསྒྱུར་བསྐྱངས་ཡོད་པ་རེད།
དེ་ཡང་སྔ་དྲོའི་ཆུ་ཚོད་ ༩།༠༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་གཟིམ་ཆུང་ནས་རྒྱལ་སྒོ་རུ་ཆིབས་བསྒྱུར་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག དཔལ་ལྡན་སྲིད་སྐྱོང་མཆོག ཅེག་སྤྱི་མཐུན་རྒྱལ་ཁབ་ཀྱི་ལྡི་ལིའི་གཞུང་ཚབ་པ་ལྕམ་སྐུ་ཨེ་ལི་སི་ཀཱ་རྫེ་ཀོ་ཝ་(Dr.Eliska Zigova)མཆོག ཁྲིམས་ཞིབ་པ་གཞན་གཉིས། སྤྱི་འཐུས་ཚོགས་གཙོ་གཞོན་པ། སློབ་ཟུར་ཚོགས་པའི་ཚོགས་གཙོ་སོགས་ནས་ཕེབས་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་ཆིབས་བསྒྱུར་བསྐྱངས་ཤིང་། ཕེབས་ལམ་དུ་བོད་ཀྱི་ཟློས་གར་ཚོགས་པའི་རྔ་རོལ་དང་བཅས་མདུན་བསུ་བྱས་ཏེ་༸མགོན་པོ་གང་ཉིད་མཆོག་༸ཞབས་སྟེགས་སུ་འཁོད་པ་དང་། མཛད་སྒོའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱལ་ཁབ་ཆེན་མོའི་ཆོས་སྲིད་ལུགས་གཉིས་ཀྱི་དབུ་ཁྲིད་ཀྱི་མཛད་འགན་བཞེས་ནས་ལོ་ངོ་ ༧༥ འཁོར་བའི་དུས་སྟོན་དབུ་འཛུགས་ཀྱི་གསལ་བསྒྲགས་བསྐྱངས་མཚམས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་ཞིང་། བོད་ཀྱི་ཟློས་གར་ཚོགས་པས་རྔ་རོལ་དང་བཅས་འདུས་ཚོགས་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་དང་། རྒྱ་གར་རྒྱལ་ཁབ་ཆེན་པོའི་རྒྱལ་གླུ་རིམ་པར་བཏང་།
དེ་ནས་བོད་མིའི་སྒྲིག་འཛུགས་ཀྱི་དཔལ་ལྡན་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག དཔལ་ལྡན་སྲིད་སྐྱོང་མཆོག་བཅས་ནས་མཎྜལ་རྟེན་གསུམ་འདེགས་འབུལ་དང་འབྲེལ་མཛད་སྒོའི་སྐུ་མགྲོན་དང་མི་མང་ལ་གསོལ་ཇ་འབྲས་སིལ་འདེགས་འབུལ་དང་། དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་ཀྱི་གཏན་སློབ་(CST)ཁག་བདུན་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་གི་སློབ་ཟུར་བཅས་ཀྱི་བཀའ་དྲིན་རྗེས་དྲན་གཟེངས་བསྟོད་ཚོགས་ཆུང་གི་ཚོགས་གཙོ་སྤྱི་ཟུར་བཀྲ་ཤིས་རྣམ་རྒྱལ་ལགས་ཀྱིས་མཎྜལ་རྟེན་གསུམ་འདེགས་འབུལ་དང་། འགན་ཁུར་བ་ཁག་ཅིག་གིས་མཇལ་ཁ་ཞུས་རྗེས་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གསུང་བཤད་གནང་དོན།
