༄༅། །ཕྱི་ལོ་ ༢༠༢༥ ཟླ་ ༨ ཚེས་ ༢༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་གླེ་ཁུལ་དཔེ་ཐུབ་དགོན་པའི་ཉེ་ཁུལ་ཨ་པི་སི་སྤང་(Abi-Spang)ངམ་རྨོ་རྨོའི་སྤང་ཞེས་པར་ལ་དྭགས་དགོན་སྤྱི་ཚོགས་པ་དང་ནང་ཚོགས་ཐུན་མོང་གིས་གོ་སྒྲིག་ཞུས་པའི་ཆེ་བསྟོད་ཀྱི་གསོལ་ཚིགས་ལ་ཆིབས་བསྒྱུར་གྱིས་ཉིན་གུང་ལྗགས་སྨིན་གནང་ཡོད་པ་རེད།
དེ་ཡང་སྔ་དྲོའི་ཆུ་ཚོད་༡༠།༤༥ ཙལ་ལ་གླེ་ཡི་ཞི་བའི་ཚལ་ནས་ཆིབས་འཁོར་བརྒྱུད་དཔེ་ཐུབ་དགོན་པའི་ཉེ་ཁུལ་ཨ་པི་སི་སྤང་(Abi-Spang)ལ་ཆིབས་བསྒྱུར་སྐབས་ས་གནས་ཀྱི་བོད་དང་ལ་དྭགས་མི་མང་གིས་ཕེབས་ལམ་དུ་མཇལ་དར་དང་། བདུག་སྤོས། མེ་ཏོག་སོགས་ཐོགས་ནས་ཕེབས་བསུ་དང་འབྲེལ་ཨ་པི་སི་སྤང་གི་སྡིངས་ཆའི་ཞབས་སྟེགས་སུ་འཁོད་མཚམས་ལ་དྭགས་དགོན་སྤྱི་ཚོགས་པའི་དབུ་སྐྱོང་རྡོ་རྗེ་བསྟན་འཛིན་ལགས་ཀྱིས་ཕེབས་བསུའི་གསུང་བཤད་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༦༦ ལོར་ལ་དྭགས་སུ་ཆིབས་བསྒྱུར་ཐོག་མར་བསྐྱངས་པ་ནས་ཆོས་འབྲེལ་བཀའ་དྲིན་སྩལ་བར་ཐུགས་རྗེ་ཆེ་ཞུས་པ་དང་། མ་འོངས་པར་མུ་མཐུད་ཐུགས་བརྩེ་བ་ཆེན་པོས་རྗེས་སུ་འཛིན་པའི་གསོལ་འདེབས་ཞུས་རྗེས་ལ་དྭགས་དཔེ་ཐུབ་ཡུལ་མིའི་སྲོལ་རྒྱུན་འཁྲབ་གཞས་གཟིགས་འབུལ་དང་། དེ་རྗེས་ལ་དྭགས་གླེ་བྱང་བསོད་གླིང་བོད་མིའི་གཞིས་ཆགས་ཀྱི་མི་མང་གིས་འཁྲབ་གཞས་གཟིགས་འབུལ་གྱིས་གསོལ་སྟོན་གྱི་དགའ་སྟོན་ལ་རོལ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཀའ་སློབ་སྩལ་དོན།
