༄༅། །ཕྱི་ལོ་ ༢༠༢༥ ཟླ་ ༩ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་རམ་ས་ལའི་བཞུགས་སྒར་ཕོ་བྲང་དུ་ཏཱ་ཡི་སི་ཏུ་རིན་པོ་ཆེ་མཆོག་གིས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་དགུ་བཅུར་ཕེབས་པའི་ལོ་འཁོར་མོ་བྱམས་བརྩེའི་ལོར་སྲུང་བརྩི་བྱེད་བཞིན་པ་དང་བསྟུན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བརྟན་བཞུགས་ཆེད་དྭགས་བརྒྱུད་བསྟན་པའི་གསལ་བྱེད་བྱམས་མགོན་ཀྭན་ཏིང་ཏཱ་ཡི་སི་ཏུ་སྐུ་ཕྲེང་བཅུ་གཉིས་པ་པདྨ་ཉིན་བྱེད་དབང་པོ་མཆོག་གིས་ལོ་གསུམ་རིང་སྒྲོལ་མ་འབུམ་བརྒྱ་དང་བརྒྱད་གསོག་སྒྲུབ་དང་། དེའི་སྔོན་རྟ་མགྲིན་གྱི་སྒོ་ནས་ཟླ་གཅིག་དང་ཕྱེད་ཀར་མཚམས་ལ་བཞུགས་པ་དང་། ཕུར་བའི་སྒོ་ནས་ཟླ་གཅིག་དང་ཕྱེད་ཀར་མཚམས་ལ་བཞུགས་ཡོད་པར་མ་ཟད། སྐུའི་འཁྲུངས་སྐར་སྐབས་སུ་ཉིན་བརྒྱ་ལ་མཚམས་ལ་བཞུགས་ཏེ། མགོན་པོ་མཆོག་སྐུ་ཚེ་བརྟན་ཆེད་ཆོ་ག་སྨིན་སྒྲུབ་ཞུས་ཡོད་པ་དང་། དེ་རིང་བྱམས་མགོན་ཀྭན་ཏིང་ཏཱ་ཡི་སི་ཏུ་རིན་པོ་ཆེ་མཆོག་དང་དཔལ་སྤུངས་ཤེས་རབ་གླིང་གི་དགེ་འདུན་པ་རྣམས་བཞུགས་སྒར་ཕོ་བྲང་དུ་དངོས་ཕེབས་ཀྱིས་བརྟན་བཞུགས་བསྟར་འབུལ་དང་། མཇལ་ཁ་ཞུས་ཡོད་པ་རེད།
