༄༅། །ཕྱི་ལོ་ ༢༠༢༦ ཟླ་ ༩ ཚེས་ ༣༠ ཉིན་གྱི་ཞོགས་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་ཕོ་བྲང་དུ་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་བྷི་རི་ཨན་མཱ་སི་ཊི་ (Brian Mast) མཆོག་གིས་དབུ་ཁྲིད་པའི་སྤྱི་མཐུན་ཚོགས་པའི་འཐུས་མི་བྷི་རི་ཨན་མཱ་སི་ཊི་ (Brian Mast) དང་། ཇེམས་གྷལ་ལཱ་གྷར་ (James Gallagher)། ཇི་མི་པཱ་ཊོ་ནི་སི་ (Jimmy Patronis) དང་། མང་གཙོ་ཚོགས་པའི་འཐུས་མི་ཤྲི་ཐཱ་ནེ་ཌར་ (Shri Thanedar) དང་། ཧེ་ལི་སི་ཊིབ་སི་ (Haley Stevens) བཅས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་ལ་མཇལ་འཕྲད་གནང་། ཐའེ་ཝན་ཚོགས་གཉིས་ཆོས་ཚོགས་ཀྱི་ཚོགས་མི་ ༤༡༢ ལ་མཇལ་ཁ་དང་ལྗགས་ལུང་ཁག་ཅིག་སྩལ་ཡོད་པ་རེད།
དེ་ཡང་ཨ་རིའི་གྲོས་ཚོགས་ཀྱི་སྐུ་ཚབ་འཐུས་མི་ཚོར་མཇལ་འཕྲད་སྐབས་སུ་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་བྷི་རི་ཨན་མཱ་སི་ཊི་ (Brian Mast) མཆོག་གིས་༸གོང་ས་མཆོག་ཁྱོད་ཀྱིས་སྣེ་ལེན་དང་འབྲེལ་ང་ཚོའི་མཉམ་དུ་དུས་ཚོད་བཏང་བར་ཐུགས་རྗེ་ཆེ་ཞུ། དེ་ནི་ང་ཚོར་ཆེ་མཐོང་ཆེན་པོ་ཞིག་རེད། ཅེས་སྙན་སེང་ཞུས་པ་དང་། མགོན་པོ་མཆོག་གིས། ངོས་རང་ལ་གཞིས་ལུས་བོད་རྒྱ་ཆེའི་མི་མང་དང་། རྒྱ་གར་དུ་ཡོད་པའི་བོད་པ་ཚོ་ཚང་མས་རེ་བ་བྱེད་བཞིན་ཡོད། ངོས་ཀྱིས་བོད་མི་རིགས་ཀྱི་ལམ་སྲོལ་བཟུང་ནས་བསྡད་ཡོད། དེ་ལ་དོ་སྣང་ཆེན་པོ་བྱེད་ཀྱི་འདུག
ངོས་རང་ཞོགས་པ་ཡར་ལངས་པ་དང་ང་ཚོའི་བོད་མིའི་ཞི་བདེ་དོན་གཉེར་གྱི་སེམས་དེ་དྲན་ཡོང་གི་འདུག ད་ལྟའི་བར་དུ་ངོས་ཀྱི་གཟུགས་པོ་ནི་ཧ་ཅང་བདེ་པོ་འདུག ངོས་རང་མགོ་དམར་མ་རེད། ཅེས་སྐུ་རྩེད་གནང་ཞིང་། སྐུ་ཞབས་བྷི་རི་ཨན་མཱ་སི་ཊི་མཆོག་གིས་ཁྱེད་ནི་སྐུ་གཟུགས་ཧ་ཅང་བཟང་པོ་ཞིག་རེད། མི་མང་པོ་ཞིག་གིས་ཁྱེད་ལྟར་སྐུ་གཟུགས་ཡག་པོ་མཐོང་རྒྱུའི་རེ་བ་བྱེད་བཞིན་ཡོད། ཅེས་དང་། ༸གོང་ས་མཆོག ང་ཚོས་ཁྱེད་ལ་ཕྱག་རྟགས་ཤིག་འཁྱེར་ཡོང་ཡོད། བོད་ཀྱི་མེ་ལྕེ་གསོན་པོར་གནས་པ་ནི་རང་དབང་གི་མེ་ལྕེ་གསོན་པོར་འཇོག་པའི་ཆེད་དུ་རེད། ང་ཚོའི་རང་དབང་གི་མེ་ལྕེ་དེ་ལོ་ངོ་ ༢༥༠ སྔོན་ལ་བྱུང་བ་དང་། ངས་ང་ཚོའི་རྒྱལ་ཁབ་ཀྱི་ལྟེ་གནས་སྟེང་དུ་རྒྱལ་དར་འདི་ང་ཚོར་རང་བཙན་ཐོབ་པའི་དུས་ཆེན་ཐེངས་ ༢༥༠ སྐབས་བསྒྲེངས་པ་ཡིན། ཁྱེད་ཚོར་ཡང་དེ་ལྟ་བུའི་དུས་ཚོད་ཡོང་བར་སྨོན་འདུན་ཞུ་རྒྱུ་ཡིན། ཞེས་སྙན་སེང་དང་འབྲེལ་ཨ་རིའི་རྒྱལ་དར་ཞིག་ཕྱག་རྟགས་སུ་འབུལ་ལམ་ཞུས་ཤིང་།
༸གོང་ས་མཆོག་གིས། བོད་མི་མང་གིས་ཏཱ་ལའི་བླ་མ་ཞེས་ཡིད་ཆེས་དང་ཧ་ཅང་དགའ་བོ་བྱེད་ཀྱི་ཡོད། ངོས་ཀྱིས་བོད་མིའི་ཚབ་བྱེད་ནས་སྐད་ཆ་བཤད་པ་ལ་སྤོབས་པ་ཡོད། ཅེས་བཀའ་སློབ་སྩལ་རྗེས་ཨ་རིའི་གྲོས་ཚོགས་ཀྱི་སྐུ་ཚབ་རྣམ་པ་རེར་མཇལ་ཁ་དང་། ཕྱག་རྟགས་གནང་ཡོད་པ་དང་། མཐར་མཇལ་འཕྲད་ཁང་གི་མདུན་ཐང་དུ་ཐའེ་ཝན་ནས་ཕེབས་པའི་ཚོགས་གཉིས་ཆོས་ཚོགས་ཀྱི་ཚོགས་མི་རྣམས་ལ་ཐུབ་པའི་མཚན་སྔགས་དང་མ་ཎི་ཡི་གེ་དྲུག་མ་སོགས་ཀྱི་ལྗགས་ལུང་བཀའ་དྲིན་སྩལ་ཡོད་པ་རེད།