དེ་རིང་ས་གནས་འདིའི་ཡུལ་བ་སྐྱ་སེར་ཕོ་མོ་རྒན་བྱིས་དབྱེ་བ་མེད་པར་ཚང་མས་སེམས་འཁུར་ཆེ་བཞེས་ཀྱི་ཐོག་ནས་དགའ་བསུའི་རྟེན་འབྲེལ་གནང་བ་རེད། ཐུགས་རྗེ་ཆེ་ཞུ་རྒྱུ་ཡིན། ཤར་དར་རྩེ་མདོ་ནས་ནུབ་ལ་དྭགས་བར་གྱི་ས་ཁུལ་ཡོངས་རྫོགས་ལ་ཆོས་དང་རིག་གཞུང་ཐུན་མོང་གི་ཆ་ཡོད། ངོས་རང་དེ་རིང་བོད་ཀྱི་མཐའ་འཁོར་ལ་སླེབས་པ་དང་། ཁྱོད་རང་ཚོས་འདིར་སྣེ་ལེན་གནང་ནས་གཞས་ཞབས་བྲོ་འཁྲབ་པ་རེད། ཐུགས་རྗེ་ཆེ་ཞུ་རྒྱུ་ཡིན།
བར་སྐབས་བོད་གངས་ཅན་དབུས་ཀྱི་སྒྲིག་འཛུགས་ཐོག་ནས་དབུས་གཙང་ཆོལ་ཁ་དེ་གཙོ་བོར་ངོས་འཛིན་བྱས་པ་ལྟ་བུ་རེད། ངོས་ཀྱིས་མགོ་སྟོད་ནས་བོད་ཆོལ་ཁ་གསུམ་ཞེས་པ་རྒྱུན་དུ་བཤད་ཡོད། ང་ཚོ་བོད་མི་ས་ཡ་དྲུག་སྐོར་ཡོད་པའི་ས་ཆ་ཚང་མར་བོད་གངས་ཅན་པ་གཅིག་པ་དང་། ངོས་རང་སྐྱེས་སའི་མདོ་སྨད་ཀྱི་ས་ཁུལ་རྣམས་བོད་གངས་ཅན་པའི་ལྗོངས་ཀྱི་ཁོངས་ཆགས་ཡོད། བོད་ཀྱི་ས་ཁུལ་གང་སར་སླེབས་སྐབས། བོད་ཆོལ་ཁ་གསུམ་ཆིག་སྒྲིལ་ཡིན་པའི་ཚོར་བ་ཤུགས་ཆེན་པོ་སླེབས་ཀྱི་འདུག ཧ་ཅང་དགའ་བོ་བྱུང་།
ངོས་རང་སྐྱེས་ས་ཟི་ལིང་ས་ཁུལ་རེད། ཆབ་སྲིད་ཀྱི་སྒྲིག་འཛུགས་འགྲོ་སྟངས་ཁ་ཁ་ཡིན་ཡང་། བོད་ཀྱི་སྐད་རིགས་དང་ཤེས་ཡོན་སོགས་ཀྱི་ཐོག་ནས་གཅིག་གྱུར་ཆགས་ཡོད། བོད་ལ་ཆོལ་ཁ་གསུམ་ཞེས་བཤད་པ་དེ་ཆབ་སྲིད་ཀྱི་དགོས་མཁོ་ལ་བརྟེན་ནས་བཤད་པ་ཞིག་མ་ཡིན་པར་ཆོས་དང་རིག་གཞུང་། སྐད་ཡིག་བཅས་ཀྱི་ཐོག་ནས་གཅིག་གྱུར་ཡིན་པ་རང་བཞིན་ལྷན་སྐྱེས་ཆགས་ཡོད། བར་སྐབས་རྒྱ་ནག་གིས་བོད་ལ་ཆབ་སྲིད་ཀྱི་དབང་བསྒྱུར་བྱས་ཏེ་དོ་ཕོག་ཆེ་ཙམ་ཡོང་གི་ཡོད་ཀྱང་། བོད་ཆོལ་ཁ་གསུམ་གྱི་མི་མང་ཡོངས་རྫོགས་ལ་བོད་གངས་ཅན་ལྗོངས་ཀྱི་རིག་གཞུང་གཅིག་གྱུར་དང་། བོད་ལྗོངས་ཀྱི་ངོ་བོར་ང་ཚོ་ཚང་མ་གཅིག་སྒྲིལ་བྱས་ཏེ་ཡོད་པའི་ཚོར་བ་ཤུགས་ཆེན་པོ་ཞིག་ཁྱོད་རང་ཚོར་ཡོད་པ་རེད། ང་ཚོས་བོད་མི་ས་ཡ་དྲུག་ཅེས་བཤད་བཞིན་པ་དེ་མདོ་སྟོད་སྨད་དང་དབུས་གཙང་མངའ་རིས་དང་བཅས་པ་ཚང་མ་བསྡོམས་ནས་བཤད་བཞིན་ཡོད་པ་དང་། ང་ཚོ་ཚང་མར་བདེ་སྡུག་གི་གནས་ཚུལ་ཅི་ཞིག་བྱུང་ཡང་སེམས་ནས་གདུང་ཤུགས་གཅིག་སྒྲིལ་བྱས་ཏེ་ཡོད། སྐད་གདངས་མི་འདྲ་བ་མང་པོ་ཡོད་ཀྱང་། བསམ་བློའི་ནང་དུ་བོད་རིགས་གཅིག་གྱུར་ཡིན་བསམ་པའི་འདུ་ཤེས་ཤུགས་ཆེན་པོ་འདུག ཅེས་དང་།