ཕྱི་ལོ་ ༡༩༤༩ ལོར་རྒྱ་ནག་གུང་ཁྲན་གྱིས་སྲིད་དབང་བཙུགས་རྗེས། མདོ་སྟོད་སྨད་ཀྱི་ས་སྡེ་མང་པོ་བཙན་བཟུང་བྱས་པའི་ཐོག་ད་དུང་ཕྱི་ལོ་ ༡༩༥༠ ཟླ་ ༡༠ ནང་ལམ་ཁག་གསུམ་ནས་ཆབ་མདོར་བཙན་འཛུལ་གྱིས། བོད་ཀྱི་གཙོ་ཤུགས་དམག་དཔུང་ཕམ་ཉེས་ཤོར་ཏེ་བོད་ལ་དྲག་པོའི་འགོག་སྲུང་གི་ནུས་པ་མེད་པར་གྱུར་ཅིང་། རྒྱལ་སྤྱིའི་སྤྱི་ཚོགས་ནས་སེམས་ཁུར་བྱེད་མཁན་མེད་པ་སོགས་ཀྱིས་བོད་ཀྱི་སྣོད་བཅུད་གཉིས་ཀ་དངོས་གནས་ཆགས་འཇིག་གི་སོ་མཚམས་སུ་བསྐྱལ་ཡོད་པའི་སྐབས་དེར། དགུང་ལོ་ ༡༥ ལས་སོན་མེད་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་སྟོབས་གོ་ཆ་བཙན་པར་བགོས་ཏེ། རྒྱ་གཞུང་ལ་མེས་འཚིགས་མེ་གཏུགས་ཀྱིས། བཙན་གནོན་འོག་ཏུ་བཞག་པའི་གྲོས་མཐུན་དོན་ཚན་བཅུ་བདུན་གྱི་རྨང་གཞིའི་སྟེང་ལོ་ངོ་བརྒྱད་ལྷག་རིང་ཆབ་འབངས་གངས་ཅན་པ་རྣམས་ཀླ་ཀློའི་དཔུང་ཚོགས་ཀྱི་གོ་མཚོན་འོག་ནས་ཚེ་སྲོག་སྐྱོབ་ཐབས་དང་། བོད་ཀྱི་ཐུན་མིན་ཆོས་དང་རིག་གཞུང་གཅེས་སྐྱོང་ཡོང་བའི་ཐབས་ཤེས་ལུ་གུ་བརྒྱུད་དུ་བསྟེན་གནང་ཡོད་ནའང་། རྒྱ་གཞུང་གིས་གྲོས་དོན་རྩིས་མེད་རྡོག་རོལ་གཏོང་རྐྱང་བྱས་པར་བརྟེན། བཙན་བྱོལ་དུ་མི་ཕེབས་ཀ་མེད་བྱུང་། ཞེས་སོགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱལ་ཁབ་དང་མི་མང་ཆེད་དུ་མཛད་འཕྲིན་རྒྱ་ཆེར་བསྐྱངས་པའི་མཛད་འཕྲིན་སྙིང་བསྡུས་ཀྱི་སྐོར་ལ་གསུང་བཤད་གནང་བ་དང་།
དེ་རྗེས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་དུ། ཕྱི་ལོ་ ༡༩༤༩ ཟླ་ ༡༡ ཚེས་ ༢༣ ཉིན་མའོ་ཙེ་ཏུང་གིས་བོད་ལ་བཙན་འཛུལ་བྱ་རྒྱུའི་དམག་གྲ་ཡོངས་སུ་བསྒྲིགས་ཏེ་དཔུང་འཇུག་གི་འགོ་བརྩམས་ཤིང་། བོད་ཆབ་མདོ་རྒྱ་ནག་བཅིངས་འགྲོལ་དམག་ཟེར་བའི་ལག་ཏུ་ཤོར་ནས་ཆབ་མདོར་ཡོད་པའི་གཞུང་གི་ཞི་དྲག་དཔོན་རིགས་ཡོངས་རྫོགས་རྒྱའི་བཙོན་འོག་ཏུ་ཚུད། དུས་དེར་རྒྱ་ནག་དམར་ཤོག་སྲིད་གཞུང་དང་། བོད་ཆོས་ལྡན་རྒྱལ་ཁབ་གཉིས་ཀྱི་མི་ཆ་དང་། སྟོབས་ཤུགས་གང་ཐད་ནས་ཧེ་བག་ཆེན་པོ་ཡོད་པའི་དངོས་ཡོད་གནས་སྟངས་ལ་སོང་། བོད་ཀྱི་སྤྱི་ཚོགས་གནས་བབ་ནི་ཧ་ཅང་དཀའ་ཉེན་ཆེན་པོ་ཞིག་ནང་ལྷུང་། ཕྱོགས་གཞན་ནས་བོད་ཀྱི་མཐོ་རིམ་མི་སྣའི་ཤོག་ཁག་དབར་གྱི་ནང་ཁུལ་དབང་ཆའི་འཁྲུག་རྩོད་ཀྱི་འགལ་ཟླ་བྱུང་ཞིང་། བོད་ཀྱི་ཆབ་སྲིད་གནས་སྟངས་ཆེས་ཉག་ཕྲ་བ་དང་། ཆེས་ཛ་དྲག་གི་དུས་སུ་གྱུར་སྐབས། བོད་འབངས་ལྷ་སྡེ་མི་སྡེ་ཡོངས་ནས་གསོལ་བ་ཕུར་ཚུགས་སུ་འདེབས་སྙིང་བོད་ལུགས་ལྟར་ན་དགུང་གྲངས་ ༡༦ ལས་སོན་མེད་པའི་༸གོང་ས་མཆོག་གིས་ཕྱི་ལོ་ ༡༩༥༠ ཟླ་ ༡༡ ཚེས་ ༡༧ ཉིན་ཀྱི་རྒྱལ་སྲིད་ཆོས་སྲིད་ཀྱི་ཐུགས་འགན་དངོས་སུ་བཞེས་དགོས་བྱུང་ཞིང་། རིམ་པས་ལེགས་བཅོས་ལས་ཁུངས་དང༌། གྱོད་ཞིབ་ལས་ཁུངས་གསར་འཛུགས་ཀྱིས་བོད་ཀྱི་ཆབ་སྲིད་སྲ་བརྟན་དང་བོད་འབངས་བདེ་སྐྱིད་ཡོང་ཐབས་ཀྱི་དགོངས་བཞེས་མཛད། ཅེས་སོགས་ཆོས་སྲིད་ལུགས་གཉིས་ཀྱི་མཛད་འགན་བཞེས་པའི་རྒྱབ་ལྗོངས་དང་། མཛད་འགན་བཞེས་རྗེས་ཀྱི་མཛད་འཕྲིན་སྐོར་གསུང་བཤད་དང་།