བོད་ཀྱི་རིག་གཞུང་གི་ལྟེ་གནས་ལྟ་བུར་ཆགས་ཡོད་པའི་དགོན་པ་སྤྱི་དང་། དེའི་ནང་བཤད་གྲྭ་ཤུགས་ཆེ་ཤོས་གདན་ས་གསུམ་། དེ་བཞིན་ཁམས་ཁུལ་གྱི་དགོན་པ་ཆེ་ཁག་མང་པོ་རུ་ཆོལ་ཁ་གསུམ་དབྱེ་བ་མེད་པར་གཅིག་གྱུར་གྱི་འདུ་ཤེས་ཧ་ཅང་ཤུགས་ཆེན་པོ་འདུག ངོས་རང་ལ་མཚོན་ན་སྐྱེས་ས་ཟི་ལིང་ཡིན་ནའང་བོད་ཟེར་བའི་ཚིག་སེམས་གཏིང་ན་ཡོད་པ་ཞིག་རེད། དེར་བརྟེན། བོད་ཆོལ་ཁ་གསུམ་གྱི་མི་མང་ཚང་མར་བོད་པ་ཟེར་བའི་མི་རིགས་ཀྱི་ངོས་འཛིན་དང་། དེ་དང་འབྲེལ་བའི་སྐད་ཡིག་དང་རིག་གཞུང་ལ་ཚང་མས་ངོས་འཛིན་བྱེད་ཀྱི་ཡོད། དེ་གལ་ཆེན་པོ་རེད།
དེ་རིང་འདིར་ལ་དྭགས་བོད་ཀྱི་ས་མཚམས་ལ་སླེབས་ཡོད་ཀྱང་། བོད་མི་རིགས་ཀྱི་འདུ་ཤེས་ཧ་ཅང་གསལ་པོ་དང་། མི་རིགས་གཅིག་གྱུར་ཡིན་པའི་རྣམ་པ་ཧ་ཅང་གསལ་བོ་འདུག མི་རིགས་གཅིག་གྱུར་ནི་ཆབ་སྲིད་ཀྱི་ཞེན་ཁོག་བྱེད་པའི་སྐད་ཆ་མ་རེད། མི་རིགས་གཅིག་གྱུར་གྱི་ཐོག་ནས་ཆོས་རྒྱལ་སྲོང་བཙན་སྒམ་པོ་དང་ཁྲི་སྲོང་ལྡེའུ་བཙན་སྐབས་ནས་བཟུང་ལོ་ཙཱ་བཀའ་དྲིན་ཅན་མང་པོས་རྒྱ་གར་གྱི་རིག་གཞུང་རྒྱ་ཆེན་མུ་མེད་ཡོད་པ་ནས་ཚུར་བསྒྱུར་ཏེ་ཡོངས་གྲགས་སུ་བཀའ་འགྱུར་དང་བསྟན་འགྱུར་ཞེས་པ་བྱུང་བ་དང་། དེ་ནི་རྒྱ་གར་གྱི་རིག་གཞུང་ཧ་ཅང་བརྟན་པོ་ཡོད་པ་རྣམས་བསྒྱུར་བ་ཞིག་རེད། ཆབ་སྲིད་ཀྱི་རྐྱེན་དབང་གི་ཐོག་ནས་བོད་དུམ་བུར་བྲལ་བ་ཡོང་གི་ཡོད་ཀྱང་། རྩ་བས་བོད་ཆོལ་ཁ་གསུམ་དང་། སངས་རྒྱས་ཀྱི་བསྟན་པ་གཅིག་གྱུར་བྱས་ཏེ་གནས་ཡོད། ནང་གསེས་ཕྲན་བུའི་རིགས་ཡོང་གི་ཡོད་ཀྱང་རྩ་བའི་གཅིག་སྒྲིལ་རང་རེད། ཅེས་སོགས་བཀའ་སློབ་སྩལ་བ་དང་།
གཞན་ཡང་། ཟི་ལིང་ནས་ལ་དྭགས་ས་ཁུལ་བར་དུ་མི་རབས་མང་པོའི་རིང་ལ་བཀའ་འགྱུར་བསྟན་འགྱུར་གྱི་གཞུང་གི་དོན་རྣམས་ལ་སྦྱང་ཞིང་། བདག་པོ་རྒྱག་བཞིན་པ་རེད། དེ་ནི་སངས་རྒྱས་པའི་ཆོས་ཀྱི་མ་རྩ་ལྟ་བུར་བདག་པོ་རྒྱག་མཁན་ཆགས་ཡོད། ང་ཚོའི་ཉེ་འགྲམ་གྱི་ནང་པའི་ཡུལ་གྲུ་ཚོས་ཀྱང་བདག་པོ་བརྒྱབ་ཡོད་ཀྱང་། ང་ཚོས་རིགས་པའི་ལམ་ནས་ངེས་པ་དྲངས་ཏེ་ཐོས་བསམ་སྒོམ་པ་ཡ་མ་བྲལ་བའི་ཐོག་ནས་བསྟན་པ་འཛིན་སྐྱོང་སྤེལ་གསུམ་ཧ་ཅང་ཡག་པོ་བྱས་འདུག
རྒྱ་ནག་གིས་བོད་ལ་དབང་བསྒྱུར་ཤུགས་ཆེན་པོ་ཞིག་ཡོང་གི་ཡོད་ཀྱང་། བོད་ཀྱི་རིག་གཞུང་བསྣུབས་རྒྱུའི་ཚབ་ལ་བོད་ཀྱི་རིག་གཞུང་རྒྱ་ནག་ལ་ཁྱབ་བཞིན་པའི་གནས་ཚུལ་འདུག རྒྱ་རིགས་ནང་དུ་བོད་ཀྱི་ནང་ཆོས་ལ་དམིགས་བསལ་གྱིས་དགའ་ཞེན་དང་དོ་སྣང་བྱས་ཏེ་སློབ་སྦྱོང་བྱེད་མཁན་མང་པོ་ཡོང་གི་ཡོད་པ་དང་། དེས་ཕན་ཐོགས་ཡོང་གི་ཡོད་པ་རེད། གང་ལྟར་བོད་ཀྱི་ཆོས་དང་རིག་གཞུང་གིས་སེམས་དུལ་བོ་བཟོ་བ་ནི་ཧ་ཅང་རྩ་ཆེན་པོ་རེད། བོད་ཀྱི་མཐའ་མཚམས་ས་ཁུལ་ཚོར་མཚོན་ནའང་། ལོ་སྟོང་ཕྲག་རིང་ཡོད་པའི་བོད་ཀྱི་རིག་གཞུང་འདི་བརྟན་པོ་བྱས་ཏེ་ཡོད། དེ་ཧ་ཅང་ཡག་པོ་རེད། ཅེས་སོགས་བཀའ་སློབ་སྩལ་རྗེས་ལ་དྭགས་ནང་ཚོགས་ཀྱི་དབུ་སྐྱོང་ཚེ་རིང་རྡོ་རྗེ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་སུ་ཆོས་འབྲེལ་དང་། མི་མང་ལ་མཇལ་ཁ་སྩལ་བ་སོགས་ལ་ཐུགས་རྗེ་ཆེ་ཞུས་ཡོད་པ་དང་། མཐར་ལོ་རྒྱུས་ཀྱི་རྒྱུན་ཧ་ཅང་རིང་ལ་བོད་དང་ཧི་མ་ལ་ཡའི་རི་རྒྱུད་ཡོངས་སུ་དར་སྲོལ་ཆེ་བའི་ཤོན་བྲོ་གཟིགས་འབུལ་དང་ལྷན་ཉིན་གུང་ལྗགས་སྨིན་གནང་རྗེས་ཕོ་བྲང་དགེ་འཕེལ་གླིང་དུ་ཆིབས་བསྒྱུར་བསྐྱངས་ཡོད།