དེ་རྗེས་སློབ་ཟུར་ཐུན་མོང་གི་བཀའ་དྲིན་རྗེས་དྲན་གཟེངས་བསྟོད་ཚོགས་ཆུང་གི་ཚོགས་གཙོ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲན་ཉག་གཅིག་ལ་བརྟེན་ནས་བཙན་བྱོལ་ནང་གཏན་ཉིན་སློབ་གྲྭ་རིམ་འཛུགས་གནང་བའི་སྐོར་ནས་གསུང་བཤད་དང་། ཚོགས་ཆུང་ནས་བཀའ་དྲིན་རྗེས་དྲན་གྱི་གཟེངས་བསྟོད་འབུལ་བཞེས་དང་འབྲེལ་བསྟོད་གཞས་གཟིགས་འབུལ་དང་། རྒྱ་གར་གཞུང་ནས་བོད་མི་རྣམས་ལ་རོགས་སྐྱོར་མཐུན་འགྱུར་གནང་བར་ཐུགས་རྗེ་ཆེ་ཞུའི་གཟེངས་རྟགས་ཤིག་སློབ་ཟུར་ཐུན་མོང་ནས་གོ་སྒྲིག་བྱས་ཡོད་པ་རྒྱ་གར་དབུས་གཞུང་ཕྱི་སྲིད་ལས་ཁུངས་ཀྱི་སྣེ་ཤན་པ་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་སྩལ་གནང་།
དེ་ནས་སྐུ་མགྲོན་གཙོ་བོ་ཅེག་སྤྱི་མཐུན་རྒྱལ་ཁབ་ཀྱི་གཞུང་ཚབ་པ་ལྕམ་སྐུ་ཨེ་ལི་སི་ཀཱ་རྫེ་ཀོ་ཝ་མཆོག་(Dr.Eliska Zigova)གིས་འཚམ་འདྲི་དང་འབྲེལ་གསུང་བཤད་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་སྲིད་གཉིས་ཀྱི་ཐུགས་འགན་བཞེས་ནས་མིག་དཔེར་འོས་པའི་འགོ་ཁྲིད་བཟང་པོ་ཞིག་གནང་བའི་དུས་སྟོན་འདི་སྲུང་བརྩི་བྱེད་དགོས་པ་ནི་ཧ་ཅང་གལ་ཆེན་པོ་རེད། སློབ་གྲྭ་ཁག་གི་སློབ་ཟུར་ཚོས་བཀའ་དྲིན་རྗེས་དྲན་བྱེད་བཞིན་པ་འདི་ནི་སེམས་འགུལ་ཐེབས་པ་ཞིག་རེད། ༸གོང་ས་མཆོག་གིས་དགུང་ལོ་བཅོ་ལྔའི་སྟེང་ཆོས་སྲིད་གཉིས་ཀྱི་ཐུགས་འགན་བཞེས་རྗེས་ཀྱི་ལོ་དགུའི་རྗེས་ནས་བཙན་བྱོལ་དུ་ཕེབས་དགོས་བྱུང་བ་དང་། ཁོང་གི་རྗེས་སུ་བོད་མི་བཙན་བྱོལ་བ་སྟོང་ཕྲག་མང་པོས་རྒྱ་ནག་དམར་པོའི་གཞུང་ལ་གཡོལ་ནས་སླེབས་པ་རེད། བཙན་བྱོལ་བོད་མིའི་སྤྱི་ཚོགས་འཛུགས་སྐྲུན་གྱིས་བོད་ཕྲུག་རྣམས་ལ་ཤེས་ཡོན་སློབ་སྦྱོང་གི་གོ་སྐབས་སྩལ་ཡོད། ཅེས་སོགས་གསུང་བཤད་གནང་མཚམས་དགའ་ལྡན་ཕོ་བྲང་གི་དྲུང་ཆེ་རྣམ་སྤེལ་ཚང་བློ་བཟང་སྦྱིན་པ་ལགས་ཀྱིས་བརྩམས་ཤིང་། ཕྱི་དྲིལ་ལས་ཁུངས་ནས་པར་སྐྲུན་བྱས་པའི་༼བོད་ཀྱི་ལོ་རྒྱུས་བརྗོད་པ་དང་འབྲེལ་རྒྱལ་བའི་མཛད་པ་སྐོར་གླེང་བ་༽ཞེས་པ་དབུ་འབྱེད་དང་།
མཐར་བོད་མིའི་སྒྲིག་འཛུགས་ཀྱི་དབུས་གོ་སྟོན་གོ་སྒྲིག་ཚོགས་ཆུང་གི་ཚོགས་གཙོ་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དུས་སྟོན་མཛད་སྒོ་སྲུང་བརྩི་གྲུབ་མཚམས་མགོན་པོ་གང་ཉིད་མཆོག་ཕོ་བྲང་དུ་ཆིབས་བསྒྱུར་བསྐྱངས་ཡོད།
